លិខិតអនុញ្ញាតអាជីវកម្មអចលនវត្ថុ មាន ២ប្រភេទធំៗ ពេលទិញត្រូវសុំមើលលិខិតអនុញ្ញាតប្រភេទមួយណា?

• 13 ខែ​មេសា 2021
• Uncategorized
• 11 មើល

រាល់ការធ្វើអាជីវកម្មអភិវឌ្ឍដីឡូតី៍ ខុនដូ អគារការិយាល័យ អគារផ្សារ និងលំនៅឋាននានា ក្នុងគោលបំណងសម្រាប់ការលក់ ឬជួលរយៈពេលវែង ត្រូវមានអាជ្ញាបណ្ណពីក្រសួង ឬលិខិតអនុញ្ញាតពីមន្ទីរជាមុនសិន។

បើយោងតាមប្រកាសលេខ ០៨៩ សហវ.ប្រក ចុះថ្ងៃទី ២០ ខែមករា ឆ្នាំ២០២០ ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ អាជ្ញាបណ្ណ និងលិខិតអនុញ្ញាតអាជីវកម្មនេះទៀតសោត ចែកចេញជា ២ ប្រភេទធំៗគឺ៖

១) អាជ្ញាបណ្ណ ឬលិខិតអនុញ្ញាតប្រភេទទី១ សម្រាប់ផ្តល់ជូនបុគ្គល ឬក្រុមហ៊ុនណា ដែលសាងសង់គម្រោងចប់ជាស្ថាពរ ទើបប្រកាសលក់តាមក្រោយ។

២) អាជ្ញាបណ្ណ ឬលិខិតអនុញ្ញាតប្រភេទទី២ សម្រាប់ផ្តល់ជូនបុគ្គល ឬក្រុមហ៊ុនណា ដែលសាងសង់គម្រោងបណ្តើរ និងប្រកាសលក់បណ្តើរ។

សម្រាប់ប្រភេទទី ១ ច្បាប់មិនសូវគ្រប់គ្រងតឹងរឹងប៉ុន្មានទេ ព្រោះមានហានិភ័យទាប ដោយសារច្បាប់ៗបានហាមដាច់ខាតមិនឱ្យដាក់លក់មុនសំណង់ចប់នោះឡើយ។ ភាគច្រើន គម្រោងប្រភេទនេះ ការសាងសង់អាចធ្វើឡើងដោយប្រើទុនរបស់អ្នកអភិវឌ្ឍផ្ទាល់ ឬកម្ចីពីធនាគារ ។

ដោយឡែក សម្រាប់ប្រភេទទី ២ ច្បាប់តម្រូវឱ្យមានលក្ខខណ្ឌ និងបទបញ្ញត្តិតឹងរឹង ព្រោះសាងសង់បណ្ដើរលក់បណ្ដើរ។ គម្រោងទាំងនេះ ភាគច្រើនប្រើទុនដែលជាកម្ចី និងចំណូលពីការលក់មកសាងសង់។

លើសពីនេះ សម្រាប់ប្រភេទទី ២ នេះ ច្បាប់តម្រូវឱ្យម្ចាស់គម្រោងបើកបញ្ជីធនាគារដែលចុះបញ្ជីត្រឹមត្រូវ មានទុនបម្រុងក្នុងការចុះបញ្ជីក្រុមហ៊ុនយ៉ាងហោច ២០% នៃតម្លៃសាងសង់ ហើយត្រូវដាក់ប្រាក់តម្កល់ ២% នៃតម្លៃសាងសង់។

ដូច្នេះ ក្នុងនាមជាអ្នកទិញ ពិសេសសម្រាប់គម្រោងដែលមិនទាន់សាងសង់ ត្រូវសុំមើលលិខិតអនុញ្ញាតថាតើជាលិខិតអនុញ្ញាតប្រភេទទី ២ ពិតឬណាយ៉ាង ដើម្បីការពារបញ្ហាដែលអាចកើតមានឡើង។

សម្រាប់ខ្លឹមសារលម្អិត ទាក់ទិននឹងលិខិតអនុញ្ញាតអាជីវកម្មអចលនវត្ថុ សូមអានបន្ថែម។

• ច្បាប់ និងបញ្ញាត្តិ
• Laws and Regulation
• ច្បាប់ និងបញ្ញាត្តិ