ភ្នាក់ងារអចលនទ្រព្យ និងក្រុមហ៊ុនហិរញ្ញវត្ថុ ចាប់ដៃគ្នាបង្កើតប្រព័ន្ធវាយតម្លៃអចលនទ្រព្យ និងពិនិត្យកម្ចីរួមគ្នា

• 28 ខែ​ឧសភា 2021
• ព័ត៌មានអចលនទ្រព្យ
• 11 មើល

ភ្នាក់ងារអចលនទ្រព្យល្បីនៅកម្ពុជា Vtrust Appraisal និងក្រុមហ៊ុនជំនាញត្រួតពិនិត្យឥណទាន Credit Bureau Cambodia (CBC) សម្រេចតភ្ជាប់ប្រព័ន្ធវាយតម្លៃអចលនទ្រព្យ និងប្រព័ន្ធវាយតម្លៃឥណទានចូលគ្នា ដើម្បីបង្កើតជាបណ្ដាញឌីជីផលគ្រប់ជ្រុងជ្រោយមួយ ក្នុងប្រតិបតិ្តការទិញលក់ និងសុំកម្ចីអចលនទ្រព្យ។

បើយោងតាម Z1 News ក្រុមហ៊ុនទាំងពីរ បានចុះហត្ថលេខាលើ MoU កាលពីថ្ងៃ ២៧ ខែឧសភា កន្លងទៅនេះ តាមប្រព័ន្ធ Zoom ក្រោមវត្តមានរបស់ដោយលោក វង្ស សុខាល ប្រធានក្រុមប្រឹក្សាភិបាល ក្រុមហ៊ុន Vtrust Appraisal និងលោក អឿ សុធារ័ត្ន នាយកប្រតិបត្តិក្រុមហ៊ុន CBC។

លោក វង្ស សុខាល បានឱ្យដឹងថា៖ «ប្រព័ន្ធវាយតម្លៃអចលនទ្រព្យ ឬ Indication Plus Platform របស់ក្រុមហ៊ុន Vtrust Appraisal គឺជាសេវាកម្មទំនើបបែបឌីជីថល ដែលអាចវិភាគ និងចេញជារបាយការណ៍វាយតម្លៃអចលនទ្រព្យសង្ខេប និងពេញលេញដោយស្វ័យប្រវត្តិ»។

ជាទូទៅ មុននឹងធនាគារសម្រេចថានឹងផ្ដល់កម្ចីប៉ុន្មានដល់អ្នកខ្ចីណាម្នាក់ ធនាគារត្រូវយកអចលនទ្រព្យធានាទៅវាយតម្លៃសិន ដែលត្រូវធ្វើឡើងដោយក្រុមហ៊ុនវាយតម្លៃ ដែលអាចប្រើពេលយូរ។ ប៉ុន្តែ កិច្ចសហការច្របាច់ប្រព័ន្ធចូលគ្នានេះ នឹងជួយឱ្យស្ថាប័នហិរញ្ញវត្ថុទាំងអស់នៅកម្ពុជា អាចចូលមកប្រើប្រាស់ប្រព័ន្ធវាយតម្លៃអចលនទ្រព្យអនឡាញបានដោយងាយស្រួល និងឆាប់រហ័ស។ ពោលគឺមិនចាំបាច់ ទៅដើររកក្រុមហ៊ុនវាយតម្លៃអចលនទ្រព្យដោយផ្ទាល់ដូចពេលមុនៗទេ។

លោក អឿ សុធារ័ត្ន នាយកប្រតិបត្តិក្រុមហ៊ុន CBC បានមានប្រសាសន៍ថា៖ «ជាង ៥០% នៃឥណទានដែលបានបញ្ចេញលើទីផ្សារ គឺជាឥណទានដែលមានការធានាដោយមានទ្រព្យបញ្ចាំ ដែលភាគច្រើនជាដីធ្លី និងផ្ទះសម្បែង។ ប្រតិបត្តិការនេះមានប្រមាណពី ១៥០ ០០០ ទៅ ២០០ ០០០ ប្រតិបត្តិការ ក្នុងមួយខែ»។

លោកបន្តថា៖ «ដូច្នេះ ការសហការប្រើប្រព័ន្ធរួមគ្នាជាមួយក្រុមហ៊ុនអ្នកវាយតម្លៃនេះ ជាដំណោះស្រាយយ៉ាងឈ្លាសវៃមួយ ដែលនឹងអាចផ្លាស់ប្តូរនូវរបៀបការវាយតម្លៃអចលនទ្រព្យរបស់ធនាគារសព្វថ្ងៃឱ្យកាន់តែមានប្រសិទ្ធភាពជាងមុន»។

• ធុរកិច្ច និងទីផ្សារ
• ធុរកិច្ច និងទីផ្សារ