ចិនចំណាយជិត $១០ពាន់លាន ជីកព្រែកវៀងសមុទ្រភ្ជាប់មកប្រទេសអាស៊ាន បច្ចុប្បន្នសម្រេចបាន ៥៣%

• 9 ខែ​តុលា 2024
• Uncategorized
• 13 មើល

ព្រែកជីកពីងលូ ( Pinglu ) តម្លៃ ៩,៩៧ពាន់លានដុល្លារ ដែលជាគម្រោងហេដ្ឋារចនាសម្ព័ន្ធវៀងសមុទ្រដ៏សំខាន់នៅក្នុងតំបន់ស្វយ័តគួងស៊ី ( Guangxi Zhuang) ភាគខាងត្បូងប្រទេសចិន សម្រេចការសាងសង់បាន ៥៣,២% ក្រោយចាប់ផ្តើមប្រតិបត្តិការជាង២ឆ្នាំ ចាប់តាំងពីថ្ងៃទី ២៨ ខែសីហា ឆ្នាំ ២០២២មក។ វឌ្ឍនភាពដ៏សំខាន់នេះ ត្រូវបានរាយការណ៍ដោយ pattayamail នៅថ្ងៃទី ១០ ខែកញ្ញា ឆ្នាំ ២០២៤។​

ក្រោយសាងសង់រួច គម្រោងខ្នាតយក្សនេះ នឹងកាត់បន្ថយពេលវេលាដឹកជញ្ជូនពីតំបន់ណាននីងទៅកាន់ឈូងសមុទ្រ Beibu ភាគខាងត្បូងប្រទេសមកត្រឹម ១៥ ទៅ ១៧ ម៉ោងប៉ុណ្ណោះ។ ព្រែកជីកនេះ គឺជាធាតុសំខាន់នៅក្នុងផែនការប្រាំឆ្នាំទី ១៤ របស់ប្រទេសចិន និងជាយុទ្ធសាស្ត្រច្រករបៀងដី និងសមុទ្រខាងលិចថ្មី និងមានតួនាទីជានិម្មិតរូបបង្ហាញពីឥទ្ធិពលដែលកំពុងកើនឡើងនៅក្នុងវិស័យភស្តុភាររវាងប្រទេសចិននិងប្រទេសនៅក្នុងតំបន់អាស៊ីអាគ្នេយ៍។

ព្រែកជីក Pinglu មានប្រវែងសរុបប្រមាណ ១៣៤,២ គីឡូម៉ែត្រ ដែលមានទំហំអាចអនុញ្ញាតឱ្យកប៉ាល់ដែលមានសមត្ថភាពផ្ទុករហូតដល់ ៥០០០ តោន ចំនួន ០៣ អាចឆ្លងកាត់ទន្ទឹមគ្នាបាន ដែលធានាបាននូវការដឹកជញ្ជូនទំនិញតាមផ្លូវទឹកប្រកបដោយប្រសិទ្ធភាព។

លោក Yuan Peng អនុប្រធាននាយកដ្ឋានវិស្វកម្មនៃក្រុមហ៊ុន Pinglu Canal Group Co., Ltd. បានបញ្ជាក់ថា “បច្ចុប្បន្ន មានកម្មករជិត ២០០០០ នាក់កំពុងចូលរួមក្នុងដំណាក់កាលជីកដី និងជីកថ្មរបស់គម្រោង ហើយគ្រោងនឹងដំណើរការសាកល្បងក្នុងរយៈពេលពីរឆ្នាំខាងមុខ។”

ក្នុងទិសដៅជាយុទ្ធសាស្ត្រដើម្បីបង្កើតច្រកផ្លូវទឹកថ្មី និងបង្កើនល្បឿនលឿនជាងមុនសម្រាប់ពាណិជ្ជកម្មតាមសមុទ្រ វត្តមាន ព្រែកជីក Pinglu នឹងក្លាយជាមូលដ្ឋានគ្រឹះនៃការប្តេជ្ញាចិត្តយ៉ាងមុតមាំរបស់ប្រទេសចិនក្នុងការពង្រឹងទំនាក់ទំនងសេដ្ឋកិច្ចរបស់ខ្លួនជាមួយអាស៊ីអាគ្នេយ៍ និងការពង្រីកការតភ្ជាប់ចិន អាស៊ានជាមួយនឹងទីផ្សារពិភពលោក៕

• Investment and Funding
• Road and Infrastructure
• Projects Development