គេថាវិបត្តិកូវីដជាឱកាសទិញអចលនទ្រព្យបានថោក តែហេតុអ្វីចំនួនការទិញលក់ធ្លាក់ចុះទៅវិញ?

• 29 ខែ​មករា 2021
• ព័ត៌មានអចលនទ្រព្យ
• 8 មើល

ក្នុងរយៈពេលមួយឆ្នាំកន្លងមកនេះ សេដ្ឋកិច្ច និងទីផ្សារអចលនទ្រព្យនៅកម្ពុជាទទួលរងសម្ពាធយ៉ាងខ្លាំងពីវិបត្តិកូវីដ។ ប៉ុន្តែគ្រប់ពេលដែលសួរទៅអ្នកវិភាគ ឬអ្នកជំនាញ ពួកគេតែងតែឆ្លើយថាជាឱកាសៗ ព្រោះអាចទិញអចលនទ្រព្យបានក្រោមតម្លៃទីផ្សារ។

ផ្ទុយទៅវិញ បើសង្កេតតាមភាពជាក់ស្ដែង គឺឃើញថាមានភាពស្ងប់ស្ងាត់ ហើយបើយោងតាមប្រធានសមាគមអ្នកវាយតម្លៃ និងភ្នាក់ងារអចលវត្ថុ លោក ច្រឹក សុខនីម ចំនួនការទិញលក់នៅឆ្នាំ ២០២០ បានធ្លាក់ចុះប្រមាណ ១៥% ទៅ ២០% ឯណោះ។

តើហេតុអ្វីជាឱកាស តែការទិញលក់ធ្លាក់ចុះទៅវិញ?

លោក គាម សៀកឡុង ទីប្រឹក្សាគាំទ្រអាជីវកម្មអចលនវត្ថុនៃសមាគមអ្នកវាយតម្លៃ និងភា្នក់ងារអចលវត្ថុកម្ពុជា បានពន្យល់ថា ការពិតស្ថានភាពបែបនេះជាឱកាស តែមាន ២ កត្តាធំៗ ធ្វើឱ្យការទិញលក់ធ្លាក់ចុះ។

«កត្តា ទី១ អ្នកមានលុយ គឺគេមិនមែនឃើញថោកចេះតែទិញទេ គេគិតវិភាគមើលដែរ។ ជាឱកាសទិញបានថោកពិតមែន តែទិញហើយចំណេញឬអត់ មានឱកាសឡើងថ្លៃឬអត់ក្រោយចប់កូវីដ ពោលគឺគេទិញរើសអចលនទ្រព្យណាដែលល្អប៉ុណ្ណោះ។ ដូច្នេះ មិនមែនថាគ្មានអ្នកទិញលក់ទេ តែដោយសារគេទិញប្រយ័ត្នជាងមុន ទើបមើលទៅដូចជាស្ងាត់»។

«កត្ដាទី ២ ចរន្តទិញលក់នៅកម្ពុជាជិតពាក់កណ្ដាលពឹងផ្អែកលើជនបរទេស ហើយដោយសារតែវិបត្តិកូវីដ ទើបធ្វើឱ្យទីផ្សារបាត់បង់ការទិញលក់មួយចំណែកធំនេះទៅ»។

បើនិយាយឱ្យខ្លី កាលៈទេសៈនេះ ជាឱកាសសម្រាប់វិនិយោគិនដែលមានបទពិសោធន៍ មានថវិកាខ្ពស់ និងមានចរន្តសាច់ប្រាក់សល់ច្រើន ព្រោះត្រូវការពេលដើម្បីឱ្យអចលនទ្រព្យឡើងថ្លៃវិញ។

លើសពីនេះ មិនមែនគ្រប់កន្លែងដែលលក់ក្រោមតម្លៃទីផ្សារជាឱកាសនោះទេ ព្រោះកន្លែងខ្លះលក់ថោកមែន តែមិនងាយឡើងវិញនោះទេ។

ទោះជាយ៉ាងក្ដី លោក សៀកឡុង នៅតែមានសុទិត្ថិនិយមថាឆ្នាំ ២០២១ នេះ ទីផ្សារអចលនទ្រព្យនឹងងើបឡើងវិញ ដោយសារប្រទេសនីមួយៗចាប់មានវ៉ាកស៊ាំង ជាកត្ដាទាក់ទាញវិនិយោគិនពីក្រៅប្រទេស។

គួរបញ្ជាក់ផងដែរ អ្នកជំនាញរូបនេះ រួមគ្នាជាមួយអ្នកវិភាគ ២ រូប ទៀត ធ្លាប់បានចែករំលែកយុទ្ធសាស្រ្តចំនួន ៧ ដែលធ្វើឱ្យចង់អ្នកវិនិយោគលើអចលនទ្រព្យចំណេញច្រើន ជាពិសេសក្នុងកាលៈទេសៈបែបនេះ។ (អានបន្ថែម)

• អត្ថបទវិភាគ
• ចំណេះដឹង និង បទពិសោធន៍
• ធុរកិច្ច និងទីផ្សារ
• អត្ថបទវិភាគ
• ចំណេះដឹង និង បទពិសោធន៍
• ធុរកិច្ច និងទីផ្សារ