សំណង់វារីអគ្គិសនីច្រើនហួសជាផ្នែកមួយបង្កឱ្យកម្រិតទឹកទន្លេសាបស្រកខ្លាំង

28 ខែកក្កដា 2020
6 មើល

ក្រៅពីកត្តាបម្រែបម្រួលអាកាសធាតុ គម្រោងសាងសង់ទំនប់វារីអគ្គិសនីធំៗលើដងទន្លេមេគង្គច្រើន ជាពិសេសនៅចិន និងឡាវ ក៏ជាកត្តាសំខាន់មួយដែលបណ្ដាលឲ្យកម្រិតទឹកក្នុងបឹងទន្លេសាបស្រកចុះយ៉ាងខ្លាំងក្នុងឆ្នាំនេះ ហើយប៉ះពាល់យ៉ាងធ្ងន់ធ្ងរដល់ការនេសាទនៅកម្ពុជា។ នេះបើយោងតាមអ្នកជំនាញផ្នែកបរិស្ថាន។

លោក Brian Eyler សមាជិកជាន់ខ្ពស់ និងជានាយកកម្មវិធីអាស៊ីអាគ្នេយ៍របស់មជ្ឈមណ្ឌល Stimson ទីក្រុងវ៉ាស៊ីនតោន បានឱ្យដឹងថាទន្លេមេគង្គលើកំពុងជួបនឹងគ្រោះរាំងស្ងួតដោយសារគម្រោងវារីអគ្គីសនីជាច្រើនសន្ធឹកសន្ធាប់នេះ។

លោកបានបង្ហោះសារនៅលើហ្វេសប៊ុកថា៖ «ទំនប់វារីអគ្គិសនីរាប់រយត្រូវបានសាងសង់លើដងទន្លេមេគង្គ រួមមាន ចិនច្រើនជាង ១០០ គម្រោង ឡាវច្រើនជាង ១០០ គម្រោង វៀតណាមច្រើនជាង ១៦ គម្រោង ថៃច្រើនជាង ៩ គម្រោង និង កម្ពុជា ២ គម្រោង ។

លោកបានបន្ថែមថា៖ «ទំនប់វារីអគ្គិសនីធំៗ ២ នៅប្រទេសចិន គឺគម្រោងនៅ Nuo zhadu និង Xiaowan ដែលស្ថិតនៅផ្នែកខាងលើទន្លេមេគង្គ បិទចរន្តទឹកប្រមាណ ២០ ពាន់លានម៉ែត្រគូបមិនឲ្យហូរចុះមកទន្លេមេគង្គផ្នែកខាងក្រោម។ នេះជាកត្តាដែលធ្វើឲ្យកម្រិតទឹកនៅតាមបណ្តោយដងទន្លេមេគង្គស្រកចុះ នឹងធ្វើឲ្យការហូរត្រឡប់នៃទឹកក្នុងបឹងទន្លេសាបកាន់តែយឺត»។

យោងតាមរបាយការណ៍របស់ក្រុមហ៊ុន Eye on Earth និងក្រុមហ៊ុន Global Environmental Satellite Applications កាលពីខែ មេសា ដោយផ្អែកលើទិន្នន័យពីផ្កាយរណបចាប់ឆ្នាំ ១៩៩២ ដល់ឆ្នាំ ២០១៩ និងទិន្នន័យរង្វាស់កម្ពស់ទឹកទន្លេប្រចាំថ្ងៃពីប្រទេសថៃ ឃើញថាកម្រិតទឹកទន្លេបានស្រុតចុះ ប្រមាណ ១២៦ម៉ែត្រ ក្នុងរយៈពេល ២៨ ឆ្នាំមកនេះ។

អ្នកជំនាញ ក៏បានសំដែងការព្រួយបារម្ភថាការស្រុតចុះនៃកម្រិតទឹកនេះ នឹងធ្វើឱ្យការហូរបញ្ច្រាស់នៃទន្លេសាប មានភាពរអាល់រអួល ដែលនឹងប៉ះពាល់យ៉ាងខ្លាំងដល់ការនេសាទនៅកម្ពុជា ដែលពឹងផ្អែកស្ទើតែទាំងស្រុងលើការហូរបញ្ច្រាស់នៃបឹងទន្លេសាប។