សមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា បង្ហាញនូវចក្ខុវិស័យក្នុងអាណត្ត

• 1 ខែ​កុម្ភៈ 2017
• ព័ត៌មានអចលនទ្រព្យ
• 9 មើល

បន្ទាប់ពីត្រូវបានតែងតាំងជាប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា(CVEA) សម្រាប់អាណត្តិទី ២ របស់ខ្លួននៅឆ្នាំ ២០១៧-២០១៨ លោក គីម ហ៊ាង បានបង្ហាញនូវចក្ខុវិស័យប្រកបដោយមហិច្ឆតារបស់សមាគមនៅក្នុងបទសម្ភាសមួយជាមួយទស្សនាវដ្តីសំណង់ និងអចលនទ្រព្យ។

ការបោះឆ្នោតជ្រើសរើសប្រធាន CVEA គឺមានភាពតានតឹង ដោយមានសម្លេងឆ្នោតខុសគ្នាត្រឹមតែ ១ សម្លេងក្នុងលទ្ធផល ២៧ ទល់នឹង ២៨។ តើលោកមានការព្រួយបារម្ភចំពោះការបែងចែកសម្លេងឆ្នោតនេះទេ? តើលោកមានផែនការបែបណាដើម្បីធ្វើឲ្យប្រសើរឡើងនូវសាមគ្គីភាព និងភាពជាដៃគូក្នុងចំណោមសមាជិក CVEAដើម្បីធ្វើដំណើរទៅមុខដោយរួបរួមគ្នា?

ទោះបីជាមានលទ្ធផលបោះឆ្នោតតានតឹង តែខ្ញុំមិនគិតថាវានឹងមានការបែកបាក់ផ្ទៃក្នុងណាមួយក្នុងចំណោមពួកយើងនោះទេ ដូចជានៅក្នុងអាណត្តិមុនដែរ នៅពេលដែលខ្ញុំបានឈ្នះការបោះឆ្នោត ខ្ញុំបានអញ្ជើញបេក្ខជនទាំងបីផ្សេងទៀតធ្វើជាអនុប្រធាន ហើយពីរនាក់បានយល់ព្រម និងម្នាក់ទៀតធ្វើជាទីប្រឹក្សា ដូច្នេះយើងអាចគ្រប់គ្រងសមាគមនេះបានដោយជោគជ័យ។ នៅទីនេះយើងធ្វើការជាក្រុម គ្មាននរណាធំជាង ឬខ្លាំងជាងនរណានោះទេ។ ការបោះឆ្នោតនេះឆ្លុះបញ្ចាំងពីការដឹកនាំរបស់ខ្ញុំនៅក្នុងអាណត្តិមុន និងអ្វីដែលខ្ញុំគួរផ្លាស់ប្តូរ និងធ្វើឲ្យប្រសើរឡើង។ ដើម្បីរួបរួមសមាជិក មានដំណោះស្រាយតែមួយប៉ុណ្ណោះ។

ពួកគេដាក់ពាក្យធ្វើជាសមាជិកដោយសារពួកគេចង់បានផលប្រយោជន៍ ដូច្នេះនៅពេលដែលយើងមានគម្រោង និងអត្ថប្រយោជន៍ យើងត្រូវចែកចាយផលប្រយោជន៍ទាំងនោះដោយស្មើភាព។ អ្នកដែលបានរួមចំណែកច្រើន ទទួលបានផលប្រយោជន៍ច្រើន អ្នកដែលបានរួមចំណែកតិចទទួលបានផលប្រយោជន៍តិច។

តើនឹងមានការរៀបចំរចនាសម្ព័ន្ធឡើងវិញទេចំពោះរចនាសម្ព័ន្ធមុនដែលមានសមាជិកក្រុមប្រឹក្សាភិបាល ៧នាក់ និងទីប្រឹក្សា ២ នាក់?

ខ្ញុំនឹងរៀបចំរចនាសម្ព័ន្ធឡើងវិញច្រើននៅក្នុងអាណត្តិទី ៥ នេះ មិនត្រឹមតែសមាជិកក្រុមប្រឹក្សាភិបាលនោះទេ ប៉ុន្តែថែមទាំងបុគ្គលិករដ្ឋបាលផងដែរ។ ពីរឆ្នាំមុនពេលខ្ញុំបានក្លាយជាប្រធានសមាគម មានសមាជិកតែ ៥១នាក់ទេ ហើយយើងបានអញ្ជើញសមាជិកឲ្យធ្វើជាសមាជិកក្រុមប្រឹក្សាភិបាល។ អ្នករាល់គ្នារួមទាំងខ្ញុំដែរ គឺមិនទាន់ត្រៀមខ្លួនជាស្រេចទេ ដោយយើងសុទ្ធតែថ្មីដូចគ្នាសម្រាប់មុខតំណែងទាំងនោះ។ ឥឡូវនេះ ដោយសារតែមានការផ្លាស់ប្តូរស្ថានភាពដែលមានសមាជិករហូតដល់ ៩៨នាក់ ខ្ញុំនឹងបង្កើនចំនួនសមាជិកក្រុមប្រឹក្សាភិបាលឲ្យមានចំនួនចន្លោះពី ១០ ទៅ ១២ នាក់សម្រាប់អាណត្តិនេះ ព្រោះថាចំនួនសមាជិកកើនឡើងបើធៀបទៅនឹងសមាជិកក្រុមប្រឹក្សាភិបាល ៧ នាក់ និងទីប្រឹក្សា ២ នាក់កាលពីក្នុងអាណត្តិមុន។ ខ្ញុំមានផែនការជ្រើសរើសអនុប្រធាន ៥នាក់ រួមទាំងស្ត្រីផងដែរ មិនមែនមានត្រឹមតែ៣នាក់ដូចមុនទេ។ សមាជិកក្រុមប្រឹក្សាភិបាលគឺជាអ្នកស្ម័គ្រចិត្ត ដូច្នេះសមាជិកដែលចង់ក្លាយជាសមាជិកក្រុមប្រឹក្សាភិបាលត្រូវតែដាក់ពាក្យសុំអមជាមួយនឹងលិខិតប្តេជ្ញាចិត្ត ហើយនិងត្រូវបានជ្រើសរើសតាមរយៈការបោះឆ្នោត មិនមែនដោយការអញ្ជើញឲ្យចូលរួមដូចពីមុនទេ។ យើងត្រូវការអ្នកដែលមានភក្តីភាពចំពោះសមាគម មិនមែនអ្នកដែលគ្រាន់តែយកតំណែងនេះ ប៉ុន្តែមិនបានធ្វើអ្វីសោះដើម្បីសមាគមនោះទេ។ នៅក្នុងអាណត្តិនេះ ខ្ញុំនឹងមិនធ្វើអ្វីគ្រប់យ៉ាងតែម្នាក់ឯងទេ យើងនឹងធ្វើវា ហើយសម្រេចកិច្ចការជាមួយគ្នា។

ដោយហេតុថាយើងបានធ្វើការជាមួយគ្នាបានមួយអាណត្តិទៅហើយ ខ្ញុំជឿថាយើងអាចយល់ពីគ្នាបានល្អប្រសើរ និងធ្វើការកាន់តែមានប្រសិទ្ធិភាព។

តើអ្វីខ្លះជាជោគជ័យសំខាន់ៗក្នុងអាណត្តិទី ៤?

យើងបានប្រឹងប្រែងធ្វើការងារលំបាកយ៉ាងច្រើននៅក្នុងអាណត្តិទី៤។ យើងបានធ្វើជាម្ចាស់ផ្ទះរៀបចំវេទិកាអចលនទ្រព្យជាសាធារណៈចំនួន ២ លើក ការបង្រៀនពីអចលនទ្រព្យ ២ លើក និងកិច្ចប្រជុំផ្ទៃក្នុងជាច្រើនទៀត។ អ្វីដែលខ្ញុំពិតជាមានមោទនភាពនោះគឺការធ្វើជាម្ចាស់ផ្ទះរៀបចំនូវសន្និសីទសមាគមអ្នកវាយតម្លៃអាស៊ាន (AVA) ដោយជោគជ័យនៅរាជធានីភ្នំពេញពីថ្ងៃទី ៤ ដល់ទី ៦ ខែឧសភា ឆ្នាំ ២០១៦ ដោយមានការចូលរួមពីអ្នកជំនាញខាងអចលនទ្រព្យជាតិ និងអន្តរជាតិជាង ៤០០នាក់។

យើងបានរៀបចំសមាជិកយើងជាក្រុមដើម្បីទស្សនា និងផ្គូផ្គងអាជីវកម្មជាមួយនឹងគម្រោងជាច្រើនស្ទើរតែរៀងរាល់សប្តាហ៍។ នៅក្នុងរយៈពេល ១៤ ខែបន្ទាប់ពីខ្ញុំបានកាន់តំណែង សមាជិកភាពបានកើនឡើងទ្វេដងពី ៥១ ទៅ ៩៨ នាក់ ដូចនេះប្រាក់ចំណូលសមាជិកភាពក៏កើនឡើងដែរ។ យើងបានពង្រីកបណ្តាញរបស់យើងទាំងក្នុងស្រុក និងអន្តរជាតិ។ ប្រព័ន្ធផ្សព្វផ្សាយក៏បានបង្ហាញពីយើង និងទីផ្សារប្រចាំថ្ងៃ។ ឥឡូវនេះកម្ពុជាបានក្លាយជាសមាជិកសមាគមអ្នកវាយតម្លៃអាស៊ានតាំងពីឆ្នាំ ២០១០ និងបណ្តាញសម្ព័ន្ធអចលនទ្រព្យអាស៊ាន (ARENA) តាំងពីឆ្នាំ ២០១៦ ហើយឆាប់ៗនេះយើងនឹងក្លាយជាសមាជិកនៃសមាគមជាតិក្រុមហ៊ុនទិញលក់អចលនទ្រព្យ (NAR) ដែលមានមូលដ្ឋាននៅសហរដ្ឋអាមេរិក។

តើអ្វីជាគោលដៅត្រូវសម្រេចបន្តពីអាណត្តិទី ១ របស់លោក ហើយអ្វីជាគោលដៅសំខាន់សម្រាប់អាណត្តិទី ២ នេះ?

សន្និសីទបណ្តាញសម្ព័ន្ធអចលនទ្រព្យអាស៊ានឆ្នាំ ២០១៦ ត្រូវបានរៀបចំនៅក្នុងប្រទេសថៃ ហើយឆ្នាំ ២០១៧ នឹងរៀបចំនៅក្នុងប្រទេសម៉ាឡេស៊ី ដូចនេះខ្ញុំនឹងប្រកួតប្រជែងធ្វើជាម្ចាស់ផ្ទះសន្និសីទនេះនៅឆ្នាំ ២០១៨ នៅប្រទេសកម្ពុជា។ ខ្ញុំបានចូលរួមក្នុងសន្និសីទសមាគមជាតិក្រុមហ៊ុនទិញលក់អចលនទ្រព្យ (NAR) នៅប្រទេសកូរ៉េខាងត្បូងនៅឆ្នាំ ២០១៦ ហើយសន្និសីទនេះនឹងត្រូវបានរៀបចំមួយផ្សេងទៀតនៅក្នុងប្រទេសថៃនៅឆ្នាំ ២០១៨ ដូច្នេះខ្ញុំចង់ឲ្យប្រទេសកម្ពុជាធ្វើជាប្រធានសន្និសីទនេះសម្រាប់សន្និសីទបន្ទាប់នៅឆ្នាំ ២០២០។ សមាជិករបស់សមាគមអ្នកវាយតម្លៃ និងភ្នាក់ងារអចលនទ្រព្យកម្ពុជាទាំងអស់ រួមទាំងសេដ្ឋកិច្ច និងសង្គមរបស់យើងនឹងទទួលបានប្រយោជន៍ច្រើនពីព្រឹត្តិការណ៍ទាំងពីរនេះ។ ខ្ញុំបានចុះអនុស្សរណៈយោគយល់ជាមួយបណ្តាញសម្ព័ន្ធអចលនទ្រព្យអាស៊ាន វិទ្យាស្ថានភ្នាក់ងារអចលនទ្រព្យនៃប្រទេសសិង្ហបុរី (IEAS) និងសមាគមជាតិក្រុមហ៊ុនទិញលក់អចលនទ្រព្យ (NAR) សម្រាប់កម្មវិធីបណ្តុះបណ្តាលអចលនទ្រព្យ ហើយយើងនឹងធ្វើឲ្យកម្មវិធីនេះចេញជារូបរាង នៅដើមឆ្នាំ ២០១៧។ នៅឆ្នាំ ២០១៧ យើងនឹងបង្កើតក្រុមការងារចំនួន ២ ដើម្បីគ្រប់គ្រងគម្រោងដោយផ្តាច់មុខសម្រាប់សមាជិករបស់យើង និងក្រុមវាយតម្លៃមួយផ្សេងទៀតដើម្បីវាយតំលៃគម្រោងផងដែរ។

តើមានទីភ្នាក់ងារ និងភ្នាក់ងារចំនួនប៉ុន្មានដែលជាសមាជិករបស់ CVEA ឥឡូវនេះ? ហើយក្នុងចំណោមនោះមានចំនួនប៉ុន្មានដែលជាអង្គភាពបរទេស?

គិតត្រឹមខែធ្នូ ឆ្នាំ ២០១៦ មានសមាជិកជាផ្លូវការ ៨០ និងសមាជិកពាក់ព័ន្ធចំនួន ១៨។ ក្នុងនោះមានក្រុមហ៊ុនក្នុងស្រុកចំនួន ៨០ និងក្រុមហ៊ុនបរទេសចំនួន ១៨ ហើយមានភ្នាក់ងារជាង ១.២០០ នាក់ បានចុះបញ្ជីជាមួយសមាគម។

ទីផ្សារនេះបានជួបនូវកំណើនវិស័យអចលនទ្រព្យយឺតនៅឆ្នាំ ២០១៦2016 បើធៀបទៅនឹងឆ្នាំមុន។ តើលោកយល់ឃើញថាវិស័យអចលនទ្រព្យនឹងបន្តធ្លាក់ចុះនៅឆ្នាំ ២០១៧ និងឆ្នាំ ២០១៨ ដែរឬទេ? តើកត្ដាអ្វីខ្លះដែលមានឥទ្ធិពលលើទីផ្សារនាពេលបច្ចុប្បន្ន?

ខ្ញុំមិនមើលឃើញថាទីផ្សារនេះមានភាពជាប់គាំងនោះទេ។ ដរាបណានៅមានមនុស្សស្វែងរកការទិញលំនៅឋាន ទីផ្សារនេះនឹងមិនជាប់គាំងនោះទេ។ រហូតមកដល់ពេលនេះ កម្មករ ៨០០ពាន់នាក់ កំពុងរស់នៅក្នុងរាជធានីភ្នំពេញ ហើយជនចំណាកស្រុកកាន់តែច្រើនកំពុងហូរចូលមកក្នុងរាជធានីជារៀងរាល់ឆ្នាំ។ ដូចនេះ តើផ្សារនឹងធ្លាក់ចុះដោយរបៀបណាទៅ?

បញ្ហានាពេលបច្ចុប្បន្ននេះគឺមិនមែនការធ្លាក់ចុះនៃវិស័យអចលនទ្រព្យនោះទេ ប៉ុន្តែគឺការកំណត់តម្លៃខ្ពស់របស់អ្នកអភិវឌ្ឍន៍។ នៅពេលដែលមនុស្សមិនអាចមានលទ្ធភាពទិញអចលនទ្រព្យទាំងនោះទេ តម្លៃអចលនទ្រព្យនឹងធ្លាក់ចុះទៅរកតម្លៃពិតរបស់វាដោយស្វ័យប្រវត្តិ។ ទីផ្សារនេះនឹងមិនជាប់គាំងនោះទេ។

កត្តាសំខាន់ដែលមានឥទ្ធិពលលើទីផ្សារនាពេលបច្ចុប្បន្ននេះគឺ ការកំណត់តម្លៃខ្ពស់លើសដោយអ្នកអភិវឌ្ឍន៍ ហើយបញ្ហាបន្ទាប់គឺស្ថានភាពនយោបាយ ការអភិវឌ្ឍសេដ្ឋកិច្ច និងលំហូរនៃការវិនិយោគផ្ទាល់ពីបរទេស។

គោលបំណងសំខាន់មួយរបស់លោកគឺបង្កើតវិទ្យាស្ថានបណ្តុះបណ្តាលវិស័យអចលនទ្រព្យជាលើកដំបូងនៅប្រទេសកម្ពុជា។ តើផែនការនេះដំណើរការយ៉ាងណាហើយ?

យើងបានចុះអនុស្សរណៈយោគយល់ជាមួយនឹងសាកលវិទ្យាល័យបច្ចេកវិទ្យាម៉ាឡេស៊ី (UTM) រួចហើយនៅខែធ្នូ ឆ្នាំ ២០១៦ ដែលសាកលវិទ្យាល័យនេះមានជំនាញក្នុងកម្មវិធីបណ្តុះបណ្តាលវិស័យអចលនទ្រព្យ។ បន្ទាប់មកយើងនឹងធ្វើការងារលើកម្មវិធីសិក្សា មុខវិជ្ជាសម្រាប់វគ្គសិក្សា កាលវិភាគសិក្សា និងថ្លៃសិក្សា។

យើងមានផែនការជួលគ្រូនៃសាកលវិទ្យាល័យនេះមួយចំនួន និងមួយចំនួនទៀតជាគ្រូរបស់យើង ដោយសារតែការចំណាយ។ យើងនឹងបើកកម្មវិធីសិក្សាមុនពេលឱកាសពិធីបុណ្យចូលឆ្នាំចិន។ ដំបូងយើងនឹងជួលបន្ទប់សណ្ឋាគារ ឬបន្ទប់សាលារៀនសម្រាប់ការសិក្សា។

មានការពិភាក្សាជាច្រើនអំពីថាតើត្រូវធ្វើសមាហរណកម្មវិស័យអចលនទ្រព្យកម្ពុជាចូលទៅក្នុងទីផ្សារពិភពលោកដោយរបៀបណា? តើលោកគិតថាដំណើរការនេះដើរបានល្អកម្រិតណាដែរ ហើយតើយើងត្រូវធ្វើអ្វីទៀត? តើអចលនទ្រព្យកម្ពុជាពិតជាអាចប្រកួតប្រជែងនៅលើទីផ្សារពិភពលោកបានទេ?

កម្ពុជានៅតែជាទីផ្សារបិទនៅឡើយ មានមនុស្សតិចតួចទេដែលបានដឹងពីយើង។ ប្រទេសយើងមានការខ្វះខាតខាងការផ្សព្វផ្សាយជំរុញទីផ្សារ។ ឥឡូវនេះខ្ញុំបានផ្សព្វផ្សាយវិស័យអចលនទ្រព្យកម្ពុជាទៅកាន់ប្រទេសម៉ាឡេស៊ី កូរ៉េខាងត្បូង និងសហរដ្ឋអាមេរិក។ នៅឆ្នាំ ២០១៧ ខ្ញុំមានផែនការផ្សព្វផ្សាយប្រទេសយើងនៅក្នុងប្រទេសចំនួនប្រាំពីរផ្សេងទៀត។

ខ្ញុំមិនគិតថានឹងមានការប្រកួតប្រជែងខ្លាំងក្លាណាមួយក្នុងទីផ្សារអចលនទ្រព្យជាមួយបណ្តាប្រទេសផ្សេងទៀតនោះទេ។ ពួកគេសាងសង់សម្រាប់ប្រជាជន និងជនបរទេសដែលរស់នៅក្នុងប្រទេសរបស់ពួកគេផ្ទាល់ ហើយយើងក៏ដូចគ្នាដែរ។ យើងគ្រាន់តែប្រកួតប្រជែងនៅលើស្ថានភាពសេដ្ឋកិច្ចប៉ុណ្ណោះ។ ប្រសិនបើសេដ្ឋកិច្ចរបស់យើងគឺល្អប្រសើរជាងមុន នោះនឹងមានមនុស្សកាន់តែច្រើនចូលមកប្រទេសយើង។

ឧស្សាហកម្មអចលនទ្រព្យដែលរឹងមាំមួយត្រូវការការចូលរួមជាវិជ្ជមានពីភាគីទាំងអស់។ តើលោកមានសំណើ និងអនុសាសន៍អ្វីខ្លះសម្រាប់អ្នកអភិវឌ្ឍវិស័យឯកជន អ្នកទិញនិងអ្នកលក់អចលនទ្រព្យ និងរដ្ឋាភិបាលដើម្បីធានាថាទីផ្សារអចលនទ្រព្យនៅកម្ពុជាមានការរីកចម្រើន?

រាជរដ្ឋាភិបាលគួរតែដឹកនាំក្នុងការជំរុញទីផ្សារនេះទៅមុខ។ ក្នុងនោះគួរតែមានផែនការទីក្រុងដ៏ត្រឹមត្រូវមួយ ការកំណត់តំបន់ទីក្រុង ដើម្បីឲ្យភ្នាក់ងារ និងអ្នកអភិវឌ្ឍន៍ដឹងថាអ្វីដែលត្រូវអភិវឌ្ឍ និងនៅកន្លែងណា។ ជាមួយគ្នានេះ ក៏ត្រូវមានបទបញ្ញត្តិដែលមានប្រសិទ្ធិភាពជាងនេះដើម្បីគ្រប់គ្រងវិស័យនេះ។ សម្រាប់អ្នកអភិវឌ្ឍ ពួកគេគួរតែសិក្សាឡើងវិញព្រោះថាទីផ្សារសម្រាប់ក្រុមអ្នកមាន និងក្រុមអ្នកមានជីវភាពបង្គួរគឺមានការផ្គត់ផ្គង់លើសតម្រូវការ។ បច្ចុប្បន្ននេះ ជាង ៧០ភាគរយ នៃប្រជាជនមានប្រាក់ចំណូលទាប។ ពួកគេគួរតែកំណត់គោលដៅលើការសង់លំនៅឋានមានតម្លៃទាបជាង ២ម៉ឺនដុល្លារ។ សម្រាប់ឈ្មួញកណ្តាល ពួកគេគួរតែគោរពតាមច្បាប់។

តើអ្វីជាបញ្ហាប្រឈម និងឱកាសធំបំផុតដែលទីផ្សារអចលនទ្រព្យកម្ពុជាប្រឈមដោយសម្លឹងមើលទៅកាន់រយៈពេល ១០ ឆ្នាំខាងមុខទៀត?

បញ្ហាប្រឈមធំរបស់យើងគឺកង្វះផែនការមេទីក្រុងដែលសមរម្យ ហើយបទប្បញ្ញត្តិច្បាប់ដូចជាច្បាប់ស្តីពីអាជីវកម្មអចលនទ្រព្យ។ ប្រទេសកម្ពុជាគឺដូចជាក្មេងស្រីកំពុងលូតលាស់ដែរព្រោះតែសេដ្ឋកិច្ចដ៏ខ្លាំងក្លា កត្តាប្រជាសាស្ត្រដ៏ល្អ ភូមិសាស្ដ្រដែលមានសុវត្ថិភាព មនុស្សដែលរួសរាយរាក់ទាក់ និងនៅជាចំណុចកណ្តាលនៃអាស៊ានដែលកំពុងទាក់ទាញផ្នែកផ្សេងៗនៃពិភពលោក។ ដូច្នេះយើងមានឱកាសជាច្រើន។

លោក គីម ហ៊ាង ប្រធាន CVEA សូមអរគុណលោកសម្រាប់ការចែករំលែកការយល់ដឹងដ៏មានតម្លៃរបស់លោកជាមួយទស្សនាវដ្តីសំណង់ និងអចលនទ្រព្យ។

• ចំណេះដឹង និង បទពិសោធន៍
• ចំណេះដឹង និង បទពិសោធន៍