ស្ពានក្រោមជំនួយពីចិនតម្លៃជាង៥៦លានដុល្លារកំពុងលេចខ្លួនបណ្តើៗហើយ

22 ខែមករា 2019
Uncategorized @km
6 មើល

ស្របពេលដែលក្រុមហ៊ុនចិនជាច្រើនកំពុងចាប់អារម្មណ៍វិនិយោគលើហេដ្ឋារចនាសម្ព័ន្ធនៅកម្ពុជាបន្ថែមទៀតនោះ ស្ពានតម្លៃជាង៥៦លានដុល្លារអាមេរិកបាន និងកំពុងលេចខ្លួនជាបណ្តើរៗហើយ នេះបើយោងតាមការផ្សាយរបស់ក្រសួង សាធារណការ និងដឹកជញ្ជូន។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មាដែលបានចាប់ផ្តើមការសាងសង់ កាលពីខែកុម្ភៈ ឆ្នាំ ២០១៨ កន្លងទៅនេះគឺមានការចាក់បុកគ្រឹះគ្រោងឆ្អឹងស្ពានរួច រាល់ហើយបានលេចចេញជារួបរាងបណ្តើរៗ។

តាមរូបភាពដែលក្រសួងសាធារណការ និងដឹកជញ្ជូនបានបង្ហោះ បច្ចុប្បន្ននេះស្ពានមួយខ្សែដែលលាតសន្ធឹងកាត់ទន្លេមេគង្គតភ្ជាប់រវាងខេត្តកំពង់ចាម និងខេត្តត្បូងឃ្មុំមួយនេះគឺមានការចាក់សសរស្ពានចំនួនជាច្រើនហើយ សកម្មភាពសាងសង់គឺកំពុងប្រព្រឹត្តទៅយ៉ាងមមាញឹកផងដែរ។

ស្ពាននេះគឺមានប្រវែងសរុប ១.១៣១ ម៉ែត្រ និង ទទឹង១៣,៥០ ម៉ែត្រ ជាប្រភេទស្ពានបេតុងសរសៃដែកហើយត្រូវបានសាងសង់ឡើងដោយក្រុមហ៊ុនសំណង់សៀងហៃគ្រុបក្រោមថវិការកម្ចីពីសាធារណរដ្ឋ ប្រជាមានិតចិនប្រមាណជា៥៦,៩៩៨ លាន ដុល្លារអាមេរិក។

តាមការគ្រោងទុក ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មាគឺនឹងត្រូវប្រើប្រាស់រយៈពេលសាងសង់ចំនួន៤២ខែ ហើយគ្រោងនឹងបញ្ចប់ការសាងសង់នៅដើមឆ្នាំ២០២១ខាងមុខនេះ។