ការប្រែប្រួលតម្លៃដីតាមបណ្តាខេត្តនិងរាជធានីក្នុងរយៈពេល៦ខែចុងក្រោយ

• 24 ខែ​ធ្នូ 2018
• ព័ត៌មានអចលនទ្រព្យ
• 7 មើល

កំណើនសេដ្ឋកិច្ចនិងការអភិវឌ្ឍន៍ខ្ពស់របស់ប្រទេសកម្ពុជាបានធ្វើឲ្យតម្លៃដីធ្លីមានការប្រែប្រួលគួរឲ្យកត់សម្គាល់ជាពិសេសក្នុងរយៈពេល៦ខែចុងក្រោយនៃឆ្នាំ២០១៨នេះ។

កាលពីពេលថ្មីៗនេះ របាយការណ៍វាយតម្លៃថ្មីចងក្រងដោយក្រុមហ៊ុនអចលនទ្រព្យធំមួយនៅកម្ពុជាឈ្មោះថា Key Real Estateបានបង្ហាញតម្លៃដីធ្លីគិតជាមធ្យមសម្រាប់តំបន់មួយចំនួនក្នុងខេត្តនិងរាជធានីបីរួមមាន៖ រាជធានីភ្នំពេញ ខេត្តព្រះសីហនុ និងខេត្តសៀមរាប។

របាយការណ៍ខាងលើបានឲ្យដឹងថា សម្រាប់ខណ្ឌទាំង១២នៅរាជធានីភ្នំពេញ ខណ្ឌដែលដីមានតម្លៃខ្ពស់ជាងគេគឺខណ្ឌដូនពេញដែលក្នុងនោះតម្លៃដីគិតជាមធ្យមក្នុងសង្កាត់ផ្សារថ្មីគឺចន្លោះពី ៥៥០០ ទៅ ១២០០០ ដុល្លារអាមេរិកក្នុងមួយមែ៉ត្រការ៉េសម្រាប់ដីនៅផ្លូវធំ។ ចំពោះខណ្ឌដែលដីមានតម្លៃទាបជាងគេបំផុតនោះគឺខណ្ឌព្រែកព្នៅដែលក្នុងនោះតម្លៃដីគិតជាមធ្យមក្នុងសង្កាត់ពុនសាំងមានតម្លៃពីចន្លោះត្រឹម ២០ ទៅ ៣០០ ដុល្លារអាមេរិកក្នុងមួយមែ៉ត្រការ៉េសម្រាប់ដីនៅតាមបណ្តោយផ្លូវធំ។

ចំពោះខេត្តព្រះសីហនុវិញ តម្លៃដីក៏មានការកើនឡើងយ៉ាងគំហុកផងដែរហើយក្នុងនោះតម្លៃដីខ្ពស់ជាងគេគឺស្ថិតក្នុងសង្កាត់លេខ០៤ក្នុងចំណោមសង្កាត់ដែលយកមកវាយតម្លៃទាំង៤។ តម្លៃដីក្នុងសង្កាត់លេខ០៤ដូចជាតាមបណ្តោយផ្លូវឯករាជ្យជាដើមគឺមានតម្លៃចន្លោះពី ១៥០០ ទៅ ៣០០០ ដុល្លារអាមេរិកក្នុងមួយម៉ែត្រការ៉េ។ ចំពោះតម្លៃដីទាបជាងគេគឺស្ថិតក្នុងសង្កាត់លេខមួយដែលមានតម្លៃគិតជាមធ្យមចន្លោះពី ២០០ ទៅ ៨០០ ដុល្លារអាមេរិកក្នុងមួយម៉ែត្រការ៉េសម្រាប់ទីតាំងផ្លូវធំ។

ដោយឡែក ទឹកដីអង្គរនៃខេត្តសៀមរាបឯណោះវិញ តម្លៃដីត្រូវបានបែងចែកជា៩ប្លុកផ្សេងគ្នាក្នុងខណ្ឌទាំងពីរ។ ក្នុងនោះ តម្លៃដីខ្ពស់ជាងគេគឺស្ថិតក្នុងប្លុងAដែលមានតម្លៃដីមធ្យមចន្លោះពី ៣៥០០ ទៅ ៥៥០០ ដុល្លារអាមេរិកក្នុងមួយម៉ែត្រការ៉េសម្រាប់ទីតាំងផ្លូវធំ។ ចំពោះតម្លៃទាបវិញគឺស្ថិតក្នុងប្លុងIដែលមានតម្លៃត្រឹម ៣០០ ទៅ ១០០០ ដុល្លារអាមេរិកក្នុងមួយម៉ែត្រការ៉េ។

តាមការបញ្ជាក់របស់ក្រុមហ៊ុន Key Real Estateរបាយការណ៍នេះត្រូវបានធ្វើបច្ចុប្បន្នភាពជារៀងរាល់៦ខែម្តងហើយទិន្នន័យដែលទទួលបានគឺផ្អែកទៅលើលទ្ធផលនៃការចងក្រងតម្លៃជាមធ្យមប្រចាំថ្ងៃបន្ទាប់មកបញ្ចូលទៅក្នុងរូបមន្តវាយតម្លៃមធ្យមដែលចងក្រងដោយក្រុមហ៊ុនផ្ទាល់។

• អត្ថបទវិភាគ
• ធុរកិច្ច និងទីផ្សារ
• អត្ថបទវិភាគ
• ធុរកិច្ច និងទីផ្សារ