កម្ពុជាចាប់ដៃជាមួយបារាំងនាំយកគ្រឿងសង្ហារឹមទាន់សម័យមកកាន់ទីផ្សារកម្ពុជា

• 4 ខែ​មេសា 2019
• ព័ត៌មានអចលនទ្រព្យ
• 6 មើល

រូបភាពដោយ Facebook Page Men Sam An Cambodia Deputy Prime Minister

ក្រុមហ៊ុនផ្គត់ផ្គង់គ្រឿងអលង្ការ Linda Gold Crucible បានចាប់ដៃគូជាមួយក្រុមហ៊ុនផ្គត់ផ្គង់គ្រឿងសង្ហារឹមរបស់ប្រទេសបារាំង Conforama ដើម្បីនាំយកគ្រឿងសង្ហារឹមមកកាន់ទីផ្សារកម្ពុជា នេះបើយោងតាមសេចក្តីប្រកាសព័ត៌មាន។

កាលពីថ្ងៃទី ០៣ ខែ មេសា ឆ្នាំ ២០១៩ ក្រុមហ៊ុនទាំងពីរខាងលើបានចុះអនុស្សារណៈយោគយល់គ្នាជាដៃគូពាណិជ្ជកម្មនៅឯសណ្ឋាគារ Raffles Hotel Le Royal ភ្នំពេញ។

ថ្លែងក្នុងពិធីខាងលើ លោកស្រី សុង ធីតា ប្រធានក្រុមហ៊ុន Linda Gold Crucible បានមានប្រសាសន៍ថា ក្រុមហ៊ុនទាំងពីរបានសិក្សាទីផ្សារយ៉ាងល្អិតល្អន់អស់រយៈពេលជាច្រើនខែនៅកម្ពុជា ហើយការចាំដៃគូនេះ គឺជារឿងដ៏គួរឲ្យមោទនភាព ដោយហេតុថា ក្រុមហ៊ុន Conforama គឺជាក្រុមហ៊ុនយក្សមួយដែលជាប់ចំណាត់ថ្នាក់លេខ១នៅប្រទេសបារាំង និងចំណាត់ថ្នាក់លេខ២នៅអឺរ៉ុប។

ជាមួយគ្នានេះដែរ លោក Stanislas Conseiller តំណាងក្រុមហ៊ុន Conforama បានឲ្យដឹងថា ការសម្រេចចិត្តមកវិនិយោគនៅកម្ពុជាគឺដោយហេតុថា កម្ពុជាមានស្ថិរភាពសេដ្ឋកិច្ចនិងកំពុងមានការអភិវឌ្ឍន៍ឥតឈប់ឈរ ដែលនេះ នឹងធ្វើឲ្យអតិថិជនវ័យក្មេងមានឱកាសទទួលបានគ្រឿងសង្ហារឹមដែលទាន់សម័យ គុណភាពល្អ និងតម្លៃសមរម្យ។ លោកបានបន្ថែមទៀតថា កត្តាទាំងនេះ នឹងអាចជម្រុញឲ្យក្រុមហ៊ុន Conforama មានលទ្ធភាពក្នុងការពង្រីកហាងយ៉ាងលឿននៅប្រទេសកម្ពុជា។

បច្ចុប្បន្ននេះ តាមការបញ្ជាក់របស់លោក Stanislas Conseiller ក្រុមហ៊ុន Conforama មានប្រាក់ចំណូល៣៥០០លានអឺរ៉ូក្នុង១ឆ្នាំៗ និងមានសហការីបម្រើការងារជាង ១៤០០០នាក់ នៅតាមហាងប្រមាណជា ៣៣៧ហាងក្នុងប្រទេសទាំង៨នៅលើពិភពលោក។

• ចំណេះដឹង និង បទពិសោធន៍
• គម្រោងអភិវឌ្ឍន៍
• ធុរកិច្ច និងទីផ្សារ
• ចំណេះដឹង និង បទពិសោធន៍
• គម្រោងអភិវឌ្ឍន៍
• ធុរកិច្ច និងទីផ្សារ