សិង្ហបុរីសហការនឹងក្រសួងដែនដីលើកកម្ពស់សុវត្ថិភាពអគ្គីភ័យក្នុងវិស័យសំណង់

13 ខែមីនា 2019
Uncategorized
6 មើល

burning high-rise collapses – credit : Los Angeles Times

សមាជិកនៃគណៈស្ថាបត្យកម្មរបស់ប្រទេសសិង្ហបុរីរួមជាមួយនឹងមន្ត្រីក្រសួងដែនដីកម្ពជា បានសហការគ្នាចែករំលែកបទពិសោធន៍សំខាន់ៗ ទាក់ទងនឹងសុវត្ថិភាពអគ្គីភ័យក្នុងវិស័យសំណង់ ក្នុងគោលបំណងដើម្បីជួយអប់រំណែនាំ ផ្ដល់ចំណេះដឹង លើកកម្ពស់ និងដោះស្រាយបញ្ហាប្រឈមក្នុងវិស័យនេះ។

ជំនួបរវាងភាគីទាំង ២ ធ្វើឡើងកាលថ្ងៃទី ១២ ខែមីនា ឆ្នាំ២០១៩ នៅទីស្តីការក្រសួងរៀបចំដែនដី នគរូបនីយកម្ម និងសំណង់ ក្នុងសិក្ខាសាលាស្ដីពី សុវត្ថិភាពអគ្គីភ័យ និងកិច្ចសន្យាសាងសង់ ដោយមានការចូលរួមពី សំណាក់សិស្សនិស្សិត មន្ត្រីជំនាញរបស់កម្ពុជា និងក្រុមគណៈស្ថាបត្យកម្មសឹង្ហបូរី ព្រមទាំងអ្នកជំនាញជាច្រើនលើវិស័យសំណង់ និងសុវត្ថិភាពអគ្គីភ័យនេះ។

លោក ចាន់ កុកវ៉េ (Chan Kok Way) ស្ថាបត្យករជាន់ខ្ពស់របស់ប្រទេសសិង្ហបុរី បានមានប្រសាសន៍ថា៖ សុវត្ថិភាពអគ្គីភ័យគឺការផ្តោតសំខាន់លើ យុទ្ធសាស្រ្តនៃសុវត្ថិភាពអគ្គីភ័យអកម្ម យុទ្ធសាស្រ្តនៃសុវត្ថិភាពអគ្គិភ័យសកម្ម ខ្យល់មេកានិចក្នុងអគារ ប្រព័ន្ធត្រួតពិនិត្យផ្សែង ប្រព័ន្ធភ្លើងប្រកាសអាសន្ន និងប្រព័ន្ធរំពងសម្លេង ដែលវាជួយដល់សុវត្ថិភាពអ្នកដែលរស់នៅក្នុងអគារ និងក្រុមពន្លត់អគ្គីភ័យក្នុងការជួយសង្រ្គោះ ដែលអាចការពារទ្រព្យសម្បត្តិអ្នករស់នៅក្នុងអគារ និងទ្រព្យសម្បត្តិរបស់អ្នកជិតខាងផងដែរ។

លោកក៏បានបន្ថែមផងដែរថា ការរៀបចំប្រព័ន្ធសុវត្ថិភាពនោះគឺមានការរៀបចំទីកន្លែងសុវត្ថិភាពជម្លៀសជនរងគ្រោះ សម្រាប់អាគារដែលមានកម្ពស់ខ្ពស់ ដែលត្រូវទុកទីវាលមួយជាន់ដែលទំនេរ រាល់២០ជាន់ម្តង និងមានការប្រុងប្រយ័ត្នលើប្រព័ន្ធអគ្គសនី និងការរៀបចំទីកន្លែងឬច្រកសុវត្ថិភាពសម្រាប់ក្រុមអ្នកពន្លត់អគ្គីភ័យក្នុងការជួយសង្រ្គោះក្នុងពេលដែលមានអគ្គីភ័យកើតឡើង។

ឯកឧត្តម លាង មុនីរិទ្ធ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានសង្កត់ធ្ងន់ផងដែរថា អ្នកជំនាញដែលមានវិជ្ជាជីវៈពាក់ព័ន្ធទាំងអស់ត្រូវយកចិត្តទុកដាក់អនុវត្តការងារតាមសមត្ថភាពជំនាញប្រកបដោយក្រមសីលធម៌វិជ្ជាជីវៈចំពោះកត្តាសុវត្ថិភាព អោយស្របតាមគោលការណ៍ វិធាន បទដ្ឋាន និងស្តង់ដារ ដើម្បីបង្ការ ទប់ស្កាត់ និងសង្រ្គោះបន្ទាន់ក្នុងពេលមានអគ្គីភ័យកើតឡើងស្របពេលដែលកម្ពុជាកំពុងមានកំណើនវិស័យសំណង់ខ្ពស់ៗ។

យោងតាមរបាយការរបស់ក្រសួងដែនដី កម្ពុជាមានការរីកលូតលាស់យ៉ាងខ្លាំង ជាមួយនឹងការអភិវឌ្ឍក្នុងសន្ទុះយ៉ាងលឿននៃហេដ្ឋារចនាសម្ព័ន្ធរូបវត្ត ដីធ្លី និងសំណង់អាគារពាណិជ្ជកម្មផ្សេងៗ ជាក់ស្តែង ទុនវិនិយោគក្នុងវិស័យសំណង់ ក្នុងរយៈពេល ១០ឆ្នាំ ចុងក្រោយនេះ មានចំនួនប្រមាណ ៤៤ពាន់លានដុល្លារសហរដ្ឋអាមេរិច ដែលក្នុងខែមករា ឆ្នាំ ២០១៩ មានចំនួនប្រមាណ ៨២៩ លានដុល្លារសហរដ្ឋអាមេរិច ដែលកើនឡើង ស្ទើរតែ ២ដង ធៀបនឹងរយៈពេលដូចគ្នានៅឆ្នាំ២០១៨។