អគារពាណិជ្ជកម្មកម្ពស់៧៨ ជាន់ ថ្មីមួយទៀតនឹងរះឡើងក្បែរទីក្រុងកោះពេជ្រ

8 ខែវិច្ឆិកា 2017
ព័ត៌មានអចលនទ្រព្យ
8 មើល

ភ្នំពេញ៖ អគារពាណិជ្ជកម្ម Glory International Centre ក្រោមការវិនិយោគរបស់ក្រុមហ៊ុនចិនចំណាយទុនខ្ទង់រយលានដុល្លារអារមេរិក ស្ថិតនៅក្បែរទីក្រុងរណបកោះពេជ្រ ជិតអគារ The Bridge ត្រូវបានរំពឹងថានឹងបើកឲ្យដំណើរកានៅឆ្នាំ២០២៣។

អគារ Glory International Centre អភិវឌ្ឍដោយក្រុមហ៊ុនអចលនទ្រព្យ Yuan Chuang Real Estate នឹងចំណាយទុនវិនិយោគប្រមាណ ២០០ លានដុល្លារអាមេរិក ដោយរួមមាន អគារខុន ផ្សារទំនើប អាផាតមិន សណ្ឋាគារ និងអគារការិយាល័យ។

បើយោងតាមកាសែត Khmer Times ចុះផ្សាយកាលពីដើមខែវិច្ឆិកា លោក ប៉ូ សម្បត្តិ អ្នកតំណាងក្រុមហ៊ុន Yuan Chuang បានលើកឡើងថា អគារ Glory នឹងចាប់ផ្តើមការងារសាងសង់នៅចុងឆ្នាំនេះ ហើយត្រូវការរយៈពេលសាងសង់បួនទៅប្រាំឆ្នាំ ពោលគឺអគារពាណិជ្ជកម្មមួយនេះរំពឹងថានឹងបើកសម្រាប់ការធ្វើអាជីវកម្មនៅឆ្នាំ២០២៣ ឬឆ្នាំ២០២៤ខាងមុខ។

“ដោយសារតែសំណើរនៃកម្ពស់អគារ ក្រុមហ៊ុនបានគិតគួដោយយកចិត្តទុកដាក់ និងល្អិតល្អន់ គ្រឹះនៃអាគារដើម្បីបញ្ជៀសនូវហានិភ័យផ្សេងៗ ហើយដើម្បីប្រាកដថាការសាងសង់ត្រឹមត្រូវតាមក្បូនខ្នាតអន្តរជាតិ”។ នេះបើតាមការលើកឡើងរបស់លោក សម្បត្តិ។

បើតាមការចុះផ្សាយរបស់គេហទំព័រ សមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានឲ្យដឹងថា គម្រោងអភិវឌ្ឍរបស់ក្រុមហ៊ុនចិនដែលមានបទពិសោធន៍លើការវិនិយោគវិស័យអចលនទ្រព្យជាង២៥ ឆ្នាំនេះ នឹងក្លាយជាអគារពាណិជ្ជកម្មខ្ពស់ជាងគេទី២នៅកម្ពុជា បន្ទាប់ពីអគារពាណិជ្ជកម្មថៃ ប៊ុនរ៉ុង ដែលមានកម្ពស់១៣៣ ជាន់៕