បាត់ដំបងកំពុងរៀបចំអភិវឌ្ឍន៍ប្រព័ន្ធលូ និងស្ថានីយប្រព្រឹត្តិកម្មទឹកកខ្វក់

• 19 ខែ​មិថុនា 2020
• Uncategorized
• 9 មើល

គម្រោងប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ ដែលមានសមត្ថភាពអាចចម្រោះទឹកកខ្វក់ ប្រមាណ ១ ២០០០ លីត្រក្នុងមួយថ្ងៃគ្រោងនឹងសាងសង់ នៅចុងឆ្នាំ ២០២០ នេះ ហើយគ្រោងដាក់ដំណើរការ នៅឆ្នាំ ២០២២ ខាងមុខនេះ។

រដ្ឋបាលខេត្តបាត់ដំបង បាននឹងកំពុងរៀបចំអភិវឌ្ឍប្រព័ន្ធលូ និងស្ថានីយប្រព្រឹត្តិកម្មទឹកកខ្វក់នេះ ដើម្បីការអភិវឌ្ឍទីក្រុងស្អាត ប្រកបដោយបរិស្ថានល្អនិងដើម្បីឆ្លើយតបទៅនឹងកំណើនប្រជាជន និងការវិនិយោគនានា មាននៅក្នុងក្រុងបាត់ដំបង។

ឯកឧត្តម ងួន រតនៈ អភិបាលខេត្តបាត់ដំបង បានប្រាប់ទស្សនាវដ្តីសំណង់ និងអចលនទ្រព្យនៅថ្ងៃទី ១៩ នេះថា គម្រោងលូ និងស្ថានីយប្រព្រឹតិ្តកម្មទឹកកខ្វក់នេះ គ្របដណ្តប់ ក្នុងសង្កាត់ចំនួន ៣ និងភូមិចំនួន ១០ ក្នុងទីក្រុងបាត់ដំបង។

ឯកឧត្តមថ្លែងថា៖ “ជាផ្នែកមួយនៃការគ្រប់គ្រងទីក្រុងប្រកបដោយបរិស្ថានល្អ អនាម័យក្រុង  គម្រោងប្រព័ន្ធលូ និងស្ថានីយប្រព្រឹត្តិកម្មនេះ មានសារៈសំខាន់ សម្រាប់ការរស់ប្រជាពលរដ្ឋ និងលើកសោភណភាពទីក្រុង។ តាមរយៈគម្រោងនេះ យើងនឹងញែកទឹកភ្លៀង និងទឹកស្អុយ ហើយចម្រុះអោយបានស្អាត មុនបង្ហូរចូលទៅស្ទឹង”។

ឯកឧត្តម បន្តថា៖ “គម្រោងនេះនឹងធ្វើឲ្យក្រុងបាត់ដំបងក្លាយជាទីក្រុងទីបី មានប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ បន្ទាប់ពីទីក្រុងសីហនុ និងក្រុងសៀមរាប”។

ខេត្តបាត់ដំបង ត្រូវបានគេស្គាល់ថាជាខេត្តកសិកម្ម ប៉ុន្តែវិស័យទេសចរណ៍ក្នុងខេត្តនេះកំពុងមានការរីកចម្រើន ជាពិសេស រដ្ឋាភិបាលកំពុងសិក្សាពីលទ្ធភាពក្នុងការបើកអាកាសយានដ្ឋានបាត់ដំបងឡើងវិញ ដើម្បីបម្រើដល់ការដឹកជញ្ជូនផ្លូវអាកាស៕

• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម
• Projects Development
• គម្រោងអភិវឌ្ឍន៍
• Urbanization and Architect