ក្រុមហ៊ុនយក្សសិង្ហបូរីសម្រេចលក់អាជីវកម្មនៅប្រទេសខ្លួន មកផ្ដោតលើការវិនិយោគនៅកម្ពុជា

• 7 ខែ​មិថុនា 2021
• Uncategorized
• 13 មើល

ក្រុមហ៊ុនអចលនទ្រព្យសិង្ហបូរីខ្នាតយក្ស ហុងឡៃហួត គ្រុប (HLH Group) សម្រេចលក់ភាគហ៊ុនទាំងអស់របស់ខ្លួនក្នុងអាជីវកម្មកសិដ្ឋានបែបរីសតនៅសិង្ហបូរី ក្នុងតម្លៃប្រមាណ ៣.៦ លានដុល្លារអាមេរិក ដើម្បីយកទុនមកផ្តោតលើអាជីវកម្មនៅកម្ពុជាឱ្យបានច្រើនជាងមុន។

ក្រុមហ៊ុនបានចុះកិច្ចព្រមព្រៀងលក់ទិញជាមួយក្រុមហ៊ុន Gallop Green ដែលជាក្រុមហ៊ុនផលិតគ្រឿងសមុទ្រ ដោយនេះជាការលក់ភាគហ៊ុនសរុបចំនួន ១២,៦លានហ៊ុន។ ក្រុមហ៊ុន Gallop Green បានបង់ប្រាក់កក់ប្រមាណ ៧៥.០០០ ដុល្លារអាមេរិក ហើយនឹងបង់ប្រាក់ទាំងអស់តាមការការសន្យានៅពេលអនាគត។

ការលក់នេះបានធ្វើឡើងបន្ទាប់ពីក្រុមហ៊ុនមានបំណងផ្តោតទាំងស្រុងលើអាជីវកម្មរបស់ខ្លួននៅក្នុងប្រទេសកម្ពុជា ហើយក៏ដើម្បីពង្រឹងជំហរហិរញ្ញវត្ថុរបស់ខ្លួនផងដែរ។ ក្រុមហ៊ុន បានឱ្យដឹងទៀតថា ការលក់នេះនឹងបង្កើតអត្ថប្រយោជន៍រយៈពេលវែងដល់ក្រុមហ៊ុន។

បច្ចុប្បន្នជាង ៩៥% នៃប្រតិបត្តិការអាជីវកម្មរបស់ក្រុមហ៊ុននេះផ្តោតសំខាន់នៅក្នុងប្រទេសកម្ពុជាក្នុងវិស័យអចលនទ្រព្យ និងកសិកម្ម ខណៈដែល ៥% ទៀត បានពីអាជីវកម្មកសិដ្ឋានបែបរីសតនៅសិង្ហបូរី។

គួរបញ្ជាក់ផងដែរថា នៅកម្ពុជា គម្រោងចុងក្រោយបំផុតរបស់ក្រុមហ៊ុន HLH Group គឺសំណើរួម ជាមួយក្រុមហ៊ុនចិន ចង់វិនិយោគសាងសង់រោងចក្រសូឡាខ្នាតយក្សតម្លៃ ២០០ ដុល្លារអាមេរិកនៅខេត្ដកំពង់ស្ពឺ។ (អានបន្ថែម)

នៅក្នុងខែមីនាឆ្នាំនេះ ក្រុមហ៊ុនក៏ទើបទទួលបានការយល់ព្រមពីរដ្ឋាភិបាលកម្ពុជា លើគម្រោងអភិវឌ្ឍចម្រុះឱរ៉ាលអេកូស៊ីធី ក្នុងស្រុកឱរ៉ាល់ ខេត្តកំពង់ស្ពឺ ផងដែរ ដែលរំពឹងថា នឹងទាក់ទាញបានទឹកប្រាក់វិនិយោគប្រមាណ ១០ពាន់លានដុល្លារអាមេរិក ពិសេសពីប្រទេសសិង្ហបូរី។

កាលពីខែកញ្ញាឆ្នាំមុន HLH Group ក៏បានចុះហត្ថលេខាលើអនុស្សារណៈយោគយល់ជាមួយក្រុមហ៊ុន ដាណឺម៉ាក Skiold លើគម្រោងតំបន់សេដ្ឋកិច្ចពិសេសតម្លៃ ១ពាន់លានដុល្លារ ។

ក្រៅពីនេះ ក្រុមហ៊ុនក៏បាននឹងកំពុងអភិវឌ្ឍគម្រោងជាច្រើនដូចជា គម្រោង D’Seaview នៅក្រុងព្រះសីហនុ និងគម្រោង Royal Platinum នៅភ្នំពេញជាដើម។ (អានបន្ថែម និងបន្ថែម)

 

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍