ក្រុមហ៊ុនAEONប្រកាសទីតាំងផ្សារទំនើបទី៣របស់ខ្លួនជាផ្លូវការហើយ

• 13 ខែ​តុលា 2018
• ព័ត៌មានអចលនទ្រព្យ
• 9 មើល

ក្រុមហ៊ុនអភិវឌ្ឍផ្សារទំនើបដ៏ធំរបស់ជប៉ុនAEON MALL Co., Ltd បានសម្រេចប្រកាសទីតាំងផ្សារទំនើបទី៣របស់ខ្លួនជាផ្លូវការហើយ។

យោងតាមសេចក្តីប្រកាសព័ត៌មានរបស់ក្រុមហ៊ុនកាលពីដើមខែតុលាឆ្នាំ២០១៨កន្លងទៅនេះ ផ្សារទំនើបទី៣ឈ្មោះថា « AEON MALL Cambodia No. 3(ឈ្មោះមិនទាន់ជាផ្លូវការ) » គឺនឹងមានទីតាំងស្ថិតក្នុងតំបន់អភិវឌ្ឍន៍នៃទីក្រុងរណប ING CITY ចំងាយប្រមាណជា៨ គីឡូម៉ែត្រពីរាជធានីភ្នំពេញ។

ផ្សារទំនើបទី៣របស់ក្រុមហ៊ុនAEONគឺនឹងមានផ្ទៃក្រឡាសរុបរហូតដល់ទៅ ១៧៤០០០ ម៉ែត្រការ៉េដែលនេះគឺធំជាងផលបូកផ្ទៃក្រឡាផ្សារទំនើបAEON ទី១ (៦៨០០០ ម៉ែត្រការ៉េ) និងផ្សារទំនើបAEON ២ សែនសុខ (១០០០០០ ម៉ែត្រការ៉េ) ដែលទំហំសរុបមានត្រឹមតែ ១៦៨០០០ម៉ែត្រការ៉េ។

ទន្ទឹមនឹងនេះដែរ ផ្សារទំនើបទី៣របស់ AEON ដែលមានទីតាំងតាមបណ្តោយផ្លូវ៦០ម៉ែត្រឬមហាវិថីសម្តេចតេជោ ហ៊ុន សែនមួយនេះគឺនឹងដាក់ឲ្យដំណើរការក្នុងឆ្នាំ២០២៣ខាងមុខនេះ។

សេចក្តីប្រកាសព័ត៌មានដដែលបានបញ្ជាក់ថា ផ្សារទំនើបទី៣របស់ក្រុមហ៊ុន គឺជាគម្រោងធំជាងគេក្នុងទីក្រុងរណប ING CITYដែលនឹងនាំយកអ្វីថ្មីៗនិងចុងក្រោយបំផុតសម្រាប់បំពេញតម្រូវការប្រជាជនដែលរស់នៅក្នុងតំបន់ខាងត្បូងរាជធានីភ្នំពេញ។

ក្រុមហ៊ុនបានបន្ថែមទៀតថា ការសម្រេចជ្រើសរើសទីតាំងក្នុងតំបន់ ING CITY គឺដោយសារតំបន់នេះមានការអភិវឌ្ឍន៍យ៉ាងកុះករដូចជាការបង្កើតសាលារៀនអន្តរជាតិ លំនៅដ្ឋាន និងខុនដូជាដើមដែលទាំងអស់នេះនឹងទាក់ទាញចំនួនប្រជាពលរដ្ឋទៅរស់នៅតំបន់នេះកាន់តែច្រើននាពេលអនាគត។

យ៉ាងណាមិញ ក្រុមហ៊ុននៅមិនទាន់ធ្វើការសម្រេចចិត្តនៅឡើយទាក់ទងទៅនឹងផ្ទៃក្រឡាសម្រាប់ដាក់ជួល។

• គម្រោងអភិវឌ្ឍន៍
• គម្រោងអភិវឌ្ឍន៍