ប្រភេទអាផាតមិនដែលមានបន្ទប់គេងតែមួយបានទាញយកចំណែកទីផ្សារខ្លាំងជាងគេក្នុងឆ្នាំ 2018

• 19 ខែ​ធ្នូ 2018
• ព័ត៌មានអចលនទ្រព្យ
• 10 មើល

រូបភាពដោយ Apartment List

ទីផ្សារជួលអាផាតមិនបាននិងកំពុងក្លាយជាផ្នែកមួយដ៏សំខាន់ក្នុងវិស័យអចលនទ្រព្យហើយក្នុងនោះប្រភេទអាផាតមិនដែលត្រូវបានផ្គត់ផ្គង់ច្រើនជាងគេគិតត្រឹមត្រីមាសទី៤ឆ្នាំ២០១៨នេះគឺជាអាផាតមិនដែលមានបន្ទប់គេងតែមួយ។

យោងតាមរបាយការណ៍របស់ក្រុមហ៊ុនវាយតម្លៃអចលនទ្រព្យដ៏ធំមួយនៅកម្ពុជា VTrust Appraisal Cambodiaប្រភេទអាផាតមិនដែលមានបន្ទប់គេងតែមួយបានទាញយកចំណែកនៃទីផ្សារផ្គត់ផ្គង់រហូតដល់ទៅ ៥៥ ភាគរយដែលនេះគឺស្មើទៅនឹងចំនួនបន្ទប់ប្រមាណជា ៤.៩៥៦ យូនីតនៃអាផាតមិនសម្រាប់ជួលប្រមាណជា ៩.០២១ យូនីតដែលមានក្នុងទីផ្សារ។

ថ្លែងក្នុងកម្មវិធីសម្ពោធបឋមនៃរបាយការណ៍ខាងលើ លោក ហ៊ឹម សីហា នាយកផ្នែកស្រាវជ្រាវរបស់ក្រុមហ៊ុនVTrustបានឲ្យដឹងថាទីផ្សារអាផាតមិនដែលមានបន្ទប់គេងតែមួយគឺល្អដោយសារតែប្រភេទទីផ្សារអាផាតមិននេះគឺទទួលបានការជួលច្រើនបើប្រៀបធៀបទៅនឹងអាផាតមិនដែលមានបន្ទប់គេងពីរឬបី។

ជាងនេះទៅទៀត តាមរយៈការធ្វើបទបង្ហាញរបស់លោកដដែលបានឲ្យដឹងថាអាផាតមិនដែលមានបន្ទប់គេងតែមួយមានការកើនឡើងច្រើននោះគឺដោយសារអ្នកដែលមកស្នាក់នៅគឺភាគច្រើនជាជនបរទេសដែលមកតែម្នាក់ឯងអញ្ចឹងហើយទើបគាត់ជ្រើសរើសប្រភេទបន្ទប់គេងតែមួយប៉ុណ្ណោះ។ ម្យ៉ាងវិញទៀតការផ្គត់ផ្គង់អាផាតមិនបន្ទប់គេងតែមួយគឺមានតម្លៃសមរម្យជាងប្រភេទអាផាតមិនផ្សេងៗទៀត។

សម្រាប់តម្លៃជួលវិញ អាផាតមិនដែលមានបន្ទប់គេងតែមួយគឺមានតម្លៃជួលជាមធ្យមប្រមាណ ជា ៦៣០ ដុល្លារអាមេរិកក្នុងមួយខែដែលក្នុងនោះអាផាតមិនដែលមានទីតាំងក្នុងខណ្ឌដូនពេញជាដើមអាចដាក់ជួលក្នុងតម្លៃរហូតដល់ទៅ ១២០០ ដុល្លារអាមេរិកក្នុងមួយខែឬស្មើទៅនឹង១៦ដុល្លារដុល្លារអាមេរិកក្នុងមួយម៉ែត្រការ៉េ។

ដោយឡែកអាផាតមិនដែលមានបន្ទប់គេងពីរមានចំណែក ៣៤ ភាគ (៣.០៩៨យូនីត) អាផាតមិនប្រភេទផ្សេងទៀត ៦ ភាគរយ (៥២៩ យូនីត) អាផាតមិនបន្ទប់គេងបី ៤ ភាគរយ (៣៤៩យូនីត) និងអាផាតមិនប្រភេទជាន់លើដែលមានកន្លែងអង្គុយលេងpenthouse១ ភាគរយ (៧៩យូនីត) ។

• អត្ថបទវិភាគ
• អត្ថបទវិភាគ