កូរ៉េខាងត្បូងយល់ព្រមជួយសាងសង់ស្ពានឆ្លងទន្លេមេគង្គ

• Proeksa Meas
• 12 ខែ​មីនា 2018
• Uncategorized
• 233 មើល

ជំនួបសម្ដែងការគួរសមរវាងឯកឧត្តមទេសរដ្ឋមន្រ្តី ប្រាក់ សុខុន និង ឯកឧត្តម Oh Nak-Young (ប្រភព: MFAIC)

កូរ៉េខាងត្បូងបានយល់ព្រមទទួលសំណើរបស់សម្ដេចនាយករដ្ឋមន្រ្តី ហ៊ុន សែន ក្នុងការជួយសាងសង់ស្ពានមិត្តភាពកម្ពុជា – កូរ៉េ ឆ្លងកាត់ទន្លេមេគង្គពីរាជធានីភ្នំពេញទៅត្រោយម្ខាង។

បើយោងតាមសេចក្តីប្រកាសរបស់ក្រសួងការបរទេសនិងសហប្រតិបត្តិការអន្តរជាតិចេញថ្ងៃទី១២ ខែមីនា ឆ្នាំ២០១៨ សំណើនេះត្រូវបានទទួល បន្ទាប់ពីជំនួបសម្ដែងការគួរសមរវាងឯកឧត្តមទេសរដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេសនិងសហប្រតិបត្តិការអន្តរជាតិ និង ឯកឧត្តម Oh Nak-Young ឯកអគ្គរដ្ឋទូតថ្មីនៃសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា កាលពីថ្ងៃទី៩ ខែមីនា ឆ្នាំ២០១៨។

កម្ពុជាមានស្ពានមិត្តភាព ពីប្រទេសចិន និងជប៉ុនរួចទៅហើយ ដូច្នេះកម្ពុជានឹងមានសេចក្តីរីករាយយ៉ាងខ្លាំងដែលមានស្ពានមិត្តភាពកម្ពុជា – កូរ៉េផងដែរ បើយោងតាមប្រសាសន៍របស់សម្ដេចនាយករដ្ឋមន្រ្តី ហ៊ុន សែន ក្នុងជំនួបសម្ដែងការគួរសម និងដាក់សំណើជាមួយឯកឧត្តមឯកអគ្គរដ្ឋទូត Oh Nak-Young កាលពីខែកុម្ភៈកន្លងមកនេះ។

ដោយឡែក ក្រសួងមិនទាន់បានបង្ហាញពីព័ត៌មានលម្អិត ដូចជាថវិកា ឬកាលបរិច្ឆេទសាងសង់នៃស្ពានថ្មីនេះនៅឡើយទេ។

ក្រៅពីការទទួលសំណើនេះជំនួបសម្ដែងការគួរសមនេះក៏ចាត់ទុកថាជាការស្វាគមន៍យ៉ាងកក់ក្តៅចំពោះការវិលត្រឡប់មកវិញរបស់ ឯកឧត្តម Oh Nak-Young បន្ទាប់ពីចាកចេញពីប្រទេសកម្ពុជារយៈពេល ១០ឆ្នាំ។ លោកទេសរដ្ឋមន្ដ្រី ប្រាក់ សុខុន ក៏បានសម្តែងកតញ្ញូតាចំពោះជំនួយឧបត្ថម្ភលើគ្រប់វិស័យ ដែលរដ្ឋាភិបាលកូរ៉េបានផ្តល់ជូនកម្ពុជាកន្លងមក។

លើសពីនេះ ភាគីទាំងពីរក៏បានសំណេះសំណាលលើកិច្ចពិភាក្សាការទូតជាច្រើនទៀត ដែលភាគច្រើនផ្តោតសំខាន់ទៅលើកិច្ចសហប្រតិបត្តិការរវាងក្របខ័ណ្ឌទ្វេភាគីអាស៊ាន-កូរ៉េ និងមេគង្គ-កូរ៉េ។