កូរ៉េខាងត្បូងបង្ហាញកញ្ចប់វិនិយោគក្រៅប្រទេស ១២ ពាន់លានដុល្លារ មុនចូលចរចា FTA ជាមួយកម្ពុជាខែក្រោយ

16 ខែមិថុនា 2020
Uncategorized @km
4 មើល

រដ្ឋមន្ត្រីហិរញ្ញវត្ថុកូរ៉េខាងត្បូង បង្ហើបផែនការផ្ដល់កញ្ចប់ជំនួយក្រៅប្រទេសប្រមាណជាង ១២ ពាន់លានដុល្លារជាជំនួយដល់គម្រោងធំៗក្រៅប្រទេស ដែលវិនិយោគដោយក្រុមហ៊ុនកូរ៉េ មុននឹងចូលកិច្ចចរចាពាណិជ្ជកម្មសេរីជាមួយកម្ពុជានៅខែកក្កដានេះ។

រដ្ឋមន្ត្រីហិរញ្ញវត្ថុកូរ៉េខាងត្បូង លោក ហុង ណាមគី (Hong Nam-ki) បានឱ្យដឹងតាមរយៈសារព័ត៌មាន Business Korea កាលពីថ្ងៃទី១៥ មិថុនា ២០២០នេះថា៖ «ប្រទេសទាំងពីរបានបញ្ចប់ការសិក្សាលទ្ធភាពរួមគ្នាស្តីពីសក្តានុភាពនៃកិច្ចព្រមព្រៀងពាណិជ្ជកម្មសេរី (FTA) កាលពីខែឧសភា ហើយក៏ទើបតែបញ្ចប់ស្រេចបាច់កាលពីសប្តាហ៍មុននេះ។»

លោកបន្តថា៖ «រដ្ឋាភិបាលយើងនឹងបញ្ជូនព័ត៌មាននេះទៅឲ្យរដ្ឋសភាជាតិក្នុងខែនេះមុនពេលចាប់ផ្តើមកិច្ចពិភាក្សាពាណិជ្ជកម្មសេរីទ្វេភាគីនៅខែក្រោយ។»

មុននឹងចាប់ផ្តើមកិច្ចចរចា FTA ជាមួយកម្ពុជា នៅក្នុងកិច្ចប្រជុំសេដ្ឋកិច្ច លោករដ្ឋមន្ត្រី ហុង ក៏បានបង្ហាញពីវិធានការរបស់រដ្ឋាភិបាលកូរ៉េខាងត្បូង ដើម្បីជួយដល់ក្រុមហ៊ុនកូរ៉េដែលវិនិយោគនៅក្រៅបរទេសនិងជួយធ្វើយ៉ាងណាឲ្យសេដ្ឋកិច្ចរបស់ប្រទេសនេះមានភាពសភាពប្រសើរឡើងវិញ។

វិធានការនោះរួមមាន ការផ្ដល់ជំនួយជាង ១២ ពាន់លានដុល្លារ ដើម្បីជួយដល់ក្រុមហ៊ុនកូរ៉េ ដែលបានវិនិយោគលើគម្រោងធំៗក្រៅប្រទេស។ ក្នុងទឹកប្រាក់នេះ រដ្ឋាភិបាលកូរ៉េមានវិធានការ៖

ជ្រើសយកគម្រោងសាងសង់ធំៗក្រៅប្រទេសចំនួន ៣០ គម្រោង ហើយជួយឱ្យក្រុមហ៊ុនកូរ៉េបានចូលរួមក្នុងគម្រោងទាំងនោះ
ផ្ដល់ទឹកប្រាក់ជាង ៣ ពាន់លានដុល្លារ ជាការឧបត្ថម្ភហិរញ្ញវត្ថុ សម្រាប់យកប្រើប្រាស់ផ្សេងៗគ្នា ក្នុងនោះ៖ទីមួយ ទឹកប្រាក់ជាង ១,២ ពាន់លានដុល្លារ សម្រាប់គម្រោងសំណង់ក្រៅប្រទេសទីពីរ ទឹកប្រាក់ ៣៣១ លានដុល្លារសម្រាប់មូលនិធិហេដ្ឋារចនាសម្ព័ន្ធក្រៅប្រទេស និងទីបី ទឹកប្រាក់ ១,៤ ពាន់លានដុល្លារជាការគាំទ្រផ្នែកហិរញ្ញវត្ថុពីក្រុមហ៊ុន Export-Import Bank and Korea Trade Insurance Corp
ផ្ដល់ជូនបណ្តាប្រទេសជាដៃគូផ្សេងៗ នូវសេវាកម្មប្រឹក្សាយោបល់ដូចជាតាមរយៈកម្មវិធីភាពជាដៃគូច្នៃនវានុវត្តន៍សេដ្ឋកិច្ច (Economic Innovation Partnership Program), គំរូខេអែសភីថ្មី (a new KSP model) ដើម្បីជួយប្រទេសទាំងនោះរៀបចំផែនការគម្រោងថ្មីៗរួមមានគម្រោងទីក្រុងឆ្លាតវៃផងដែរ

បន្ថែមពីនេះទៅទៀត រដ្ឋាភិបាលកូរ៉េខាងត្បូង នឹងផ្តល់ប្រាក់កម្ចីប្រមាណ ១០ ពាន់លានដុល្លារ ដើម្បីលើកកម្ពស់ការចូលរួមក្នុងគម្រោងថ្មីៗ។

តាមរយៈការខិតខំប្រឹងប្រែងនេះ រដ្ឋាភិបាលកូរ៉េគ្រោងនឹងជួយដល់ក្រុមហ៊ុនទាំងនេះ ឱ្យទទួលបានការបញ្ជាទិញ គិតជាទឹកប្រាក់ប្រមាណ ៣០ ពាន់លានដុល្លារសម្រាប់ឆ្នាំនេះ៕

- Video Advertisement -