ទួលគោកនឹងមានParkway ក្នុង ឆ្នាំ ២០២០
ToulKork Skyline នឹងមានការផ្លាស់ប្តូរយ៉ាងធំនៅពេលស្វាគមន៍ “The Parkway” នៅឆ្នាំ ២០២០ ហើយក្រុមហ៊ុនអភិវឌ្ឍន៍បានអះអាងថា នេះជាខុនដូដំបូងបំផុតដែលមានការរួមបញ្ចូលគ្នានូវស្ថាបត្យកម្មខ្មែរ និងរចនាបថទំនើប។
នេះជាការបណ្តាក់ទុនរួមគ្នារវាងក្រុមហ៊ុនក្នុងស្រុក Parkway Investment Co., Ltd. និងក្រុមហ៊ុនចិន Nantong City Daxin Engineering (Cambodia) C0., Ltd. ។ ការអភិវឌ្ឍន៍ដែលមាន ១.៥០០យូនីតនេះ នឹងត្រូវសាងសង់នៅលើផ្ទៃដីទំហំ ១៧.០០០ម៉ែត្រការ៉េ នៅក្នុងខណ្ឌទួលគោកភាគខាងជើងនៃតំបន់បឹងកក់។ គម្រោងParkway ត្រូវបានប៉ាន់ប្រមាណថាមានតម្លៃ ១០០លានដុល្លារអាមេរិក។
ក្រុមហ៊ុនអន្តរជាតិល្បីឈ្មោះ រួមមានក្រុមហ៊ុនស្ថាបត្យកម្មដែលទទួលខុសត្រូវរចនាពហុកីឡដ្ឋានជាតិប៉េកាំង ក្រុមហ៊ុនរចនាផ្នែកខាងក្នុងរបស់សិង្ហបុរីដ៏ល្បី និងក្រុមហ៊ុនសាងសង់Lubanដែលឈ្នះពានរង្វាន់ បានរួមដៃគ្នាដើម្បីបង្កើតចក្ខុវិស័យសម្រាប់ផ្ទះប្រណីត ដោយមានការធានាពីគុណភាពខ្ពស់នៃសមា្ភរៈសំណង់ និងជញ្ជាំង កញ្ចក់សម័យទំនើប។
គម្រោងនេះនឹងមានអគារខុនដូចំនួនបីកំពស់ខុសគ្នា គឺខុនដូកំពស់ ២៩ជាន់ កម្ពស់ ២៥ជាន់ និងកម្ពស់ ៣៥ជាន់ ។ ជាសរុបគម្រោងនេះនឹងផ្តល់នូវខុនដូប្រណីតចំនួន ១.៥០០យូនីត ជាមួយនិងទំហំចាប់ពី ៤៥ម៉ែត្រការ៉េ ទៅ ១៣៥ម៉ែត្រការ៉េ។
ជាមួយនិងជំនាញរបស់ដៃគូវិស្វកម្មចិនដែលមានបទពិសោធន៍ក្នុងការអភិវឌ្ឍន៍សាងសង់អគារនៅប្រទេសចិន និងសហរដ្ឋអាមេរិក លោក សួរ សុខធេង ប្រធានមន្ត្រីប្រតិបត្តិក្រុមហ៊ុន Parkway Investment បានមានប្រសាសន៍ថា ក្រុមហ៊ុនកំពុងពុះពារដើម្បីឲ្យការអភិវឌ្ឍន៍ល្អមានតែមួយគត់ គឺមានផាសុខភាព និងប្រណីតភាព សម្រាប់លំនៅដ្ឋានក្នុងអគារខុនដូរបស់ខ្លួន។
ការអភិវឌ្ឍខុនដូនេះនឹងមានសម្ភារបរិក្ខារក្នុងសតវត្សរ៍ទី២១ នេះជាច្រើនប្រភេទ រួមទាំងអាងហែលទឹក និងកន្លែងហាត់ប្រាណ។ នៅជាន់ផ្ទាល់ដីមានផ្សារដែលក្នុងនោះមានកន្លែងបរិភោគអាហារ កន្លែងកម្សាន្ត និងកន្លែងទិញទំនិញ។ ក្រៅពីនេះមានសាលារៀនតូចមួយសម្រាប់ការប្រើប្រាស់ផ្ដាច់មុខរបស់កូនអ្នកស្នាក់នៅក្នុងខុនដូ។ តំបន់សាធារណៈនឹងស្វាគមន៍អ្នកស្នាក់នៅពីជាន់ទីមួយទៅជាន់បន្ទាប់ ដូច្នេះពួកគេអាចទទួលបានប្រយោជន៍ពេញលេញសម្រាប់ការកម្សាន្ត និងសម្រាកលំហែនៅក្នុងតំបន់បៃតង។
ថ្លែងទៅកាន់អ្នកកាសែតនៅក្នុងពិធីសម្ពោធគម្រោងថ្ងៃទី ២១ ខែមេសា លោក សុខធេង បានឲ្យដឹងថាគម្រោងនេះមានគោលដៅចំពោះអ្នកទិញក្នុងស្រុក និងបរទេស បើទោះជាតម្លៃមិនទាន់ត្រូវបានប្រកាសនៅឡើយក៏ដោយ។
លោកបានពន្យល់ថា “ការវិនិយោគរបស់យើងលើខុនដូទាំងនេះគឺមិនមែនសម្រាប់រយៈពេលខ្លីនោះទេ ប៉ុន្តែសម្រាប់រយៈពេលវែង។ យើងមើលឃើញពីការកើនឡើងយ៉ាងខ្លាំងនៃប្រជាជនថ្នាក់កណ្តាល ជាមួយនឹងប្រាក់ចំណូលដែលមានការប្រែប្រួលរបស់ពួកគេ ពួកគេនឹងចង់បានស្តង់ដាររស់នៅដែលល្អប្រសើរច្រើន។ យើងជឿថាកំណើនចំនួនប្រជាជនរស់នៅក្នុងរាជធានីភ្នំពេញ នឹងជ្រើសរើសរស់នៅជិតកណ្តាលទីក្រុងបំផុត ដើម្បីឲ្យពួកគេអាចកាត់បន្ថយពេលវេលាដែលពួកគេត្រូវអង្គុយក្នុងពេលកកស្ទះចរាចរណ៍ពេលធ្វើដំណើរទៅ និងមកពីធ្វើការ។
ពិធីសម្ពោធបើកការដ្ឋានសាងសង់សម្រាប់ការអភិវឌ្ឍន៍ដ៏ពិសេសនេះបានចាប់ផ្តើមនៅក្នុងខែវិច្ឆិកា ឆ្នាំ ២០១៦ ហើយគ្រោងនឹងបញ្ចប់នៅឆ្នាំ ២០២០។
ក្រុមហ៊ុន Parkway Investment មានបទពិសោធន៍ការងារជាង ២០ឆ្នាំនៅក្នុងវិស័យអចលនទ្រព្យ លំនៅដ្ឋាន និងសំណង់នៅប្រទេសកម្ពុជា ដែលក្នុងនោះរួមមាន Parkway Square, អគារ Parkway និងបុរីរិទ្ធ។ ចំណែកខាងសមភាគីចិន ក្រុមហ៊ុន Nantong City Daxin Engineering (Cambodia) Co., Ltd. គឺជាក្រុមហ៊ុនវិស្វកម្មចិន។
ប្រទេសកម្ពុជាបានទទួលការវិនិយោគក្នុងវិស័យសាងសង់ក្នុងចំនួនទឹកប្រាក់ ៨,៥ ប៊ីលានដុល្លារនៅឆ្នាំ ២០១៦ នេះបើតាមរបាយការណ៍ផ្លូវការពីក្រសួងរៀបចំដែនដី នគរូបនីយកម្ម និងសំណង់ (MLMUPC)។ ទោះជាយ៉ាងណាក្រសួងបានចេញផ្សាយរបាយការណ៍មួយនៅចុងខែមេសា ដោយបានបង្ហាញថាមានការធ្លាក់ចុះ ២៥ ភាគរយ សម្រាប់ត្រីមាសទីមួយនៅឆ្នាំនេះបើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
- Video Advertisement -
English 
ខ្មែរ 
