កម្ពុជានឹងត្រូវការលំនៅដ្ឋានជាង ១ លានខ្នងបន្តែមទៀតក្នុងឆ្នាំ ២០៣០

25 ខែឧសភា 2018
ព័ត៌មានអចលនទ្រព្យ
13 មើល

ប្រទេសកម្ពុជានឹងត្រូវការលំនៅដ្ឋានជាង ១លានខ្នងបន្ថែមទៀតក្នុងឆ្នាំ ២០៣០ ដែលក្នុងនោះតម្រូវការក្នុងរាជធានីភ្នំពេញនឹងមានរហូតដល់ទៅ ៨ សែនខ្នង នេះបើយោងទៅតាមរបាយការណ៍របស់អគ្គនាយកដ្ឋានលំនៅដ្ឋាននៃក្រសួងរៀបចំដែនដី នគរូបនីយកម្ម និងសំណង់កាលពីឆ្នាំ ២០១៤។

សេចក្តីថ្លែងការណ៍នេះត្រូវបានលើកឡើងមកពិភាក្សានៅក្នុងកម្មវិធីពិភាក្សារបស់សភាពាណិជ្ជកម្មអឺរ៉ុបនៅកម្ពុជា ឬ EuroCham ស្តីពីលំនៅដ្ឋានតម្លៃសមរម្យនៅកម្ពុជាកាលពី ថ្ងៃទី ២៤ ខែឧសភា កន្លងមកនេះ។

បើយោងតាមរបាយការណ៍របស់កម្មវិធីអភិវឌ្ឍន៍សហប្រជាជាតិ (UNDP) បានឲ្យដឹងថា បច្ចុប្បន្នកម្ពុជាមានប្រជាជនសរុប ១៥,៧ លាននាក់ ដែលក្នុងនោះ ប្រជាពលរដ្ឋជិត ៩,៨ លាននាក់កំពុងប្រឈមនិងបញ្ហាគ្មានលំនៅដ្ឋានសមរម្យរស់នៅ។ ប្រភពដដែលនេះក៏បានបញ្ជាក់ទៀតថា បច្ចុប្បន្នអត្រាកង្វះលំនៅដ្ឋាន (Housing Deficit Rate) នៅក្នុងប្រទេសកម្ពុជាមានរហូតដល់ទៅ ៥៨ភាគរយ។

ផ្ទុយទៅវិញ បើយោងតាមរបាយការណ៍ប្រចាំឆ្នាំរបស់ក្រសួងរៀបចំដែនដី នគរូបនីយកម្ មនិងសំណង់ ចំនួនគម្រោងសាងសង់នៅក្នុងប្រទេសកម្ពុជាបាននិងកំពុងកើនឡើងជាបន្តបន្ទាប់ ដែលក្នុងឆ្នាំ ២០១៧ កន្លងមកនេះមានគម្រោងសាងសង់សរុបចំនួន ៣០៥២ គម្រោង ដោយក្នុងនោះ ២២៩១ ជាគម្រោងលំនៅដ្ឋាន។

ហេតុដូច្នេះទើបមានជាសំណួរចោទសួរថា ហេតុអ្វីបានជាមានប្រជាពលរដ្ឋជិត ៩,៨លាននាក់ កំពុងប្រឈមនឹងបញ្ហាគ្មានលំនៅដ្ឋានសមរម្យរស់នៅ ខណៈដែរគម្រោងលំនៅដ្ឋានកើនឡើងជាបន្តបន្ទាប់?

“កត្តាដែលមូលហេតុនៃបញ្ហានេះគឺការសាងសង់លំនៅដ្ឋានផ្ទុយនឹងតម្រូវការ។ ក្រុមហ៊ុនអ្នកអភិវឌ្ឍន៍ភាគច្រើននៅកម្ពុជាបច្ចុប្បន្នកំពុងផ្តោតលើការសាងសង់លំនៅដ្ឋានសម្រាប់អ្នកដែលមានប្រាក់ចំណូលកម្រិតមធ្យមនិងអ្នកមានប្រាក់ចំណូលខ្ពស់ដូចជា បុរី និង ខុនដូ ជាដើម ដោយអាចភ្លេចគិតថា អ្នកមានប្រាក់ចំណូលទាបដូចជាកម្មកររោងចក្រក៏កំពុងត្រូវការលំនៅដ្ឋានរស់នៅដែរ” កញ្ញា Lang Sok ដែលជាអ្នកវិភាគរបស់អង្គការ UNDP Cambodia បានលើកឡើងយ៉ាងដូច្នេះ។

កញ្ញា បានបន្តទៀតថា វិនិយោគិននិងអ្នកអភិវឌ្ឍន៍គួរតែវិនិយោគលើលំនៅដ្ឋានតម្លៃសមរម្យឲ្យបានច្រើនជាមុនដើម្បីបំពេញនូវតម្រូវការរបស់អ្នកមានប្រាក់ចំណូលទាប។

គួរបញ្ជាក់ផងដែរថា លំនៅដ្ឋានតម្លៃសមរម្យក្នុងប្រទេសកម្ពុជាបច្ចុប្បន្ននៅមានកម្រិតណាស់ ដែលមានប្រមាណជា ២ ទៅ ៣ ក្រុមហ៊ុនប៉ុណ្ណោះដែលកំពុងអភិវឌ្ឍលំនៅដ្ឋានតម្លៃសមរម្យនេះ ដូចជាក្រុមហ៊ុន World Bridge Group ក្រុមហ៊ុន Arakawa Co. , Ltd និងក្រុមហ៊ុន B&BM Development Co., ltd. ជាដើម។

ជាមួយគ្នានេះដែរ តំបន់សេដ្ឋកិច្ចពិសេសភ្នំពេញ (PPSEZ) ក៏កំពុងសហការណ៍ជាមួយនឹង UNDP អភិវឌ្ឍលំនៅដ្ឋានតម្លៃសមរម្យជា ៣០០០ ខ្នងនៅក្បែរតំបន់សេដ្ឋកិច្ចពិសេសភ្នំពេញផងដែរ ដែលគ្រោងនឹងចាប់ផ្ដើមសាងសង់នៅចុងឆ្នាំ ២០១៨នេះ។