ស្ថានីយប្រព្រឹត្តិកម្មទឹកកខ្វក់តម្លៃ ២២លានដុល្លារ នៅបាត់ដំបង បើកការដ្ឋានសាងសង់ហើយ

• 9 ខែ​ធ្នូ 2020
• Uncategorized
• 12 មើល

គម្រោងស្ថានីយប្រព្រឹត្តិកម្មទឹកកខ្វក់ក្នុងក្រុងនៅខេត្តបាត់ដំបង បើកការដ្ឋានសាងសង់ហើយ ក្រោមជំនួយថវិកាប្រមាណ ២១,៧លានដុល្លារ ពីធនាគារអភិវឌ្ឍន៍អាស៊ី (ADB) ។

ពិធីបើកការដ្ឋានសាងសង់នេះ ធ្វើឡើងនៅថ្ងៃទី ៧ ខែវិច្ឆិកា ដោយមានការចូលរួមពីលោក ផេង សិទ្ធី អភិបាលក្រុងបាត់ដំបង។

មានទីតាំងនៅភូមិបាឡាត់ ឃុំនរា ស្រុកសង្កែ គម្រោងនេះគឺជាជំហានទី២ របស់ធនគារអភិវឌ្ឍន៍អាស៊ី។

គម្រោងនេះសាងសង់ដោយ ក្រុមហ៊ុន MTA Construction Co Ltd ដោយនឹងប្រើពេលប្រមាណ ៣ឆ្នាំ ក្នុងការសាងសង់ ពោលគឺគ្រោងនឹងបញ្ចប់នៅខែកញ្ញា ឆ្នាំ ២០២៣ ខាងមុននេះ ។

លោក ផេង សិទ្ធី មានប្រសាសន៍ថា ស្ថានីយនេះមិនត្រឹមតែជួយបំលែងទឹកកខ្វក់មុនរំដោះចេញទៅក្នុងបឹង ឬស្ទឹង នោះទេ តែនឹងបានជួយរំដោះទឹកកខ្វក់ និងទឹកជំនន់ក្នុងរដូវវស្សាផងដែរ។

កាលពីខែមិថុនា កន្លងទៅ ឯកឧត្តម ងួន រតនៈ អភិបាលខេត្តបាត់ដំបង ក៏បានមានប្រសាសន៍ថា ក្រុងបាត់ដំបងឆាប់ៗនេះ នឹងមានប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ ដែលមានសមត្ថភាពអាចចម្រោះទឹកកខ្វក់ ប្រមាណ ១២ ០០០ ម៉ែត្រគូបក្នុងមួយថ្ងៃ។

ឯកឧត្តម ថ្លែងថា៖ “គម្រោងនេះនឹងធ្វើឱ្យក្រុងបាត់ដំបងក្លាយជាទីក្រុងទីបីដែលមានប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ បន្ទាប់ពីទីក្រុងសីហនុ និងក្រុងសៀមរាប”។

 

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍