គណៈកម្មាធិការតំបន់ឆ្នេរ បើកភ្លើងខៀវលើគម្រោងបង្កើតរមណីយដ្ឋានឆ្នេរខ្សាច់កម្រិតខ្ពស់នៅកែប

• 23 ខែ​កក្កដា 2021
• ព័ត៌មានអចលនទ្រព្យ
• 14 មើល

គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គអឆក) បានសម្រេចគាំទ្រឱ្យឯកជនអនុវត្តគម្រោងបង្កើតរមណីយដ្ឋានឆ្នេរខ្សាច់កម្សាន្តកម្រិតខ្ពស់នៅភូមិថ្មី ខេត្តកែប ខណៈបន្តជំរុញឱ្យឯកជន និងរដ្ឋសហការគ្នាបង្កើតទីតាំងរមណីដ្ឋានទេសចរណ៍ថ្មីៗ បន្ថែមទៀត នៅក្នុងខេត្តនេះ។

ការពិនិត្យ និងវាយតម្លៃលើសំណើរគម្រោងនេះធ្វើឡើង នៅក្នុងកិច្ចប្រជុំរបស់ គអឆក កាលពីថ្ងៃទី ២២ កន្លងទៅនេះ។

គម្រោងរមណីយដ្ឋានឆ្នេរខ្សាច់កម្សាន្តកម្រិតខ្ពស់នេះ ស្ថិតនៅភូមិថ្មី សង្កាត់ព្រៃធំ ក្រុងកែប ដែលនឹងមានប្រវែងបណ្តោយ ២ ៧០០ម៉ែត្រ។

យោងតាមប្រភពដដែល គម្រោងនឹងបង្កើតជាឆ្នេរធម្មជាតិសាធារណៈថ្មីតាមបណ្តោយសមុទ្រដែលមានទទឹងយ៉ាងតិចប្រវែង ៣០ម៉ែត្រ រៀបចំជាសួនសាធារណៈ និងដាំដើមឈើនៅលើដីចំណីឆ្នេរទទឹងប្រវែង ៥០ម៉ែត្រ។

គម្រោងនេះ គឺធ្វើឡើងក្រោមទម្រង់នៃកិច្ចសន្យាអភិវឌ្ឍន៍រវាងរដ្ឋ និងឯកជនក្នុងគោលបំណងកែលម្អ និងបង្កើតឆ្នេរខ្សាច់កម្សាន្តសាធារណៈ លំហសាធារណៈ និងផ្ទៃបៃតង។

យោងតាមរដ្ឋបាលខេត្តកែប ក្រៅពីគម្រោងនេះ ក៏នៅមានគម្រោងស្រដៀងគ្នាមួយទៀត គឺគម្រោងរមណីយដ្ឋានឆ្នេរខ្សាច់កម្សាន្តកម្រិតខ្ពស់ ធម្មជាតិអង្កោល ដែលស្ថិតនៅភូមិអង្កោល ឃុំអង្កោល ស្រុកដំណាក់ចង្អើរ៕ (អានបន្ថែម)

 

• គម្រោងអភិវឌ្ឍន៍
• គម្រោងអភិវឌ្ឍន៍