ក្រសួងសាធារណការកំពុងសិក្សារកទីតាំងសាងសង់ស្ពានតភ្ជាប់ខេត្តក្រចេះ-កំពង់ធំ

• 26 ខែ​កក្កដា 2019
• Uncategorized @km
• 5 មើល

ក្រសួងសាធារណការ និងដឹកជញ្ជូនកាលពីថ្ងៃទី ២៣ ខែកក្កដា បានចុះសិក្សាស្វែងរកទីតាំងដើម្បីសាងសង់ស្ពានតភ្ជាប់ពីខេត្តក្រចេះទៅកាន់ខេត្តកំពង់ធំដែលនឹងជួយចូលរួមចំណែកយ៉ាងខ្លាំងដល់វិស័យដឹកជញ្ជូននៅកម្ពុជា។

ថ្លែងក្នុងកិច្ចសម្ភាសន៍បន្ទាប់ពីចុះត្រួតពិនិត្យពីស្ថានភាពផ្លូវលេខ៧ ខេត្តស្ទឹងត្រែង-ក្រចេះ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា ក្រសួងកំពុងស្វែងរកទីតាំងអំណោយផលណាមួយសម្រាប់សាងសង់ស្ពានឆ្លងកាត់ទន្លេមេគង្គដោយតភ្ជាប់ខេត្តក្រចេះទៅកាន់ខេត្តកំពង់ធំ។

តាមការបញ្ជាក់របស់ ឯកឧត្តម ស៊ុន ចាន់ថុល ស្ពានមួយខ្សែនេះមានប្រវែង ១,៧៦១ ម៉ែត្រដែលនឹងត្រូវសាងសង់ឡើងក្រោមថវិកាកម្ចីសម្បទានពីសាធារណរដ្ឋប្រជាមានិតចិនដោយប្រើប្រាស់រយៈពេលចន្លោះពី ២ ទៅ ៣ ឆ្នាំ ក្នុងការសាងសង់។

គម្រោងនេះ គឺស្ថិតក្រោមគម្រោងអភិវឌ្ឍន៍សម្រាប់ឆ្នាំ ២០២០ ដោយឡែក ចំពោះការចាប់ផ្តើមសាងសង់វិញ ឯកឧត្តម ស៊ុន ចាន់ថុល បញ្ជាក់ថា គម្រោងនេះនឹងមិនអាចបើកការដ្ឋានសាសង់មុនឆ្នាំ២០២១នោះទេ។

ចំពោះទីតាំងជាក់លាក់ ក្រសួងកំពុងសិក្សានៅឡើយ ក៏ប៉ុន្តែ ស្ពានមួយខ្សែនេះ អាចនឹងត្រូវសាងសង់ឆ្ងាយពីទីក្រុងបន្តិច ដើម្បីអាចឲ្យខេត្តក្រចេះមានឱកាសពង្រីកខ្លួនបន្ថែមទៀតនាពេលអនាគត នេះបើតាមប្រសាសន៍ដដែលរបស់ឯកឧត្តម ស៊ុន ចាន់ថុល ។

ក្រៅពីការសាងសង់ស្ពាននេះ ក្រសួងក៏បាននិងកំពុងសិក្សាលទ្ធភាពសាងសង់ស្ពានឆ្លងកាត់ទន្លេមេគង្គនៅតាមបណ្តាខេត្តមួយចំនួនទៀតផងដែរ។ ជាក់ស្តែង ថ្មីៗនេះក្រសួងក៏កំពុងសិក្សាលទ្ធភាពសាងសង់ស្ពានថ្មីស្រឡាងនិងវែងជាងគេនៅកម្ពុជាដែលតភ្ជាប់ពីខេត្តកំពង់ឆ្នាំងទៅកាន់ខេត្តកំពង់ធំ។ អានបន្ថែម

• អត្ថបទវិភាគ
• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម
• Analysis
• អត្ថបទវិភាគ
• Projects Development
• គម្រោងអភិវឌ្ឍន៍
• Urbanization and Architect