សណ្ឋាគារលំដាប់ផ្កាយ ៥ The Royal Sands Koh Rong បើកដំណើរការជាផ្លូវការ

• 23 ខែ​មេសា 2018
• ព័ត៌មានអចលនទ្រព្យ
• 9 មើល

នៅព្រឹកថ្ងៃទី២៣ ខែមេសា ឆ្នាំ២០១៨ សម្តេចនាយករដ្ឋមន្ត្រី ហ៊ុន សែន បានអញ្ជើញជាអធិបតីភាពដ៏ខ្ពង់ខ្ពស់ក្នុងការសម្ពោធសណ្ឋាគារ The Royal Sands Koh Rong ដែលជាសណ្ឋាគារលំដាប់ផ្កាយ ៥ ដំបូងបង្អស់ដែលស្ថិតនៅលើកោះរុង។

សណ្ឋាគារដ៏ទំនើបនេះមានទីតាំងស្ថិតនៅភូមិសុខសាន្ដ សង្កាត់កោះរ៉ុង និងត្រូវបានចំណាយទឹកប្រាក់សាងសង់អស់ប្រមាណជាង៤០លានដុល្លារ។ ក្នុងដំណាក់កាលទី១នេះ សណ្ឋាគារមានវីឡាសរុបចំនួន៦៧ខ្នង(ឬ ស្មើនឹង១៤៨បន្ទប់) ដែលវីឡានីមួយៗមានអាងហែលទឹកចំនួន១ផងដែរ។

ការបើកអោយដំណើរការសណ្ឋាគារលំដាប់ផ្កាយ ៥ មួយនេះ ជាការបង្ហាញអោយឃើញពីសក្ដានុពលទេសចរណ៍របស់ប្រទេសកម្ពុជា និងការរីកចម្រើននៃសេវាកម្មទេសចរណ៍លំដាប់អន្តរជាតិនៅលើទឹកដីប៉ែកនិរតី នៃតំបន់សមុទ្រជាពិសេសគឺខេត្តព្រះសីហនុ។

សម្តេចនាយករដ្ឋមន្ត្រី ហ៊ុន សែន បានសំដែងសេចក្តីរីករាយ ដែលបានអញ្ជើញមកកាន់កោះរុងជាលើកទី១នេះ និងមោទនភាពចំពោះការវិនិយោគសណ្ឋាគារលំដាប់ផ្កាយ៥ដើម្បីបំពេញសេចក្តីត្រូវការ និងទាក់ទាញភ្ញៀវទេសចរណ៍ជាតិ និងអន្តរជាតិ។

លើសពីនេះ សម្តេចក៏បានថ្លែងអំណរគុណចំពោះ ក្រុមហ៊ុន អ្នកឧកញ៉ា គិត ម៉េង ដែលបានសហការជាមួយដៃគូបរទេសចូលរួមអភិវឌ្ឍន៍កោះរុងអោយមានសោភ័ណភាព និងទាក់ទាញទេសចរកាន់តែច្រើនឡើង។ សម្តេចតេជោ ក៏បានជូនពរបងប្អូនប្រជាពលរដ្ឋនៅទីនេះ សូមជួបប្រទះតែសេចក្តីសុខចម្រើនគ្រប់ៗគ្នា។

• គម្រោងអភិវឌ្ឍន៍
• ធុរកិច្ច និងទីផ្សារ
• គម្រោងអភិវឌ្ឍន៍
• ធុរកិច្ច និងទីផ្សារ