វិភាគ៖ តើអនាគតដីឡូតិ៍នឹងក្លាយជាសំណង់អនាធិបតេយ្យឬយ៉ាងណា? ដោះស្រាយដូចម្ដេច?

• 7 ខែ​មិថុនា 2021
• ព័ត៌មានអចលនទ្រព្យ
• 8 មើល

អ្នកទិញដីឡូតិ៍ម្នាក់ដែលសុំហៅត្រឹមឈ្មោះ ដា អាយុ ៣២ ឆ្នាំ ជាកម្មកររោងចក្រ បានប្រាប់ទស្សនាវដ្ដីសំណង់ និងអចលនទ្រព្យថា កញ្ញាសម្រេចចិត្តទិញដីឡូតិ៍នៅម្ដុំផ្លូវជាតិលេខ ៥ ជិតឧត្ដុង ព្រោះតម្លៃទាប អាចបង់រំលោះបាន ហើយសង្ឃឹមថាថ្ងៃក្រោយទៅអាចចំណេញខ្លះ ឬទៅសង់ផ្ទះនៅទីនោះ។

កញ្ញាថា៖ «បារម្ភដែរថា ទៅអនាគតទៅ ដីឡូតិ៍នឹងក្លាយជាតំបន់អនាធិបតេយ្យ ព្រោះអ្នកណាចង់សង់អីក៏បាន ហើយគ្មានអ្នកមកគ្រប់គ្រងដូចបូរីធំៗទេ។ ប៉ុន្តែធ្វើម៉េចយើងមានលុយតិច គឺទិញតាមហ្នឹងទៅ»។

«ប៉ុន្តែអ្វីដែលត្រូវគិតពេលនេះ គឺឥឡូវមិនសូវមានចំណូល យ៉ាប់ដែរ ខុំខ្វះបង់គេ ១-២ ខែ គេចេះតែបន្ធូរបន្ថយឱ្យ តែបើយូរជាងហ្នឹងគេមិនជួយទៀតទេ មិនដឹងថាគេរឹបអូសដីវិញ ឬក៏យ៉ាងម៉េញ»។

អាជីវកម្មដីឡូតិ៍អាចនឹងក្លាយជា តំបន់អនាធិបតេយ្យទៅអនាគត បើខ្វះច្បាប់គ្រប់គ្រង

ជាក់ស្ដែង អាជីវកម្មដីពុះដីឡូតិ៍លក់ បានមានសន្ទុះយ៉ាងខ្លាំងនៅកម្ពុជាក្នុងប៉ុន្មានឆ្នាំចុងក្រោយនេះ ដោយសារតម្លៃដីគឺទាបដែលសាកសម្យនឹងប្រជាជនភាគច្រើនដែលមានចំណូលមធ្យម និងក្រោមមធ្យម។ ប៉ុន្តែ សន្ទុះនេះក៏នាំមកនូវបញ្ហាផងដែរ។
អ្នកជំនាញមួយចំនួនបារម្ភថា ដោយសារបញ្ហាទំហំដីឡូតិ៍ដែលពុះលក់គឺតូច (ភាគច្រើន ៥x២០) បញ្ហាខ្វះហេដ្ឋារចនាសម្ព័ន្ធផ្លូវ ទឹក ភ្លើង និងពិសេសបញ្ហាកង្វះខាតការគ្រប់គ្រង ទៅអនាគត ដីឡូតិ៍នានាអាចនឹងក្លាយជាសំណង់អនាធិបតេយ្យខ្វះរបៀបរៀបរយ។

លើសពីនេះ តម្លៃដីឡូតិ៍ភាគច្រើនគឺទាបក៏ពិតមែន ប៉ុន្តែឱកាសឡើងថ្លៃគឺតិចតួចបំផុត។ ក្នុងអំឡុងពេលកូវីដដូច្នេះ បញ្ហាឃើញថារឹតតែធ្ងន់ធ្ងរ ដោយអ្នកទិញភាគច្រើនជាអ្នកមានកម្រិតជីវភាពមធ្យមចុះក្រោម ដូចជាបុគ្គលិកឬកម្មកររោងចក្រ អាជីវករតាមផ្ទះ អ្នករត់ម៉ូតូឌុប និងតុតុជាដើម បាននិងកំពុងបាត់បង់ចំណូល បង្កឱ្យមានផលប៉ះពាល់ខ្លាំងដល់ការបង់រំលស់របស់ពួកគាត់ផងដែរ។

លោក លឹម សុជាតិ ប្រធានក្រុមប្រឹក្សាភិបាលនៃសមាគម CVEA និងជាអគ្គនាយកក្រុមហ៊ុន Realtor 168 C., Ltd បានឱ្យដឹងថា៖ «ដីទំហំ ៥ x ២០ គឺតូច ពិបាកសង់អ្វីធំដំណាស់ ហើយដីឡូតិ៍ខ្លះដែលនៅឆ្ងាយពីក្រុង គឺខ្វះហេដ្ឋារចនាសម្ព័ន្ធ។ ជាមួយនឹងជីវភាពមានកម្រិតរបស់អ្នកទិញ បូកនឹងកង្វះការគ្រប់គ្រង ការសង់ផ្ទះទៅពេលអនាគតនឹងគ្មានរបៀបរៀបរយ។ លើសពីនេះ បើទិញទុកចំណេញ គឺមានឱកាសតិចណាស់ ព្រោះភ្នាក់ងារលក់បានដំឡើងតម្លៃដីរួចហើយ មុននឹងលក់ដើម្បីចំណេញ»។

អ្នកទិញដីឡូតិ៍ជាជនរងគ្រោះឬយ៉ាង?

អ្នកទិញដីឡូតិ៍ម្នាក់ទៀតឈ្មោះហៅក្រៅ ចែនី ដែលជាអាជីវករ ទិញដីឡូតិ៍នៅភាគខាងត្បូងនៃជាយក្រុងភ្នំពេញ បានឱ្យដឹងថា៖ «ពួកអ្នកទិញដូចយើងជាជនរងគ្រោះឬយ៉ាងណា ខ្ញុំមិនដឹងទេ ប៉ុន្តែស្ថានភាពបច្ចុប្បន្នគឺពិបាកដែរ។ កូវីដ រកលុយបានមិនបាន តែចេះតែព្យាយាមរកលុយទៅបង់ឱ្យគេទៅ កុំឱ្យមានបញ្ហា»។

ចែនី បានបន្តថា៖ «សម្រាប់ទៅអនាគត ដីឡូតិ៍ខ្វះការគ្រប់គ្រង ឬក្លាយជាតំបន់អនាធិបតេយ្យយ៉ាងមិញ ចាំដល់ពេលហ្នឹងចាំគិតទៀត»។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោក ច្រឹក សុខនីម ក៏បានសម្ដែងក្ដីបារម្ភលើបញ្ហានេះដែរ ប៉ុន្តែបើសួរថា អ្នកទិញជាជនរងគ្រោះឬយ៉ាង ចម្លើយគឺអាស្រ័យលើដីនីមួយៗ ហើយអាស្រ័យលើច្រើនកត្តា។

«យើងត្រូវទទួលស្គាល់ការពិតថា ដីឡូតិ៍ភាគច្រើនគឺលក់ក្នុងតម្លៃទាប ដូច្នេះគុណភាព ហេដ្ឋារចនាសម្ព័ន្ធ និងការគ្រប់គ្រង ក៏ទាបទៅតាមហ្នឹងដែរ។ យើងពិបាកបន្ទោសម្ចាស់អាជីវកម្មលក់ដីណាស់ ព្រោះដីតម្លៃទាប ហើយឱ្យគាត់មករៀបចំឱ្យមានសណ្ដាប់ធ្នាប់ដូចក្នុងបូរីធំៗក៏ពិបាកដែរ។ បើគាត់រៀបចំល្អ តម្លៃត្រូវខ្ពស់ គាត់ក៏ពិបាកលក់»។

«បញ្ហានេះកើតចេញពីចំណូលរបស់ប្រជាជន។ ដូច្នេះដំណោះស្រាយ ត្រូវប្រើពេលយូរ និយាយជារួម ត្រូវរង់ចាំឱ្យជីវភាពប្រជាជនយើងប្រសើរឡើង ទើបអស់បញ្ហាដីឡូតិ៍គ្មានសណ្ដាប់ធ្នាប់ ព្រោះពួកគាត់នឹងទៅទិញដីល្អៗ»។

ដំណោះស្រាយបណ្ដោះអាសន្ន៖ រដ្ឋនិងឯកជនគួរសហការគ្នាពង្រឹងការគ្រប់គ្រង

អ្នកទិញដីឡូតិ៍ម្នាក់ទៀតនៅម្ដុំភ្នំប្រសិត ឈ្មោះកញ្ញា ណាណា បានឱ្យដឹងថា៖ «ចង់ឱ្យរដ្ឋ និងខាងឯកជនជួយដែរ។ ចំពោះមុខ ចង់ឱ្យជួយបន្ធូរបន្ថយការបង់រំលស់សិនទៅ នេះជាបញ្ហាសំខាន់»។

«ប៉ុន្តែ ទៅអនាគតបើទៅរួច គឺចង់ឱ្យខាងម្ចាស់ដី ជួយសម្រួលឱ្យមានជាហេដ្ឋារចនាសម្ព័ន្ធ ផ្លូវចេញចូល និងទឹកភ្លើងត្រឹមត្រូវ។ ហើយខាងរដ្ឋវិញ ចង់ឱ្យជួយកំណត់ច្បាប់ផង កុំឱ្យម្ចាស់ដី លក់ដីអស់ទៅបាត់ មិនទទួលខុសត្រូវ»។

បើតាមប្រធានក្រុមប្រឹក្សាភិបាលនៃសមាគម CVEA លោក លឹម សុជាតិ បញ្ហាដីឡូតិ៍គឺជាបញ្ហាដែលទាំងរដ្ឋ និងឯកជន ត្រូវចូលរួមគ្នាដោះស្រាយ ។

«កន្លងមក ឃើញថារដ្ឋាភិបាលបានចាប់ផ្ដើមចេញបទបញ្ញត្តិនានាជាបន្តបន្ទាប់ហើយ ទៅអនាគត សង្ឈឹមថារដ្ឋនឹងចេញច្បាប់ដាក់កំហិតឱ្យមានការរៀបចំសណ្ដាប់ធ្នាប់សំណង់លើដីឡូតិ៍បន្ថែមទៀត»។

លោក សុជាតិ ពន្យល់ទៀត សម្រាប់ក្រុមហ៊ុនអ្នករកស៊ីដីឡូតិ៍វិញ បើទៅរួច អាចបង្វែពីការពុះត្រឹមតែដីលក់ មកបង្កើតជាផ្ទះ រួមនឹងហេដ្ឋារចនាសម្ព័ន្ធទឹកភ្លើង ហើយលក់ក្នុងតម្លៃសមរម្យវិញ ដូចជាក្រោម ១០ ០០០ ដុល្លារ ជាដើម។ ចំណុចនេះ អាចនឹងជួយឱ្យសំណង់នៅលើដី មានរបៀបជាងមុន។

ប៉ុន្តែក្នុងរយៈពេលខ្លី បើរដ្ឋមិនទាន់មានច្បាប់កំណត់ឱ្យម្ចាស់អាជីវកម្មលក់ដីឡូតិ៍គ្រប់គ្រងលើរឿងហេដ្ឋារចនាសម្ព័ន្ធ និងប្លង់មេគម្រោងដីឡូតិ៍ឱ្យបានល្អទេ ប្រធានសមាគម CVEA លោក ច្រឹក សុខនីម ថាការបែងចែកតំបន់គឺជាដំណោះស្រាយបណ្ដោះអាសន្ន។

«ការបែងចែកតំបន់នេះមានន័យថា ដើម្បីរក្សាសោភ័ណភាពទីក្រុង រដ្ឋគួរកំណត់ដីឡូតិ៍ស្ថិតឱ្យនៅផ្នែកណាមួយជុំគ្នានៅជាយទីក្រុង (បែងចែកជាzone)។ ទោះទៅអនាគត សំណង់លើដីនោះគ្មានសណ្ដាប់ធ្នាប់ក៏ពិតមែន តែងាយស្រួលដោះស្រាយទៅពេលអនាគត ព្រោះនៅជុំគ្នា»។

លើសពីនេះ លោក ច្រឹក សុខនីម ក៏បានស្នើគំនិតមួយទៀតគឺពង្រីកទំហំពុះដីឡូតិ៍ឱ្យធំជាង ៥ x ២០។

«ដីឡូតិ៍ទិញហើយ ពិបាកចំណេញដោយសារតែតូចពេក។ ដូច្នេះ ដំណោះស្រាយ អ្នកប្រកបអាជីវកម្មដីឡូតិ៍គួរប្តូរពី ៥ x ២០ ទៅ ១០ x ២០ ឬ ២០ x ៣០។ ការធ្វើបែបនេះ ដីនឹងមានសក្ដានុពលជាងមុន ព្រោះអាចលក់ទៅឱ្យអ្នកវិនិយោគដើម្បីបន្លែងជាទីតាំងពាណិជ្ជកម្មបាន»។

«តម្លៃថ្លៃក៏ពិតមែន ពិបាករកអ្នកទិញក៏ពិតមែន ប៉ុន្តែអ្នកប្រកបអាជីវកម្មដីឡូតិ៍ គួរតែបង្ខំចិត្តធ្វើបែបនេះ ដើម្បីជួយដល់អ្នកទិញឱ្យមានឱកាសចំណេញ។ ការធ្វើបែបនេះ គេហៅថាអាជីវកម្មបែបមាននិរន្តរភាព ចំណេញច្រើនជំនាន់»។

ជាសរុប អ្នកទិញដីឡូតិ៍ អាចរងនឹងហានិភ័យរស់នៅក្នុងតំបន់អនាធិបតេយ្យក៏ពិតមែន នៅពេលអនាគត ប៉ុន្តែនេះជាការពិតតែត្រូវតែទទួលស្គាល់ ឬហៅម្យ៉ាងទៀតថារស់តាមជីវភាព។

ប៉ុន្តែ ទៅអនាគត ទាំងរដ្ឋាភិបាលក្ដី និងឯកជនក្ដីត្រូវតែរួមគ្នាដោះស្រាយ ចាប់ផ្ដើមពីការរៀបចំបែងចែកតំបន់លក់ដីឡូត៍ឱ្យបានត្រឹមត្រូវ ចេញច្បាប់រឹតបន្តឹងឱ្យម្ចាស់ដីឡូតិ៍មានការទទួលខុសត្រូវលើហេដ្ឋារចនាសម្ព័ន្ធ ច្បាប់គ្រប់គ្រង់សំណង់លើដីឡូតិ៍ ការកែប្រែដីឡូតិ៍ទៅជាលំនៅដ្ឋានតម្លៃសមរម្យ ក៏ដូចជាការពុះដីឡូតិ៍ឱ្យធំជាងមុនដើម្បីបង្កើនឱកាសចំណេញដល់អ្នកទិញ ជាដើម។

ទោះជាយ៉ាងណា បញ្ហានេះជាចុងក្រោយ គឺស្ថិតនៅលើចំណូលរបស់ប្រជាពលរដ្ឋ ព្រោះបើជីវភាពពួកគាត់ប្រសើរឡើង គ្មាននរណាម្នាក់ចង់រស់នៅក្នុងតំបន់អនាធិបតេយ្យនោះទេ។

• អត្ថបទវិភាគ
• ចំណេះដឹង និង បទពិសោធន៍
• នគរូបនីយកម្ម និងស្ថាបត្យកម្ម
• អត្ថបទវិភាគ
• ចំណេះដឹង និង បទពិសោធន៍