សម្តេច៖ សក្ដានុពលវត្ថុធាតុដើមនៅកម្ពុជា ជាកំលាំងទាញដ៏រឹងមាំសម្រាប់ការវិនិយោគកសិឧស្សាហកម្ម

• 17 ខែ​មិថុនា 2023
• ព័ត៌មានក្នុងស្រុក
• 12 មើល

សម្តេចតេជោ ហ៊ុន សែន ដាក់ក្តីរំពឹងខ្ពស់ថា កម្ពុជានឹងអាចទាក់ទាញការវិនិយោគកសិឧស្សាហកម្មកាន់តែច្រើន ដោយសារកម្ពុជាមានសក្តានុពលវត្ថុធាតុដើមកសិកម្មជាច្រើន ដែលមិនទាន់ត្រូវបានកែច្នៃ។​

សម្តេចលើកឡើងបែបនេះ ក្នុងពិធីសំណេះសំណាលជាមួយកម្មករ កម្មការិនីសរុបជិត២ម៉ឺននាក់ មកពីរោងចក្រ សហគ្រាសចំនួន៦ ក្នុងខេត្តកំពង់ចាម នៅថ្ងៃទី១៦ ខែមិថុនា។

សម្តេចតេជោ ហ៊ុន សែន មានប្រសាសន៍ថា កម្ពុជាបានទាក់ទាញវិនិយោគមកលើវិស័យកាត់ដេរ ប៉ុន្តែកម្ពុជាអត់ទាន់បានទាក់ទាញវិនិយោគសម្រាប់បង្កើតតម្លៃបន្ថែមដល់វត្ថុធាតុដើមក្នុងស្រុក។

សម្តេចតេជោ ហ៊ុន សែន មានប្រសាសន៍ថា៖ “យើងចង់កែច្នៃផលិតផលកសិកម្ម ដើម្បីទាក់ទាញឧស្សាហកម្មមកកែច្នៃ ដែលហៅថាកសិ-ឧស្សាហកម្ម ហើយកំពុងឈានដល់កសិ-ពាណិជ្ជកម្ម ដែលតភ្ជាប់ជាមួយទីផ្សារ ដែលនេះជាការបង្កើតតម្លៃបន្ថែមដល់កសិកម្មក្នុងស្រុក”។​

សម្តេចតេជោបញ្ជាក់ទៀតថា ថ្ងៃក្រោយប្រទេសកម្ពុជាអាចក្លាយទៅជាប្រទេសអធិរាជស្វាយចន្ទី ពីព្រោះប្រទេសកម្ពុជាមានអំណោយផលក្នុងការដាំដុះស្វាយចន្ទី ហើយស្វាយចន្ទីគឺមានតម្រូវការខ្ពស់នៅលើទីផ្សារអន្តរជាតិ ខណៈកាលពីឆ្នាំ២០២២ កម្ពុជាប្រមូលផលស្វាយចន្ទីបានជាង ១.១៨លាន តោន។

• Agriculture and Aquaculture Project