កូរ៉េកំពុងផ្ដល់សំណងដល់ ៣៤៧គ្រួសារ ដែលរងផលប៉ះពាល់ពីគម្រោងវារីអគ្គិសនីស្ទឹងពោធិ៍សាត់១

• Khat Leakhena
• 30 ខែ​កញ្ញា 2020
• 311 មើល

ក្រុមហ៊ុនកូរ៉េ SPHP កំពុងសហការជាមួយនឹងរដ្ឋបាលខេត្តពោធិ៍សាត់ ដោះស្រាយប្តូរទីតាំងលំនៅដ្ឋានថ្មី និងផ្ដល់សំណងដល់ប្រជាពលរដ្ឋ ៣៤៧ គ្រួសារ ដែលរងផលប៉ះពាលពីគម្រោងវារីអគ្គិសនីស្ទឹងពោធិ៍សាត់១។

បើយោងតាមកិច្ចប្រជុំរវាង ឯកឧត្តម ម៉ៅ ធនិន អភិបាលខេត្តពោធិ៍សាត់ និងលោក KIM MYUNG IL អគ្គនាយកក្រុមហ៊ុន SPHP របស់កូរ៉េ កាលពីថ្ងៃទី២៩ ខែកញ្ញា នេះ ភាគីទាំង ២ បានសម្រេចបង្កើតក្រុមការងារពិសេសមួយដើម្បីអនុវត្តការផ្ដល់ជូនសំណងនេះ។

ឯកឧត្តម ម៉ៅ ធនិន បានឱ្យដឹងថា៖ «សំណងនឹងផ្ដល់ឱ្យដល់បងប្អូនដែលបានកាន់កាប់ និងអាស្រ័យផលជាក់ស្តែង ក្នុងទីតាំងដែលបានកំណត់ជាក់លាក់ប៉ុណ្ណោះ។ ហើយតាមការសិក្សាគឺមានសរុប ៣៤៧គ្រួសារ ស្មើនឹង១៤៣៦ នាក់»។

«ដោយឡែក សម្រាប់ទីតាំងលំនៅថ្មីដែលត្រូវផ្តល់ជូនពួកគាត់ សូមឱ្យក្រុមហ៊ុន ក៏ដូចជាភាគីពាក់ព័ន្ធ ត្រូវចុះសិក្សាសារជាថ្មីម្តងទៀត ថាតើដីនៅតំបន់នោះ អំណោយផលទៅលើដំណាំកសិកម្មដែរឬក៏អត់? » ឯកឧត្តមបានបន្ត។

លើសពីនេះ សម្រាប់ផ្ទះដែលសាងសង់ជូនប្រជាពលរដ្ឋ ឯកឧត្តមក៏ស្នើឱ្យក្រុមហ៊ុនស្ថាបនាផ្ទះគំរូមួយខ្នង ដើម្បីឱ្យគណៈកម្មការត្រួតពិនិត្យ និងវាយតម្លៃជាមុនសិន។

មានទីតាំងស្ថិតក្នុងឃុំប្រម៉ោយ ស្រុកវាលវែង គម្រោងវារីអគ្គិសនីស្ទឹងពោធិ៍សាត់១នេះ នឹងមានអានុភាព៨០មេហ្គាវ៉ាត់ ដែលកំពុងសាងសង់ដោយក្រុមហ៊ុនកូរ៉េ SPHP (Cambodia) Co Ltd ក្រោមទុនវិនិយោគប្រមាណជាង ២៣០ លានដុល្លារ ។ ក្រោយបញ្ចប់ការសាងសង់ អគ្គិសនីកម្ពុជានឹងទិញថាមពលពីក្រុមហ៊ុនក្នុងតម្លៃ ០.០៧ដុល្លារ/គីឡូវ៉ាតម៉ោង។ (អានបន្ថែម)

គួរបញ្ជាក់ផងដែរថា បច្ចុប្ប្នកម្ពុជាមានវារីអគ្គិសនីចំនួន៧កន្លែងរួមមាន វារីអគ្គិសនីអាតៃ ឬស្សីជ្រុំ កំចាយ គីរីរម្យ១ គីរីរម្យ៣ តាតៃ និងវារីអគ្គិសនីសេសានក្រោម២។