អគារកម្ពស់៣៩ជាន់ តម្លៃ១ពាន់លានដុល្លារអាមេរិកគ្រោងសាងសង់នៅខណ្ឌច្បារអំពៅ

• 16 ខែ​កញ្ញា 2019
• ព័ត៌មានអចលនទ្រព្យ
• 8 មើល

អគារកម្ពស់៣៩ជាន់ វិនិយោគក្នុងតម្លៃប្រមាណ១ពាន់លានដុល្លារអាមេរិកគ្រោងនឹងសាសង់នៅតំបន់កោះនរាណ៍ សង្កាត់និរោធ ខណ្ឌច្បារអំពៅ ត្រើយខាងកើតទន្លេបាសាក់ទល់មុខទីក្រុងកោះពេជ្រ។

អគារ Vue Aston គ្រោងនឹងសាងសង់នៅចុងឆ្នាំ២០១៩ និងបញ្ចប់នៅចុងឆ្នាំ២០២២ ដែលជាការវិនិយោគរួមគ្នារវាងក្រុមហ៊ុន Sino-Cambodia Investment Co Ltd និងក្រុមហ៊ុន Mingda International Group។

រួមបញ្ចូលសណ្ឋាគារ ខុនដូ និងភោជនីយដ្ឋាន អគារ Vue Aston គ្រោងសាងសង់លើផ្ទៃដី ប្រមាណ ៤ពាន់ម៉ែត្រក្រឡា និងមានផ្ទៃក្រឡាសរុបនៃអគាររហូតដល់៧ ៨០០ ម៉ែត្រក្រឡា ដែលជាការអភិវឌ្ឍន៍ដោយ ក្រុមហ៊ុនចិនមួយឈ្មោះ The Peninsula Capital។

គម្រោងវិនិយោគអគារ Vue Aston នេះត្រូវបានប្រកាសឡើងកាលពីថ្ងៃទី ១៥ ខែកញ្ញា នៅក្នុងវេទិកា ការអភិវឌ្ឍន៍ទីក្រុង ឆ្នាំ២០៣០ នៅសណ្ឋាគារសូហ្វីតែលភ្នំពេញ។

លោកស្រី Deng Wanfang ប្រធានក្រុមប្រឹក្សាភិបាលក្រុមហ៊ុនអភិវឌ្ឍ The Peninsula Capital បានឱ្យដឹងថា ការជ្រើសរើសយកតំបន់កោះនរាណ៍សង្កាត់និរោធសម្រាប់ការវិនិយោគជាលំនៅឋាន និងពាណិជ្ជកម្ម គឺដោយសារតែ នៅកណ្ដាលក្រុងភ្នំពេញត្រូវបានមើលឃើញថា មានភាពចង្អៀតទៅលើការអភិវឌ្ឍន៍។

លោកស្រីបន្តថា ក្រុមហ៊ុនមើលឃើញការអភិវឌ្ឍន៍កណ្ដាលរាជធានីភ្នំពេញ និងនៅជាយរាជធានីគឺមានភាពប្រហាក់ប្រហែលគ្នា មិនខុសគ្នាប៉ុន្មានទេ ក្នុងនោះដែរ កម្រិតជីវភាព និងការរស់នៅរបស់ប្រជាពលរដ្ឋ ជាកត្តាជំរុញឲ្យក្រុមហ៊ុនសម្រេចចិត្តវិនិយោគនៅខណ្ឌច្បារអំពៅ។

លោក ប៉ែន សុភា អនុប្រធានមន្ទីររៀបចំដែនដី នគរូបនីយកម្ម និងសំណង់រាជធានីភ្នំពេញ លើកឡើងនៅក្នុងកម្មវិធីថា តំបន់ច្បារអំពៅ ជាតំបន់មួយក្នុងចំណោមតំបន់មានសក្កានុពលផ្នែកវិស័យសំណង់ នៅរាជធានីភ្នំពេញ ហើយបានទាក់ទាញការវិនិយោគនានា ដូចជាគម្រោងវិនិយោគកសាងអគារ Vue Aston នឹងធ្វើនៅតំបន់ច្បារអំពៅ។

• គម្រោងអភិវឌ្ឍន៍
• គម្រោងអភិវឌ្ឍន៍