អ្នកឧកញ៉ា ពុង ឃាវ សែ ប្រាប់ពីធនធានធម្មជាតិសំខាន់សម្រាប់វិស័យអចលនទ្រព្យ

• 31 ខែ​មករា 2019
• ព័ត៌មានអចលនទ្រព្យ
• 11 មើល

វិនិយោគិនល្បីល្បាញផ្នែកវិស័យសំណង់និងអចលនទ្រព្យនៅកម្ពុជា អ្នកឧកញ៉ា ពុង ឃាវ សែ ដែលមានគម្រោងរាប់លានដុល្លារអាមេរិកក្នុងដៃបានប្រាប់ឲ្យដឹងពីប្រភពសំខាន់ៗនៃការរីកចម្រើននៃវិស័យទាំងនេះ។

ថ្លែងក្នុងជំនួបរវាងសមាគមអ្នកសាងសង់កម្ពុជា និងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាកាលពីថ្ងៃទី ៣០ ខែ មករា ឆ្នាំ ២០១៩ អ្នកឧកញ៉ា ពុង ឃាវ សែ ប្រធានក្រុមប្រឹក្សាភិបាលនៃធនាគារកាណាឌីយ៉ានិងក្រុមហ៊ុនវិនិយោគទុនអាណិកជនកម្ពុជា OCIC បានឲ្យដឹងថាមានចំណុចសំខាន់ចំនួនពីរដែលនឹងធ្វើឲ្យវិស័យអចលនទ្រព្យនៅតែបន្តរីកចម្រើន។

អ្នកឧកញ៉ា ពុង ឃាវ សែ បានមានប្រសាសន៍ថា៖ «ដើម្បីអភិវឌ្ឍអចលនទ្រព្យឲ្យបាននឹងនរ យើងដឹងហើយថាទីមួយយើងត្រូវមានស្ថេរភាពនយោបាយ ហើយទីពីរត្រូវមានលុយគឺសេដ្ឋកិច្ចត្រូវតែជឿនលឿនទៀត»។

«ឲ្យតែយើងរក្សាស្ថេរភាពនយោបាយមានអ្នកវិនិយោគិនមក!!! ដូចថាយើងមានធនធានធម្មជាតិអញ្ចឹងឯង» អ្នកឧកញ៉ា បានបញ្ជាក់យ៉ាងដូចនេះ។

ជាងនេះទៅទៀត អ្នកឧកញ៉ា ក៏បានឲ្យដឹងថា បច្ចុប្បន្នវិនិយោគិនទុកចិត្តទិញនិងវិនិយោគលើវិស័យសំណង់និងអចលនទ្រព្យនៅកម្ពុជា ក៏ព្រោះតែប្រទេសយើងមានស្ថេរភាពនិងជាពិសេសការបណ្តាក់ទុនយ៉ាងសន្ធឹកសន្ធាប់ពីវិនិយោគិនចិន។

ដូចដែលពាក្យស្លោកពោលថា «ផឹកទឹកឲ្យនឹកដល់ប្រភព ជ្រកក្រោមម្លប់ឲ្យនឹកដល់អ្នកដាំ» អ្នកឧកញ៉ា បានឲ្យដឹងថា «នេះយើងត្រូវនឹកគុណថាអ្នកណាដែលអ្នកជាផ្តល់សេរីភាពឲ្យយើង បើយើងមិនមានសេរីភាពទេយើងមិនអាចមានបាននោះទេ»។

គួររម្លឹកថា ក្រុមហ៊ុនវិនិយោគទុនអាណិកជនកម្ពុជារបស់អ្នកឧកញ៉ា កន្លងមកបានវិនិយោគលើគម្រោងធំៗជាច្រើននៅកម្ពុជាដូចជា ទីក្រុងអភិវឌ្ឍន៍កោះពេជ្រ ទីក្រុងអូទ្បាំព្យា និងជាពិសេសគម្រោងទីក្រុងរណបជ្រោយចង្វារដែលកំពុងដំណើរការអភិវឌ្ឍន៍យ៉ាងសកម្ម។

• អត្ថបទវិភាគ
• អត្ថបទវិភាគ