រដ្ឋប្រកាសចាត់វិធានការធ្ងន់លើអ្នកលុបសមុទ្រយកដី នៅខេត្តចំនួន ២ នៅកម្ពុជា

17 ខែមីនា 2021
Uncategorized @km
9 មើល

រដ្ឋបាលខេត្តព្រះសីហនុ និងរដ្ឋបាលខេត្តកោះកុង ប្រកាសចាត់វិធានការក្ដៅ ក្រោយមានករណីលុបសមុទ្រ និងដីព្រែក ដើម្បីយកដីមកប្រើប្រាស់ផ្ទាល់ខ្លួន ដោយគ្មានការអនុញ្ញាត កាលពីពេលថ្មីៗនេះ។

រដ្ឋបាលខេត្តព្រះសីហនុ កាលពីថ្ងៃទី ១៥ មីនា កន្លងទៅ បានចេញលិខិតស្ដីអំពីការចាក់ដីចូលឆ្នេរសមុទ្រ នៅចំណុចទីតាំងមុខក្រុមហ៊ុនកម្ពុជាតេលា ស្ថិតនៅភូមិ ៤ ឃុំអូរត្រេះ ស្រុកស្ទឹងហាវ ដោយគ្មានការអនុញ្ញាត។

លិខិតដដែលនេះ ក៏បានស្នើឱ្យបុគ្គល ដែលជាអ្នកចាក់ដីចូលសមុទ្រ នៅទីតាំងខាងលើ កាយចេញវិញជាបន្ទាន់ និងចេញមុខមកដោះស្រាយជាមួយរដ្ឋបាលស្រុក ពុំនោះទេ រដ្ឋបាលស្រុកនឹងចាត់វិធានការកាយដីនេះចេញ និងបន្តស្វែងរកអ្នកដែលបានចាក់ដីចូលឆ្នេរសមុទ្រនេះ មកទទួលទោសតាមផ្លូវច្បាប់។

ដោយឡែក នៅថ្ងៃដដែលនេះ ឣភិបាលស្រុកមណ្ឌលសីមា លោក ប្រាក់ វិចិត្រ ក៏បានដឹកនាំក្រុមការងារ និងមន្ត្រីពាក់ព័ន្ធ ដើម្បីចុះពិនិត្យការចាក់អាចម៍ដីចូលចំណីព្រែកសាធារណ: ដែលស្ថិតនៅភូមិទួលគគីរក្រោម ស្រុកមណ្ឌលសីមា ផងដែរ។

លោក សុខ សុធី អភិបាលរងខេត្តកោះកុង បានប្រាប់កាសែតភ្នំពេញប៉ុស្ដិ៍ថា លោកកំពុងចាត់ឱ្យមន្ត្រីពាក់ព័ន្ធស្វែងរកបុគ្គល ដែលបានលុបដីព្រែក និងកំពុងវាស់វែងទំហំនៃការលុបយកចំណីព្រែក ដើម្បីធ្វើរបាយការណ៍ ឬអនុវត្តទៅតាមបទប្បញ្ញត្តិជាធរមានផងដែរ។

ប្រភពដដែលបានឱ្យដឹងទៀតថា បច្ចុប្បន្នរដ្ឋបាលខេត្ត បានបញ្ចប់សកម្មភាពលុបយកដីហើយ និងរងចាំវិធានការបន្ទាប់។