ក្បាលផ្លូវចូលមហាវិថីសម្ដេចតេជោ (ផ្លូវ៦០ម៉ែត្រ) ត្រង់ចំណុចតភ្ជាប់ផ្លូវ ២៧១ ត្រូវបានពង្រីករួចរាល់

• Sommana Yan
• 13 ខែ​មេសា 2020
• Uncategorized
• 527 មើល

មហាវិថីសម្តេចតេជោ ហ៊ុន សែន (ផ្លូវ៦០ម៉ែត្រ) ដែលមានលំហផ្លូវតូច នៅចំណុចប្រសព្វផ្លូវ២៧១ ត្រង់ច្រមុះជ្រូកក្បាលថ្នល់ ត្រូវបានពង្រីកឱ្យធំតាមទំហំពេញលេញរួចរាល់ហើយ បន្ទាប់ពីបានដោះស្រាយផលប៉ះពាល់ចប់សព្វគ្រប់។

កន្លងមកការដោះស្រាយ ផលប៉ះពាល់ទៅលើលំនៅឋានប្រជាពលរដ្ឋ ធ្វើឱ្យដំណើរការពង្រីកផ្លូវ អូសបន្លាយពេល។ ក៏ប៉ុន្តែនាពេលនេះ ប្រជាពលរដ្ឋបានព្រមព្រៀង និងទទួលយកការដោះស្រាយ រហូតអាចឲ្យក្រុមហ៊ុនឈានដល់ការលំហផ្លូវតូច នៅចំណុចប្រសព្វផ្លូវ២៧១ ត្រង់ច្រមុះជ្រូកក្បាលថ្នល់ ហើយត្រូវ បានពង្រីកឱ្យធំតាមទំហំពេញលេញតែម្តង។

កាលពីមុនច្រកចូលមហាវិថីសម្តេចតេជោ ហ៊ុន សែន នៅចំណុចប្រសព្វផ្លូវ២៧១ ត្រង់ច្រមុះជ្រូកក្បាលថ្នល់មានទំហំតែ ២០ម៉ែត្រ ដែលមានលក្ខណៈតូចចង្អៀតពិបាកធ្វើដំណើរប្រឈមការ កកស្ទះចរាចរណ៍ជាប្រចាំ។ បន្ទាប់ពីបានដោះស្រាយផលប៉ៈពាល់ជូនប្រជាពលរដ្ឋចប់សព្វគ្រប់ ពេលនេះ ក្រុមហ៊ុន ក៏បានធ្វើការចាក់អ៊ុតកៅស៊ូ ទំហំ៣០ម៉ែត្រ ជាមួយចិញ្ចើម១៥ម៉ែត្រ រួចរាល់។ ផ្លូវក៏បានរីកកាន់តែធំ ហើយបងប្អូនប្រជាពលរដ្ឋ ក៏បានធ្វើដំណើរឆ្លងកាត់ បានងាយស្រួលជាងមុនច្រើន។

គួរបញ្ជាក់ផងដែរថា មហាវិថីសម្តេចតេជោ ហ៊ុន សែន ឬហៅថាផ្លូវ ៦០ម៉ែត្រនេះ ត្រូវបានបើកសម្ពោធកាលពីថ្ងៃទី០៣ ខែមេសា ឆ្នាំ២០១៧ ក្រោមអធីបតីសម្តេចតេជោ ហ៊ុន សែន។ មហាវិធីដ៏ធំនេះ មានប្រវែងសរុប ៩,១៦០ម៉ែត្រ មានទទឹងអ៊ុតកៅស៊ូ ៣០ម៉ែត្រ និងមានចិញ្ចើមផ្លូវ ១៥ម៉ែត្រសងខាងសរុប ៦០ម៉ែត្រ ដែលស្ថាបនា ដោយក្រុមហ៊ុន ING Holding Co., Ltd ចំណាយប្រាក់ ៧៦ លានដុល្លារអាមេរិក។ (អានបន្ថែម)

មហាវិថីនេះ ឆ្លងកាត់បឹងជើងឯក និងបឹងទំពុន ភ្ជាប់ពីផ្លូវលេខ២៧១ ត្រង់ចំណុចច្រមុះជ្រូកក្បាលថ្នល់ ជាមួយផ្លូវជាតិលេខ២ ត្រង់ចំណុចព្រែកកំពឹស ក្រុងតាខ្មៅ ខេត្តកណ្តាល។ ផ្លូវយុទ្ធសាស្ត្រនេះ ដែលនឹងជំរុញកំណើនសេដ្ឋកិច្ចទីផ្សារ បានយ៉ាងល្អប្រសើរ ខណៈដែល ក្រុមហ៊ុនអភិវឌ្ឍផ្សារទំនើបដ៏ធំរបស់ជប៉ុន AEON MALL Co., Ltd បានសម្រេចប្រកាសទីតាំងផ្សារទំនើបទី៣របស់ខ្លួនលើមហាវិធីនេះផងដែរ៕​​​ (អានបន្ថែម)