ក្រុង១ក្នុងខេត្តកំពង់ស្ពឺ ទទួលបានគម្រោងបង្កើតរោងចក្រដ៏ធំ តម្លៃជិត៦លានដុល្លារ

Sommana Yan
5 ខែកញ្ញា 2025
ព័ត៌មានក្នុងស្រុក
141 មើល

ក្រុងឧត្តុង្គម៉ែជ័យនឹងមានការជំរុញសេដ្ឋកិច្ចយ៉ាងខ្លាំងជាមួយនឹងគម្រោងបង្កើតរោងចក្រផលិតសម្ភារកីឡាដ៏ធំមួយក្រោមទុនវិនិយោគជិត ៦លានដុល្លារ។ គម្រោងបង្កើតរោងចក្រនេះនឹងអាចបង្កើតឱកាសការងារប្រមាណ ២៤២កន្លែង សម្រាប់ប្រជាពលរដ្ឋនៅក្នុងតំបន់។

បើតាមការប្រកាសរបស់ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា បច្ចុប្បន្ន ក្រុមហ៊ុន HORIZON PRIME (CAMBODIA) CO.,LTD បានចុះបញ្ជីជាផ្លូវការនូវគម្រោងវិនិយោគមានលក្ខណៈសម្បត្តិគ្រប់គ្រាន់រួចរាល់ហើយ ដើម្បីបង្កើតរោងចក្រខាងលើនេះ ដោយមានទីតាំងនៅភូមិដំណាក់ស្មាច់ សង្កាត់វាលពង់ ឧត្តុង្គមានជ័យ។

ការវិនិយោគមួយនេះ បានឆ្លុះបញ្ជាំងបន្ថែមនូវទិដ្ឋភាពឧស្សាហកម្មដែលកំពុងរីកចម្រើននៅក្នុងតំបន់។ ខណៈក្នុងរយៈពេលប្រាំពីរខែដំបូងនៃឆ្នាំ២០២៥នេះ នៅទូទាំងប្រទេសកម្ពុជាមាន គម្រោងវិនិយោគថ្មីចំនួន ៤៤០ ត្រូវបានអនុម័ត ក្រោមទុនវិនិយោគសរុបប្រមាណ ៦,៧ពាន់លានដុល្លារ ដែលនេះជាតួលេខដែលលើសពីចំនួនសរុបនៃការវិនិយោគសរុបក្នុងឆ្នាំ២០២៤ និងតំណាងឱ្យអត្រាការអនុម័តខ្ពស់បំផុតក្នុងរយៈពេលជាង ៣០ឆ្នាំចុងក្រោយនេះ បើគិតចាប់តាំងពីការចាប់ផ្តើមរបស់ CDC ។ (អានបន្ថែម)

ជាមួយនឹងរោងចក្រថ្មីនេះ អាជ្ញាធរមូលដ្ឋានរំពឹងថា វាមិនត្រឹមតែជួយជំរុញឱកាសការងារប៉ុណ្ណោះទេ ប៉ុន្តែថែមទាំងជួយការលើកកម្ពស់សេដ្ឋកិច្ចក្នុងស្រុក ស្របតាមកិច្ចខិតខំប្រឹងប្រែងជាបន្តបន្ទាប់របស់រដ្ឋាភិបាលក្នុងការទាក់ទាញការវិនិយោគពីបរទេស និងអភិវឌ្ឍហេដ្ឋារចនាសម្ព័ន្ធនៅក្នុងខេត្តកំពង់ស្ពឺថែមទៀតផង។

- Video Advertisement -