ក្រុមហ៊ុនជប៉ុនវិនិយោគគម្រោងអេកូទេសចរណ៍ លើដី ១ ម៉ឺនហិកតានៅ គិរីរម្យ

Proeksa Meas
24 ខែមិថុនា 2020
Uncategorized
203 មើល

គម្រោងរបស់ក្រុមហ៊ុនជប៉ុន គិរីរម្យសម្រាប់គ្រប់គ្នា (Kirirom for Everyone) នឹងប្រែក្លាយផ្ទៃដី ១ ម៉ឺន ហិកតា ស្ថិតនៅតំបន់ភ្នំគិរីរម្យឲ្យទៅជាតំបន់មជ្ឍមណ្ឌលសិក្សាវិទ្យាសាស្ត្រ និងអេកូទេសចរណ៍។

គម្រោងដែលហ៊ុមព័ទ្ធដោយព្រៃស្រល់ និងជើងភ្នំ ស្ថិតក្នុងតំបន់គិរីរម្យ ខេត្តកំពង់ស្ពឺនេះ រួមបញ្ចូលទាំងវិទ្យាស្ថាន មណ្ឌលកម្សាន្ត ផ្ទះលំហែ ដែលមានលក្ខណៈជាអេកូទេសចរណ៍ផងដែរ។ គោលបំណងនៃគម្រោងនេះ គឺដើម្បីពង្រឹង និងលើកកម្ពស់គុណតម្លៃវិស័យអប់រំបច្ចេកវិទ្យាព័ត៌មាន និងវិស័យអេកូទេសចរណ៍ ដែលនឹងក្លាយជាកន្លែងសម្រាកសិក្សាសម្រាប់ និស្សិតកម្ពុជា រួមទាំងនិស្សិតជប៉ុន និងបរទេសទៀតផង។

ក្នុងជំនួបពិភាក្សាការងារជាមួយ លោក Bekku Kenzaburo អនុប្រធានក្រុមហ៊ុនជប៉ុន A2A Town Cambodia Co., Ltd កាលពីថ្ងៃទី ២២ មិថុនា ២០២០ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្ដែងការគាំទ្រចំពោះ គម្រោងនេះ និងបានបង្ហាញពីឆន្ទៈពង្រឹងកិច្ចសហប្រតិបត្តិការលើវិស័យ វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាវិស័យទើបបានបញ្ចូលទៅក្នុងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ទៀតផង។

ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី បានលើកឡើងថា៖ “ក្រសួងពិតជាមានតម្រូវការចាំបាច់ណាស់នូវចំណេះដឹង និងធនធានមនុស្ស ផ្នែក វិទ្យាសាស្រ្ត ក៏ដូចជាវិស័យបច្ចេកវិទ្យា និងនវានុវត្តន៌(Innovation) ក្នុងកាលៈទេសៈដែលពិភពលោកកំពុងមានការរីកចម្រើនផ្នែកបច្ចេកវិទ្យា ជាពិសេសសនិន្នាការបដិវត្តន៌ឧស្សាហកម្មជំនាន់ ៤.០ និងសេដ្ឋកិច្ចបែបឌីជីថល។”

ឯកឧត្តមបន្ថែមថា “…យើងទាំងពីរត្រូវសហការគ្នា …សម្រាប់ការងារបណ្តុះបណ្តាលធនធានមនុស្ស …ក៏ដូចជាការឈានឆ្ពោះទៅការបង្កើតសួនបច្ចេកវិទ្យា វិទ្យាសាស្ត្រ ជាដើម”។

ឧទ្យានជាតិព្រះសុរាម្រឹតកុសមៈគិរីរម្យ ជាឧទ្យានជាតិដែលត្រូវបានកំណត់ជាផ្លូវការដំបូងគេនៅប្រទេសកម្ពុជាមានទំហំ ២៨៣,៨ គីឡូម៉ែត្រការ៉េ។ ក្រុមហ៊ុន A2A Town បានទទួលសិទ្ធិក្នុងការអភិវឌ្ឍមូលដ្ឋាននៅឧទ្យានជាតិគិរីរម្យ ចាប់តាំងពីឆ្នាំ ២០១១ លើដីសម្បទានសេដ្ឋកិច្ចដែលមានទំហំ ២០០០ ហិកតា។

គួរបញ្ជាក់ផងដែរថា បច្ចុប្បន្នមានគម្រោងរីស៊តដ៏ល្បីឈ្មោះមួយគឺ vKirirom Pine Resort ព្រមទាំង វិទ្យាស្ថានបច្ចេកវិទ្យាគិរីរម្យ (KIT) សម្រាប់បណ្តុះបណ្តាលជំនាញ វិស្វកម្មកំព្យូទ័រ (software engineering)ជាដើម។ គម្រោងរីស៊ត vKirirom Pine Resort ត្រូវបានសាងសង់ឡើងជាលក្ខណៈផ្ទះលំហែ មានដូចជា បឹងកាឡូ កូនវីឡាតូចៗ ផ្ទះខ្ទមលក្ខណៈខ្មែរ កន្លែងបោះតង់កម្សាន្ត ជាលក្ខណៈគ្រួសារ ដៃគូ និងម្នាក់ឯង។

ក្រៅពីជាកន្លែងរីស៊ត សម្រាប់កម្សាន្ត តំបន់នេះ ក៏ត្រូវបានបង្កើតជាតំបន់អភិវឌ្ឍន៍ប្រកបដោយនិរន្តរភាព ដែលរួមមានការការពារសម្បត្តិធម្មជាតិ ការដាំដុះដំណាំ និងគម្រោងប្រកបដោយនិរន្តរភាពផ្សេងៗទៀត ដែលបង្កើតឡើងដោយនិស្សិតនៃវិទ្យាស្ថានបច្ចេកវិទ្យាគិរីរម្យ (KIT) ផ្ទាល់ផងដែរ៕