ក្រុមហ៊ុន CNGC គ្រោងបង្កើតស្ថានីយស្តុកឧស្ម័ន LNG និងបណ្ដាញបញ្ជូនទ្រង់ទ្រាយធំនៅកម្ពុជា

• 7 ខែ​កក្កដា 2021
• Uncategorized
• 8 មើល

ក្រុមហ៊ុន Cambodia Natural Gas Corporation (CNGC) គ្រោងវិនិយោគបង្កើតឃ្លាំងស្តុកឧស្ម័នធម្មជាតិ LNG និងបណ្ដាញបញ្ជូនគ្រប់ជ្រុងជ្រោយបែបទ្រង់ទ្រាយធំ នៅកម្ពុជា។ នេះបើយោងតាមសារព័ត៌មាន Upstream Online កាលពីថ្មីៗនេះ។

យោងតាមផែនការ ឧស្ម័នធម្មជាតិ LNG នឹងត្រូវនាំចូលពីក្រៅប្រទេស ហើយគម្រោងទាំងមូលនឹងរួមមាន ការសាងសង់ស្ថានីយពហុមុខងារសម្រាប់ស្ដុកឧស្ម័នចំនួន ២៧កន្លែង រថយន្ដដឹកឧស្ម័នធុនធំជាច្រើនគ្រឿង បំពង់បង្ហូរសម្ពាធខ្ពស់ប្រវែង ២៨២៥ គីឡូម៉ែត្រតភ្ជាប់ទៅបណ្ដាខេត្តនានា បណ្តាញបំពង់បង្ហូរសម្ពាធមធ្យម និងទាប ក៏ដូចជាស្ថានីយបញ្ជូលហ្គាស ក្នុងទីក្រុងភ្នំពេញផងដែរ។

ប្រភពដដែលបានឱ្យដឹងថា ក្រុមហ៊ុនថាមពល និងហ្គាសខ្នាតយក្សនៃក្រុមហ៊ុន CNOOC គឺជាអ្នកទទួលបានសិទ្ធក្នងការសាងសង់ឃ្លាំងស្តុកឧស្ម័នធម្មជាតិ (LNG) នេះ។

មកទល់បច្ចុប្បន្ន ក្រុមហ៊ុនបុត្រសម្ព័ន្ធរបស់ CNOOC គឺក្រុមហ៊ុន China Offshore Oil Engineering Company បានបញ្ចប់ការសិក្សាសមិទ្ធិលទ្ធភាព និងរៀបចំប្លង់លើទីតាំងគម្រោងរួចហើយ ដោយការសិក្សាគឺផ្តោតលើហេដ្ឋារចនាសម្ព័ន្ធឃ្លាំងស្តុក ដែលនឹងអាចស្តុកឧស្ម័នដល់ទៅជាង ២២ម៉ឺនម៉ែត្រគូប។

ខណៈនេះ ក្រុមហ៊ុនកំពុងរង់ចាំការសម្រេចចិត្តពី CNGC មុននឹងឈានដល់ដំណាក់កាលលទ្ធកម្ម និងសាងសង់។

គួរបញ្ជាក់ផងដែរថា ក្រុមហ៊ុន CNGC ទទួលបានការអនុញ្ញាតពីរាជរដ្ឋាភិបាលដើម្បីដំណើរការគម្រោងឧស្ម័នធម្មជាតិ ដែលមាន ៣ដំណាក់កាលនៅភ្នំពេញ តាំងពីខែឧសភា ឆ្នាំ២០១៩។

ផែនការរយៈពេល ១៥ឆ្នាំនេះ មានគោលបំណងជួយកាត់បន្ថយការពឹងផ្អែករបស់កម្ពុជាលើធ្យូងថ្ម និងវារីអគ្គិសនី។

ក្រសួងរ៉ែនិងថាមពលរំពឹងថា ឧស្ម័នធម្មជាតិ LNG នឹងក្លាយជាសមាសធាតុសំខាន់នៃល្បាញថាមពលរបស់ប្រទេសនាពេលអនាគតដ៏ខ្លីខាងមុខ ហើយក្រសួងក៏មានផែនការបង្កើតរោងចក្រថាមពលប្រើហ្គាសរហូតដល់ ៣៦០០ មេហ្គាវ៉ាត់នៅត្រឹមឆ្នាំ ២០៣០ផងដែរ។

• ថាមពល និងបរិស្ថាន
• Energy and Environment
• ថាមពល និងបរិស្ថាន