បារាំង ផ្ដល់ជំនួយប្រមាណ៥០ម៉ឺនដុល្លារ ជួយលើកកម្ពស់វិស័យអាកាសចរស៊ីវិលកម្ពុជា

• 3 ខែ​វិច្ឆិកា 2021
• Uncategorized
• 10 មើល

រដ្ឋាភិបាលបារាំង នឹងផ្តល់ហិរញ្ញប្បទានឥតសំណងចំនួន ៤៥០ពាន់អឺរ៉ូ (ប្រមាណ៥០ម៉ឺនដុល្លារ) ដើម្បីអនុវត្តគម្រោងកសាងសមត្ថភាពក្នុងវិស័យអាកាសចរស៊ីវិលកម្ពុជា។

ការប្រកាសផ្តល់ជំនួយនេះ ត្រូវបានធ្វើឡើងក្នុងពិធីចុះហត្ថលេខាលើកិច្ចព្រមព្រៀងរវាងរដ្ឋលេខាធិការដ្ឋានអាកាសចរស៊ីវិល ឯកឧត្តម ម៉ៅ ហាវណ្ណាល់ រួមជាមួយលោក Damien CAZE អគ្គនាយកនៃអាជ្ញាធរអាកាសរចរណ៍ស៊ីវិលបារាំង (DGAC) និងលោកស្រី Ophélie BOURHIS នាយកទីភ្នាក់ងារបារាំងសម្រាប់ការអភិវឌ្ឍ (AFD) កាលថ្ងៃទី២ ខែវិច្ឆិកា ឆ្នាំ២០២១ កន្លងទៅ។

ជំនួយឥតសំណងនេះ នឹងប្រើប្រាស់ដើម្បីលើកកម្ពស់ប្រព័ន្ធសុវត្ថិភាព និងបរិស្ថានអាកាសយានដ្ឋាននៅកម្ពុជា ទិសដៅបង្កើនភាពទាក់ទាញ អ្នកទេសចរតាមផ្លូវអាកាស។

គម្រោងនេះផ្តោតលើការងារអាទិភាពចំនួន៤ រួមមាន ការពង្រឹងប្រព័ន្ធគ្រប់គ្រងបរិស្ថានអាកាសយានដ្ឋាន ការបណ្តុះបណ្តាលសមត្ថភាពលើការថែទាំបច្ចេកទេសអាកាសយានដ្ឋាន ការបណ្តុះបណ្តាលសមត្ថភាពពេទ្យអាកាសចរ និងការពង្រឹងសុវត្ថិភាពអាកាសយានដ្ឋាន។

ថ្លែងក្នុងឱកាសនេះ ឯកឧត្តម ម៉ៅ ហាវណ្ណាល់ បានវាយតម្លៃថា ជំនួយឥតសំណងនេះ ពិតជាឆ្លើយតបសេចក្តីត្រូវការ និងការងារជាអាទិភាពនៃរដ្ឋលេខាធិការដ្ឋានអាកាសចរស៊ីវិល។

គួរបញ្ជាក់ថា គិតចាប់តាំងពីឆ្នាំ១៩៩៩ រដ្ឋលេខាធិការដ្ឋានអាកាសចរស៊ីវិលកម្ពុជា និងអាជ្ញាធរអាកាសចរស៊ីវិលបារាំង បានជួយអនុវត្តគម្រោងផ្សេងៗជាច្រើនដូចជា គម្រោងកសាងសមត្ថភាពដល់មន្រ្តីបច្ចេកទេស ជួយរៀបចំបទប្បញ្ញត្តិបច្ចេកទេស និងឯកសារណែនាំអាកាសចរស៊ីវិល ក៏ដូចជាការជួយសិក្សា និងវិភាគលើផលប៉ះពាល់សេដ្ឋកិច្ចលើវិស័យដឹកជញ្ជូនតាមផ្លូវអាកាសកម្ពុជាផងដែរ៕

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• Road and Infrastructure
• Projects Development
• គម្រោងអភិវឌ្ឍន៍