ក្រសួងរៀបចំដែនដី នគរូបនីយកម្ម និងសំណង់ ចេញសេចក្តីសម្រេចលើប្លង់ស្ថាបត្យកម្ម

23 ខែសីហា 2018
Uncategorized
8 មើល

ដើម្បីធានាបានសុវត្ថិភាពនិងភាពងាយស្រួលនៃការធ្វើចរាចរណ៍របស់ប្រជាពលរដ្ឋជាពិសេសជនពិការ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីសម្រេចស្តីពីការដាក់ឲ្យប្រើប្រាស់ប្លង់ស្ថាបត្យកម្មចិញ្ចើមផ្លូវ ផ្លូវថ្មើរជើង និងគន្លងផ្លូវទោចក្រយានទូទាំងរាជធានី-ខេត្ត។

សេចក្តីសម្រេចខាងលើគឺបានចុះហត្ថលេខាដោយឯកឧត្តមទេសរដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី ៦ ខែមិថុនា ឆ្នាំ ២០១៨។

យោងតាមសេចក្តីសម្រេចខាងលើ គណៈកម្មាធិការរៀបចំដែនដី និងនគរូបនីយកម្មថ្នាក់រាជធានី ខេត្ត និងគណៈកម្មាធិការរៀបចំដែនដី និងនគរូបនីកម្មថ្នាក់ក្រុង ស្រុក ខណ្ឌ ត្រូវរៀបចំផែនការយុទ្ធសាស្រ្ត និងផែនការសកម្មភាពសម្រាប់អនុវត្តប្លង់ស្ថាបត្យកម្មខាងលើនេះ ដើម្បីធានាបាននូវប្រសិទ្ធភាពខ្ពស់។ លើសពីនេះទៅទៀត គណៈកម្មាធិការរៀបចំដែនដី និងនគរូបនីយកម្ម ថ្នាក់ក្រោមជាតិ ត្រូវរាយការណ៍អំពីវឌ្ឍនភាពនៃការងារជាប្រចាំជូនដល់គណៈកម្មាធិការថ្នាក់ជាតិផងដែរ។

សូមបញ្ជាក់ផងដែរថា សេចក្តីសម្រេចនេះខាងលើនេះ ក៏ត្រូវបានភ្ជាប់ជាមួយនូវឧបសម្ព័ន្ធនៃសេចក្តីណែនាំអំពីប្លង់ស្ថាបត្យកម្មគោលសម្រាប់ការចុះរៀបចំផងដែរ។