កម្ពុជាកំពុងស្នើឲ្យអូស្ត្រាលីបន្ថែមថវិការកសាងប្រព័ន្ធថាមពលអគ្គិសនីនិងទឹកស្អាត

• 4 ខែ​មេសា 2019
• ព័ត៌មានអចលនទ្រព្យ
• 8 មើល

រូបភាពដោយ Facebook Hor Channarith

រដ្ឋាភិបាលបានស្នើឲ្យរដ្ឋាភិបាលអូស្ត្រាលីជួយបន្ថែមថវិការទៅលើគម្រោងកសាងប្រព័ន្ធថាមពលអគ្គិសនី និងការផ្គត់ផ្គង់ទឹកស្អាតនៅកម្ពុជា នេះបើយោងតាមលទ្ធផលនៃជំនួបរវាងភាគីទាំងពីរកាលពីថ្ងៃទី ០៣ ខែ មេសា ឆ្នាំ ២០១៩ ។

សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា កិច្ចប្រជុំរវាង ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងលោក Luke Arnold អនុប្រធានបេសកកម្មនៃស្ថានទូតអូស្ត្រាលីប្រចាំនៅកម្ពុជាភាគីទាំងពីរ «បានឯកភាពជាគោលការណ៍លើកសំណើទៅរដ្ឋាភិបាលអូស្ត្រាលីដើម្បីពិនិត្យលទ្ធភាពបន្ថែមកញ្ចប់ថវិកា ៤ លានដុល្លារអូស្រ្តាលី» សម្រាប់បន្តអនុវត្តកម្មវិធីវិនិយោគក្នុងហេដ្ឋារចនាសម្ព័ន្ធឬ Investing In Infrastructure-3i (២០១៥-២០២០) នេះរហូតដល់ឆ្នាំ ២០២១។

រដ្ឋាភិបាលអូស្រ្តាលី កន្លងមក បានសម្រេចផ្តល់ហិរញ្ញប្បទានឥតសំណងប្រមាណ ៤៥ លានដុល្លារអូស្ត្រាលីដល់កម្ពុជាសម្រាប់រយៈពេល ៥ ឆ្នាំ ចាប់ពីឆ្នាំ ២០១៥ ដល់ ២០២០សម្រាប់អនុវត្តកម្មវិធី 3i ខាងលើនេះ។ ក្រោយបញ្ចប់គម្រោងខាងលើនេះ ប្រជាជនប្រមាណ ១ លាននាក់នឹងមានលទ្ធភាពក្នុងការប្រើប្រាស់ទឹកស្អាត និងប្រមាណ ១៥០.០០០នាក់ មានលទ្ធភាពប្រើប្រាស់អគ្គិសនី។

កន្លងមក គម្រោង 3i បានគាំទ្រប្រតិបត្តិករឯកជនចំនួន ៨០ ក្នុងនោះ ប្រតិបត្តិករផ្គត់ផ្គង់ទឹកស្អាតចំនួន ៦១ និងប្រតិបត្តិករផ្គត់ផ្គង់អគ្គិសនីចំនួន ១៩ ហើយក្នុងឆ្នាំ ២០១៩ នេះ គម្រោងនេះនឹងជួយប្រតិបត្តិករផ្គត់ផ្គង់ទឹកស្អាតចំនួន ១៦ បន្ថែមទៀត ដែលនេះនឹងអាចផ្តល់ទឹកស្អាតដល់ប្រជាជនរហូតដល់ទៅ ៦៩.៣២២គ្រួសារបន្ថែមទៀត។

• ចំណេះដឹង និង បទពិសោធន៍
• គម្រោងអភិវឌ្ឍន៍
• ធុរកិច្ច និងទីផ្សារ
• ចំណេះដឹង និង បទពិសោធន៍
• គម្រោងអភិវឌ្ឍន៍
• ធុរកិច្ច និងទីផ្សារ