ក្រសួងរ៉ែបើកឱ្យឯកជនដេញថ្លៃធ្វើអាជីវកម្មបូមខ្សាច់លើទីតាំងទំហំជាង២ពាន់ហិកតានៅខេត្តពីរ

• 5 ខែ​មករា 2021
• ព័ត៌មានអចលនទ្រព្យ
• 7 មើល

ក្រសួងរ៉ែ និងថាមពល បានប្រកាសជ្រើសរើសក្រុមហ៊ុនធ្វើអាជីវកម្មល្បាយខ្សាច់នៅលើទីតាំងចំនួន ០៧កន្លែង លើផ្ទៃសរុបប្រមាណ ២១៤៣,២ ហិកតា ដោយក្នុងនោះ ៣ទីតាំងនៅខេត្តកោះកុង និង ៤ទីតាំងទៀតនៅខេត្តព្រះសីហនុ។ នេះបើយោងតាមលិខិតចុះថ្ងៃទី៣០ ខែធ្នូ ឆ្នាំ២០២០ របស់ក្រសួងរ៉ែ និងថាមពល។

ទីតាំងដែលស្ថិតក្នុងខេត្តកោះកុង រួមមាន ទីតាំងទី១ ស្ថិតនៅឃុំតានូន ស្រុកបូទុមសាគរ មានទំហំ ១០៩ហិកតា ទីតាំងទី២ ស្ថិតនៅឃុំអណ្តូងទឹក និងឃុំកណ្តាល ស្រុកបូទុមសាគរ មានទំហំ ៨៨២ហិកតា និងទីតាំងទី៣ ស្ថិតនៅឃុំដងពែង ឃុំជីខក្រោម និងឃុំជ្រោយស្វាយ ស្រុកស្រែអំបិល មានទំហំ ៤៦៤ហិកតា។

ចំណែកឯ ទីតាំងដែលស្ថិតក្នុងខេត្តព្រះសីហនុរួមមាន ទីតាំងទី១ ស្ថិតនៅឃុំកែវផុស ស្រុកស្ទឹងហាវ មានទំហំ ៣១៨,៧០ហិកតា ទីតាំង២ ស្ថិតនៅឃុំទំនប់រលក ស្រុកស្ទឹងហាវ មានទំហំ ៨១,៥០ហិកតា ទីតាំងទី៣ ស្ថិតនៅឃុំអូរជ្រៅ ស្រុកព្រៃនប់ មានទំហំ ៦០ហិកតា និងទីតាំងទី៤ ស្ថិតនៅឃុំរាម និងឃុំអូរជ្រៅ ស្រុកព្រៃនប់មានទំហំ ២២៨ហិកតា។

បើតាមលិខិតដដែលនេះ ក្រុមហ៊ុនដែលមានបំណងធ្វើអាជីវកម្ម ត្រូវដាក់ពាក្យប្រកួតប្រជែងជាសាធារណៈ នៅនាយកដ្ឋានអាជីវកម្មរ៉ែខ្សាច់សំណង់ ដោយភ្ជាប់មកជាមួយនូវច្បាប់ចម្លងវិញ្ញាបនបត្រពាណិជ្ជកម្មផងដែរ។

គួរបញ្ជាក់ដែរថា កាលពីពេលថ្មីៗនេះ ក្រសួងរ៉ែ និងថាមពល បានសម្រេចចេញអាជ្ញាបណ្ណដល់ក្រុមហ៊ុនឯកជនចំនួន ២កន្លែង ដើម្បីបន្តរុករករ៉ែលើផ្ទៃដីសរុបជាង ២ម៉ឺនហិកតានៅក្នុងខេត្តត្បូងឃ្មុំ និងខេត្តរតនគិរី។ (អានបន្ថែម)

• ថាមពល និងបរិស្ថាន
• គម្រោងអភិវឌ្ឍន៍
• គម្រោងអភិវឌ្ឍន៍
• ថាមពល និងបរិស្ថាន