អ្នកជំនាញ៖ ទីផ្សារលំនៅឋាននៅកម្ពុជាបន្តនៅទ្រឹង ប៉ុន្តែបើទីតាំងល្អ ផ្ទះនៅតែលក់ដាច់
ឈានចូលដល់ពាក់កណ្តាលឆ្នាំ ២០២៣ ទីផ្សារអចលនទ្រព្យផ្នែកលំនៅឋាននៅកម្ពុជាប្រឈមមុខនឹងការប្រកួតប្រជែងកាន់តែខ្លាំងជាងមុន បូករួមនឹងតម្រូវការធ្លាក់ចុះ។ ការលក់ក្នុងវិស័យនេះ ប្រឈមបញ្ហាកាន់តែខ្លាំងឡើងៗ ដោយមានតែចំនួនគម្រោងខុនដូ និងគម្រោងដីនៅតាមទីតាំងសំខាន់ៗមួយចំនួនប៉ុណ្ណោះ ដែលនៅអាចរក្សាតម្លៃ ឬដំឡើងថ្លៃបន្តិចបន្តួចបាន នេះបើយោងតាមរបាយការណ៍វាយតម្លៃទីផ្សារអចលនទ្រព្យពាក់កណ្តាលឆ្នាំ២០២៣ របស់ក្រុមហ៊ុន CBRE Cambodia។
ក្នុងអំឡុងឆមាសទី១ ឆ្នាំ២០២៣នេះ ក្នុងទីផ្សារលំនៅឋាន មានគម្រោងខុនដូថ្មីចំនួន ៣ ក្នុងនោះមានខុនដូចំនួន ១៦០០ យូនីត បន្ថែមទៀតត្រូវបានសាងសង់បញ្ចប់។ លើសពីនេះទៀត ការបញ្ចប់គម្រោងចំនួន ១០ បានរួមចំណែកជាង ៤.៦០០យូនីតដល់ការផ្គត់ផ្គង់សរុប។ បូកសរុបទាំងអស់ ត្រឹមដំណាច់ឆ្នាំនេះ ការផ្គត់ផ្គង់ខុនដូត្រូវបានគេព្យាករថានឹងកើនដល់ជិត ៥៥.០០០ យូនីត ពោលគឺកើនឡើង ១៦% ពីមួយឆ្នាំទៅមួយឆ្នាំ។
លោកស្រី Kinkesa Kim អគ្គនាយករងនៃក្រុមហ៊ុន CBRE Cambodia មានប្រសាសន៍ថា “ខណៈពេលដែលទីផ្សារអាចនឹងមានការថមថយ ការលក់នៅតែបន្តសម្រាប់គម្រោងណាដែលមានទីតាំងល្អៗ ត្រូវនឹងតម្រូវការរបស់អតិថិជន”។ កត្តាសំខាន់ៗមួយចំនួនដូចជាតម្លៃ ទីតាំង គុណភាពសំណង់ កំណត់ត្រាតាមដានរបស់អ្នកអភិវឌ្ឍ និងទំហំគម្រោងដើរតួយ៉ាងសំខាន់ក្នុងការជំរុញឱ្យការលក់ទទួលបានជោគជ័យ។
សម្រាប់ឆមាសទីមួយនេះដែរ នៅក្នុងវិស័យអចលនទ្រព្យជាប្រភេទដីធ្លី ឃើញថាមានចំនួនទាបបំផុតនៃការបើកដំណើរការគម្រោងក្នុងរយៈពេល ៥ ឆ្នាំចុងក្រោយនេះ ដោយមានតែ ៨គម្រោងថ្មី ប៉ុណ្ណោះ បើប្រៀបធៀបទៅនឹងកំណើនដល់កំពូលពោលគឺ ៨៨ គម្រោង កាលពីឆ្នាំ ២០២០។
សម្រង់តម្លៃលក់ខុនដូសម្រាប់ប្រភេទយូនីតទាំងអស់ លើកលែងតែប្រភេទផ្ទះជាប់គ្នាចេញ បានធ្លាក់ចុះចន្លោះពី ២% ទៅ ៥% បើប្រៀបធៀបទៅនឹងចុងឆ្នាំ ២០២២។ ពីមួយឆ្នាំទៅមួយឆ្នាំ តម្លៃសម្រាប់ប្រភេទយូនីតទាំងនេះ បានធ្លាក់ចុះគួរឱ្យកត់សម្គាល់ចាប់ពី ១៧ % ទៅ ២៣% ។ ផ្ទុយទៅវិញ ប្រភេទផ្ទះជាប់គ្នា ឃើញថាមានការកើនឡើង ៦% នៃតម្លៃលក់ក្នុងរយៈពេលប្រាំមួយខែចុងក្រោយនេះ ជាមួយនឹងការកែតម្រូវបន្តិចបន្តួច -១% ពីមួយឆ្នាំទៅមួយឆ្នាំ។ តម្លៃសមរម្យនៃប្រភេទផ្ទះជាប់គ្នា កាន់តែមានភាពទាក់ទាញចំពោះអ្នកទិញផ្ទះក្នុងស្រុក។
លោកស្រី Kinkesa បន្តថា៖ «ទោះបីជាមានការខិតខំប្រឹងប្រែងក្នុងការផ្តល់នូវតម្លៃប្រកួតប្រជែង លក្ខខណ្ឌនៃការទូទាត់ដែលអាចបត់បែនបាន និងគម្រោងប្រកបដោយភាពច្នៃប្រតិដ្ឋក៏ដោយ ក៏ក្នុងចំណោមគម្រោងអចលនទ្រព្យជាង ២៨០ នៅរាជធានីភ្នំពេញនៅតែមានផ្ទះមិនទាន់លក់ចេញនៅឡើយ»។
“វឌ្ឍនភាពនៃការលក់យឺតបែបនេះ អាចបណ្តាលមកពីកត្តាមួយចំនួនដូចជាការថយចុះនៃប្រាក់ចំណូលគ្រួសារ អតិផរណា អត្រាការប្រាក់ខ្ពស់ និងការកើនឡើងនៃការប្រកួតប្រជែងមិនត្រឹមតែក្នុងចំណោមអ្នកអភិវឌ្ឍប៉ុណ្ណោះទេ ប៉ុន្តែក៏មានអ្នកលក់ដែលមានបញ្ហានៅក្នុងទីផ្សារបន្ទាប់បន្សំផងដែរ” លោកស្រី Kinkesa បញ្ជាក់បន្ថែម។
ដើម្បីជម្នះបញ្ហាប្រឈមទាំងនេះ អ្នកអភិវឌ្ឍកំពុងស្វែងរកយ៉ាងសកម្មនូវវិធីសម្របខ្លួន និងទាក់ទាញអ្នកទិញ។ ចំណាប់អារម្មណ៍ទីផ្សារ នៅតែមានលើការផ្តល់តម្លៃដែលមានភាពប្រកួតប្រជែង ជម្រើសនៃការទូទាត់ដែលអាចបត់បែនបាន និងការណែនាំគម្រោងប្រកបដោយភាពច្នៃប្រតិដ្ឋ ដែលឆ្លើយតបនឹងតម្រូវការដែលកំពុងរីកចម្រើនរបស់អ្នកទិញផ្ទះ។
សរុបមក ទីផ្សារលំនៅឋាននៅកម្ពុជានៅតែបន្តវិវឌ្ឍ ដែលទាមទារឱ្យអ្នកអភិវឌ្ឍរក្សាភាពរហ័សរហួន និងមានភាពឆ្លើយតបបានទៅនឹងសក្ដានុពលទីផ្សារ ដើម្បីធានាបាននូវភាពជោគជ័យ និងនិរន្តរភាពយូរអង្វែង៕
- Video Advertisement -
English 
ខ្មែរ 
