អគារថ្នាក់រៀនវ័យឆ្លាតនៃវិទ្យាស្ថានជាតិអប់រំ កម្ពស់៦ជាន់ នឹងបញ្ចប់ការសាងសង់ឆ្នាំ ២០២៣

• 27 ខែ​កញ្ញា 2021
• Uncategorized
• 11 មើល

អគារកម្ពស់៦ជាន់ ថ្មីស្រឡាងមួយខ្នង នៃវិទ្យាស្ថានជាតិអប់រំ ក្រោមអំណោយរបស់សម្តេចតេជោ ហ៊ុន សែន ត្រូវបានបើកការដ្ឋានសាងសង់ជាផ្លូវការហើយ ដោយគម្រោងនឹងបញ្ចប់នៅចុងឆ្នាំ២០២៣ ខាងមុខនេះ។

ឯកឧត្ដម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឱ្យដឹងក្នុងពិធីបើកការដ្ឋាន កាលពីថ្ងៃទី២៣ ខែកញ្ញា កន្លងទៅថា អគារនេះជាអគារទី២ ហើយ ក្រោមអំណោយសម្ដេចហ៊ុនសែន ហើយជាអគារសិក្សាថ្មីទំនើបបែបវៃឆ្លាត និងមានសរុបទាំង ៥៤បន្ទប់។

អគារសិក្សាថ្មីនេះ នឹងត្រូវបានបំពាក់ទៅដោយថ្នាក់រៀនវៃឆ្លាតមិនធ្លាប់មានពីមុនមក បន្ទប់ពិសោធន៍វិទ្យាសាស្រ្ត សាលប្រជុំ សាលសហសិក្សា បន្ទប់សាស្រ្តាចារ្យ បន្ទប់សិល្បៈ បន្ទប់សុខភាព អាហារដ្ឋាន និងហាងកាហ្វេជាដើម។

ឯកឧត្ដម បានបញ្ជាក់ទៀតថា អគារនេះគឺជាសមិទ្ធិផលប្រវត្តិសាស្ត្រមួយ ដើម្បីជួយជំរុញកំណែទម្រង់វិទ្យាស្ថានជាតិអប់រំ សាលារៀន និងការពង្រឹងគុណវុឌ្ឍិគ្រូបង្រៀន។

គួរបញ្ជាក់ថា សម្តេច ហ៊ុន សែន ក៏ធ្លាប់បង្ហាញផែនការចង់លើកកម្ពស់ និងពង្រីកវិទ្យាស្ថានជាតិអប់រំទ្រង់ទ្រាយធំ ដើម្បីឆ្លើយតបទៅនឹងកំណើននិស្សិត ដោយអាចនឹងត្រូវវាយចោលអគារចាស់ៗ ហើយសង់អគារថ្មីៗបន្ថែមជាច្រើន។

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍