ការផ្គត់ផ្គង់អគ្គិសនីទូទាំងប្រទេសកើនដល់ ៣,៣៨២មេហ្គាវ៉ាត ឆ្នាំ២០១៩

12 ខែកុម្ភៈ 2020
Uncategorized @km
9 មើល

ការផ្គត់ផ្គង់ថាមពលអគ្គិសនីពីប្រភពផ្សេងៗសរុប កើនដល់ ៣,៣៨២មេហ្គាវ៉ាត ក្នុងឆ្នាំ២០១៩ ដែលមានកំណើន ២៨ ភាគរយ បើធៀបនឹងឆ្នាំ២០១៨។ មន្រ្តីរដ្ឋាភិបាលក៏បានលើកឡើងទៀតថា កំណើនផ្គត់ផ្គង់អគ្គិសនីដែលស្ទុះខ្លាំងនេះ គឺដោយសារតម្រូវការនៃការប្រើប្រាស់របស់ប្រជាពលរដ្ឋដែលកើនឡើង ស្របតាមការរីកចម្រើននៃប្រទេសជាតិ។

តួលេខរបស់ក្រសួងរ៉ែ និងថាមពល បានបង្ហាញថា គិតត្រឹមឆ្នាំ២០១៩ ប្រភពថាមពលធំៗ ដែលកំពង់ដំណើរការមាន វារីអគ្គិសនីចំនួន ០៧ អានុភាពសរុប ១,៣២៨ មេហ្គាវ៉ាត និងស្ថានីយអគ្គិសនីដុតធ្យូងថ្មចំនួន ០៣ អានុភាពសរុប ៦៧៥មេហ្គាវ៉ាត។

លើសពីនេះ ក៏មានថាមពលបានមកពីរោងចក្រដុតប្រេងខ្មៅ និងម៉ាស៊ូត ដែលមានអានុភាព ៦២៧ មេហ្គាវ៉ាត ថាមពលកកើតឡើងវិញ ដែលរួមមានថាមពលសូឡា ១២៣មេហ្គាវ៉ាត និងថាមពលនាំចូលពីប្រទេសជិតខាង រួមមានប្រទេសថៃ វៀតណាម និងឡាវ ៦២៦មេហ្គាវ៉ាត។

ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល បានមានប្រសាសន៍ថា៖ «ឆ្លើយតបទៅនឹងតម្រូវការប្រើប្រាស់ថាមពលដែលមាននិន្នាការកើនឡើង រដ្ឋាភិបាលកំពុងស្វែងរកប្រភពថាមពលមកពីច្រើនប្រភព ដើម្បីភ្ជាប់ចូលបណ្តាញជាតិ ក៏ដូចជាដើម្បីឆ្លើយតបទៅនឹងការប្រើប្រាស់របស់ប្រជាពលរដ្ឋ ឱ្យមានតម្លៃទាប។

ដោយសារកំណើនតម្រូវការប្រើប្រាស់ថាមពលមាននិន្នាការបន្តកើនឡើង រាជរដ្ឋាភិបាល បានអនុម័តគម្រោងផលិតកម្មថាមពលជាច្រើន នៅឆ្នាំ២០១៩។ ក្នុងនោះ គម្រោងផលិតអគ្គិនសីដោយថាមពលព្រះអាទិត្យ ៦គម្រោង រោងចក្រអគ្គិសនីដុតធ្យូងថ្ម១គម្រោង រោងចក្រអគ្គិសនីដុតប្រេងខ្មៅ និងឧស្ម័ន ១គម្រោង និងគម្រោងវារីអគ្គិសនី ១គម្រោង ដែលមាានអនុភាព ១,៥០០ មេហ្គាវ៉ាត់៕