កម្ពុជា-វៀតណាម ប្តេជ្ញាបង្កើនការនាំចេញដំឡូងមីស្រស់ពីកម្ពុជាឱ្យបាន ៩លានតោនក្នុង១ឆ្នាំ

• 27 ខែ​តុលា 2025
• Uncategorized @km
• 1 មើល

សហព័ន្ធដំឡូងមីកម្ពុជា និងសមាគមដំឡូងមីវៀតណាម បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីពង្រឹង និងជំរុញការទិញ-លក់ដំឡូងមីរវាងភាគីទាំងពីរ ឱ្យបាន៩លានតោនក្នុងមួយឆ្នាំ។

MoU ធ្វើឡើងនៅថ្ងៃទី២៣តុលា ឆ្នាំ២០២៥ ក្រោមអធិបតីភាពលោកជំទាវស្រី ចម និម្មល រដ្ឋមន្ត្រីក្រសួងពាណិជ្ជកម្ម តំណាងស្ថានទូតវៀតណាមនៅកម្ពុជា, តំណាងធនាគារ ARDB, ធនាគារ SME និងក្រុមហ៊ុនប្រមូលទិញដំឡូងមីកម្ពុជា និងវៀតណាម ព្រមទាំងដៃគូអភិវឌ្ឍន៍ជាច្រើនរូបទៀត។

លោកជំទាវស្រី ចម និម្មល បានឱ្យដឹងថា MoU រវាងសហព័ន្ធដំឡូងមីកម្ពុជា និងសមាគមដំឡូងមីវៀតណាមនាពេលនេះ នឹងពង្រឹងកែលម្អផលិតកម្ម ការកែច្នៃ ព្រមទាំងជំរុញការទិញលក់ដំឡូងមីរវាងកម្ពុជា និងវៀតណាមឱ្យកាន់តែមានភាពប្រសើរឡើង ជាពិសេស វានឹងជួយជំរុញការនាំចេញដំឡូងមីស្រស់ពីកម្ពុជាទៅវៀតណាមដល់កម្រិតប្រមាណ៩លានតោនក្នុង១ឆ្នាំ។

ក្រៅពីការចុះហត្ថលេខារវាងសហព័ន្ធដំឡូងមីកម្ពុជា និងសមាគមដំឡូងមីវៀតណាម ក្រុមហ៊ុនកម្ពុជា-វៀតណាមចំនួន៤ទៀត ក៏បានចុះហត្ថលេខាក្នុងពេលជាមួយគ្នាផងដែរ ដោយទទួលទិញដំឡូងមីស្រស់ពីកម្ពុជា ក្នុងរង្វង់ជាង៣លានតោនក្នុង១ឆ្នាំ។

គួរបញ្ជាក់ថា ការចុះអនុស្សរណៈជំរុញការនាំចេញ ទិញ-លក់ដំឡូងមីស្រស់កម្ពុជាទៅវៀតណាមនាពេលនេះ កើតឡើងក្រោយដំណើរបេសកកម្មរបស់គណៈប្រតិភូក្រសួងពាណិជ្ជកម្ម នៅប្រទេសវៀតណាម កាលពីខែកញ្ញាកន្លងទៅ ដើម្បីផ្គូផ្គង និងភ្ជាប់ទំនាក់ទំនងធុរកិច្ច ស្វែងរកឱកាសទីផ្សារ ជំរុញការនាំចេញដំឡូងមីកម្ពុជាទៅកាន់ទីផ្សារប្រទេសវៀតណាម៕

• Economic and finance