ក្រុមហ៊ុនចិនគ្រោងបង្កើតអគារពាណិជ្ជកម្មតម្លៃ៥០០លានដុល្លារនៅខេត្តកំពង់ស្ពឺ

• Me Wathana
• 11 ខែ​មេសា 2019
• Uncategorized
• 74 មើល

ក្រុមហ៊ុនចិនបានប្រកាសគម្រោងបង្កើតអគារពាណិជ្ជកម្មតម្លៃ៥០០លានដុល្លារអាមេរិកមានទីតាំងស្ថិតនៅខេត្តកំពង់ស្ពឺ នេះបើយោងតាមលទ្ធផលនៃជំនួបរវាងអភិបាលខេត្តជាមួយនឹងក្រុមហ៊ុននៅឯប្រទេសចិន។

កាលពីថ្ងៃទី ១០ ខែមេសា ឆ្នាំ ២០១៩ ឯកឧត្តម វ៉ី សំណាង អភិបាលខេត្តកំពង់ស្ពឺបានប្រាប់ទស្សនាវដ្តីសំណង់ និងអចលនទ្រព្យ យើងខ្ញុំតាមសារអេឡិចត្រូនិច តេឡេក្រាម ថា ក្នុងដំណើរបំពេញទស្សនកិច្ចនៅខេត្តក្វាងទុង ប្រទេសចិនរបស់ឯកឧត្តម មានក្រុមហ៊ុនផលិតទូរសព្ទដៃនិងអភិវឌ្ឍអចលនទ្រព្យ OPPO និង VIVO បានចាប់អារម្មណ៍ចង់ធ្វើការវិនិយោគក្នុងខេត្តកំពង់ស្ពឺ ដែលក្នុងនោះ ក៏មានគម្រោងវិនិយោគបង្កើតអគារពាណិជ្ជកម្មតម្លៃ៥០០លានដុល្លារអាមេរិកក្នុងក្រុងច្បារមន ខេត្តកំពង់ស្ពឺ។

«ខ្ញុំបានជួបអ្នកវិនិយោគផ្ទាល់ ហើយគាត់ប្រាប់ខ្ញុំអញ្ជឹង [គម្រោងបង្កើតអគារពាណិជ្ជកម្ម] ប៉ុន្តែរឿងពិតត្រង់ណានោះ ខ្ញុំអត់ដឹងថាយ៉ាងណាដែរ ក៏ប៉ុន្តែគាត់ថាអញ្ចឹង» ឯកឧត្តម វ៉ី សំណាង បានមានប្រសាសន៍បែបនេះ។

ជាការកត់សម្គាល់ ខេត្តកំពង់ស្ពឺបាននិងកំពុងក្លាយជាកន្លែងប្រកបដោយសក្តានុពលនិងអំណោយផលសម្រាប់វិនិយោគិន ដោយមួយរយៈពេលចុងក្រោយនេះ មានគម្រោងហេដ្ឋារចនាសម្ព័ន្ធជាច្រើនបានកំពុងដំណើរការអភិវឌ្ឍន៍នៅខេត្តមួយនេះ។ ក្នុងនោះរួមមាន គម្រោងផ្លូវល្បឿនលឿនភ្នំពេញ-ព្រះសីហនុតម្លៃ២ពាន់លានដុល្លារអាមេរិកដែលនឹងត្រូវឆ្លងកាត់ខេត្តកំពង់ស្ពឺរហូតដល់៨០គីឡូម៉ែត្រ។ (អានបន្ថែម)

ជាងនេះទៀត រោងចក្រផលិតអគ្គិសនីដើរដោយពន្លឺព្រះអាទិត្យមានអនុភាពផលិតអគ្គិសនីដល់ទៅ ៦០មេហ្គាវ៉ាត់ ព្រមទាំងរោងចក្រឧស្សាហកម្មជាច្រើនទៀត ក៏បាននិងកំពុងអភិវឌ្ឍក្នុងខេត្តនេះផងដែរ។ (អានបន្ថែម)