ក្នុង១ ខែដើមឆ្នាំ CDC អនុម័តគម្រោងវិនិយោគសរុប ២៥ គម្រោងតម្លៃជាង ២,៥ពាន់លានដុល្លារ

• Kongleaphy Keam
• 2 ខែ​កុម្ភៈ 2022
• Uncategorized
• 148 មើល

នៅក្នុងរយៈពេល១ខែដំបូងដើមឆ្នាំ២០២២ ក្រុមប្រឹក្សាអភិវឌ្ឈន៍កម្ពុជា បានអនុម័តគម្រោងវិនិយោគសរុបយ៉ាងហោច ២៥ គម្រោង ឬស្មើនឹងទំហំទឹកប្រាក់ជាង ២,៥ ពាន់លានដុល្លារ ក្នុងនោះគម្រោងពាក់ព័ន្ធក្នុងវិស័យសំណង់ ហេដ្ឋារចនាសម្ព័ន្ធ និងអចលនទ្រព្យមានដល់ទៅ ១,៤ ពាន់លានដុល្លារ។

គម្រោងធំជាងគេ គឺគម្រោងបង្កើតអភិវឌ្ឍន៍មណ្ឌលភ័ស្តុភារកម្ម និងកំពង់ផែពហុបំណង ក្រុងបូកគោ ខេត្តកំពត តម្លៃ ១,៣ ពាន់លានដុល្លារ របស់ក្រុមហ៊ុន KAMPOT LOGISTICS AND PORT COMPANY LIMITED។

ដោយឡែក វិស័យអចលនទ្រព្យក៏ទទួលបានគម្រោងធំមួយដែរគឺ សណ្ឋាគារលំដាប់ផ្កាយ៥ របស់ក្រុមហ៊ុន K.B.X INVESTMENT CO., LTD។ សណ្ឋាគារនេះមានតម្លៃ ១២៩ លានដុល្លារអាមេរិក មានចំនួន៥២៨ និងមានទីតាំងស្ថិតនៅមហាវិថីព្រះមុនីវង្ស សង្កាត់បឹងកេងកងទី៣ រាជធានីភ្នំពេញ។

គម្រោងធំមួយទៀតគឺជាគម្រោងសំណង់ក្នុងវិស័យសុខាភិបាល ដែលវិនិយោគដោយក្រុមហ៊ុន PHNOM PENH GENERAL HOSPITAL CO., LTD ក្នុងទឹកប្រាក់ ១៥ លានដុល្លារ ដើម្បីសាងសង់មន្ទីរពេទ្យពហុបំណងចំនួន ២០០គ្រែ ក្នុងខណ្ឌ៧មករា រាជធានីភ្នំពេញ។

លើសពីនេះ គម្រោងវិនិយោគអភិវឌ្ឍន៍វារីអគ្គិសនីស្ទឹងតាតៃលើ អានុភាព ១៥០ MW នៅខេត្តកោះកុង តម្លៃជាង ៣៨៩ លានដុល្លារអាមេរិក ក៏ទើបតែអនុម័តដោយ CDC ក្នុងខែមករា នេះផងដែរ។ ជាក់ស្ដែង គម្រោងនេះ ត្រូវបានរាជរដ្ឋាភិបាលកម្ពុជាបានចុះហត្ថលេខាលើកិច្ចព្រមព្រៀង តាំងពីខែធ្នូ ឆ្នាំ២០២០ មកម្ល៉េះ។

ក្រៅពីគម្រោងធំៗ ខាងលើ ក្រុមប្រឹក្សាអភិវឌ្ឈន៍កម្ពុជាក៏បានបានអនុម័តគម្រោងផ្សេងៗទៀត ដូចជា រោងចក្រកាត់ដេរសម្លៀកបំពាក់ រោងចក្រផលិតកាបូប ថាមពលអគ្គីសនី កែច្នៃផលិតផលកសិកម្មជាដើម … ។ល។