កូរ៉េជួយរថយន្តសង្គ្រោះបន្ទាន់ ១៥គ្រឿង ដល់កម្ពុជា ដើម្បីបំពេញតម្រូវការទូទាំងប្រទេស

• 14 ខែ​តុលា 2023
• Uncategorized @km
• 9 មើល

ទីភ្នាក់ងារសហប្រតិបត្តិការអន្តរជាតិកូរ៉េ ការិយាល័យកយកា (KOICA) បានផ្តល់ជូនរថយន្តសង្គ្រោះបន្ទាន់ចំនួន១៥គ្រឿង ដល់កម្ពុជា ដើម្បីឆ្លើយតបទាន់ពេលចំពោះករណីសង្គ្រោះបន្ទាន់នានាទូទាំងប្រទេស។

នេះបើតាមពិធីប្រគល់-ទទួលក្រោមអធិបតីភាព ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងមានការចូលរួមជាកិត្តិយសដោយ ឯកឧត្តម PARK Jung-Wook ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំនៅកម្ពុជា កាលពីថ្ងៃទី១៣​ ខែតុលា ឆ្នាំ២០២៣។

ឯកឧត្តមឯកអគ្គរដ្ឋទូតវិសាមញ្ញ បានឱ្យដឹងថា រថយន្តសង្គ្រោះបន្ទាន់ទាំងនេះ នឹងរួមចំណែកដល់ការផ្តល់សេវាសុខាភិបាលកាន់តែមានប្រសិទ្ធភាព និងការឆ្លើយតបទាន់ពេលចំពោះករណីសង្គ្រោះបន្ទាន់នានាទូទាំងប្រទេស។

ឯកឧត្តមឯកអគ្គរដ្ឋទូត បាននឹងកំពុងជួយដល់មន្ទីរពេទ្យជាច្រើននៅទូទាំងប្រទេសកម្ពុជា ដូចជាអគារពេទ្យភ្នែក អគារត្រចៀក ច្រមុះ និងបំពង់ក នៅមន្ទីរពេទ្យព្រះអង្គឌួង អគារថែទាំសុខភាពមាតា និងទារក ក្នុងខេត្តរតនគិរី និងមណ្ឌលគិរី ការពង្រឹងហេដ្ឋារចនាសម្ព័ន្ធវេជ្ជសាស្រ្ត និងសមត្ថភាពបុគ្គលិកសុខាភិបាល។

គួរបញ្ជាក់ថា ការផ្តល់ជូននេះ ស្ថិតក្រោមការឧបត្ថម្ភពីរដ្ឋាភិបាលកូរ៉េ នៃគម្រោង “ODA KOREA: Building TRUST (Transparency, Resilience, Unity and Safety Together)” តាមរយៈ ទីភ្នាក់ងារសហប្រតិបត្តិការអន្តរជាតិកូរ៉េ ការិយាល័យ (KOICA) កម្ពុជា ដែលក្នុងរយៈពេល  ២០ឆ្នាំចុងក្រោយនេះ KOICAបានចូលរួមចំណែកយ៉ាងសកម្មក្នុងការអភិវឌ្ឍន៍វិស័យសុខាភិបាលជាមួយនឹងទឹកប្រាក់ចំនួន 78 លានដុល្លារ។

ក្នុងនោះថ្មីៗនេះ KOICAក៏បានជួយសង់អគារមន្ទីរពេទ្យដ៏ប្រណិតជាមួយនឹងបច្ចេកវិទ្យាខ្ពស់ និងឧបករណ៍វេជ្ជសាស្ត្រទាន់សម័យផ្សេងៗ នៅមន្ទីរពេទ្យព្រះអង្គឌួងផងដែរ។ (អានបន្ថែម)

• Investment and Funding
• Cooperation and networking