ស្ថាបត្យករហុងកុងសាងសង់ស្ថានីយបំប្លែងទឹកភ្លៀងជាទឹកស្អាតប្លែកថ្មីមួយនៅកម្ពុជា

27 ខែសីហា 2020
Uncategorized
10 មើល

ក្រុមហ៊ុនស្ថាបត្យករហុងកុង បានសាងសង់ស្ថានីយស្ដុក និងបំប្លែងទឹកភ្លៀងឱ្យទៅជាទឹកស្អាតមួយកន្លែង នៅភូមិស្នឹង ខេត្តបាត់ដំបង ដោយប្រើប្រាស់បច្ចេកវិទ្យាវិស្វកម្មបែបថ្មីមិនធ្លាប់មានពីមុនមក ក្នុងគោលបំណងដើម្បីជួយដោះស្រាយបញ្ហាទឹកកខ្វក់ និងគ្រោះរាំងស្ងួត។ នេះបើយោងតាមសារព័ត៌មាន DeZeen។

អាងស្តុងទឹកភ្លៀងនេះ ហៅថា WaterHall ដែលត្រូវបានរចនាឡើងដោយក្រុមហ៊ុន Orient Occident Atelier។ គម្រោងនេះមានទំហំ ៦០ម៉ែត្រការ៉េ ដោយមាន ២អាង សាងសង់ឡើងដោយការតម្រៀបឥដ្ឋជាចន្លោះៗ ដើម្បីចម្រោះទឹកស្អាតមុននឹងយកមកប្រើប្រាស់។

អាងទី ១ ជាការរៀបឥដ្ឋបិទជិត ដោយធ្វើការបូមទឹកចេញពីបឹងនៅតំបន់ក្បែរនោះ តាមរយៈប្រព័ន្ធបូមទឹកបង្កប់ក្នុងដី និងបម្លែងទឹកកង្វក់ទៅជាទឹកស្អាតមុននឹងចែកចាយឱ្យប្រើប្រាស់។

ចំណែកឯអាងទី ២ គឺជាការសាងសង់ឡើងជាសាលបើកចំហរពាក់កណ្ដាល ដោយរៀបឥដ្ឋបិទជិតពាក់កណ្ដាល និងចំហរពាក់កណ្ដាល មានដំបូលដែកសាងសង់ជារាងចានគោម ដើម្បីទ្រនិងស្តុកទុកទឹកភ្លៀង។

គួរបញ្ជាក់ផងដែរថា គម្រោងនេះសាងសង់ឡើងក្រោមជំនួយរបស់ក្រុមហ៊ុន ២ គឺ ក្រុមហ៊ុន Orient Occident Atelier និងក្រុមហ៊ុន Hong Kong Institute of Architects (HKIA) Community Project Fund ផងដែរ។

បើតាមការឱ្យដឹងពី ក្រុមហ៊ុន Orient Occident Atelier គម្រោងនេះធ្វើឡើងក្នុងគោលបំណងផ្ដល់ទឹកស្អាតដល់ប្រជាជនក្នុងតំបន់ ក៏ដូចជាដោះស្រាយបញ្ហាគ្រោះរាំងស្ងួតនៅភូមិស្នឹង។