ក្រុមហ៊ុនវិភាគអចលនទ្រព្យថៃគ្រោងនឹងពង្រីកអាជីវកម្មមកកាន់កម្ពុជា

• 17 ខែ​ឧសភា 2018
• ព័ត៌មានអចលនទ្រព្យ
• 8 មើល

ក្រុមហ៊ុនរាយនាម និង វិភាគអចលនទ្រព្យ (Property Technology) ដ៏ល្បីល្បាញមួយនៅប្រទេសថៃដែលមានឈ្មោះថា Baaniaកំពុងចរចាជាមួយដៃគូអាជីវកម្មដើម្បីពង្រីកអាជីវកម្មរបស់ខ្លួនមកកាន់ប្រទេសកម្ពុជាក្នុងឆ្នាំ ២០១៩ ខាងមុខនេះ។ ក្នុងនោះដែរពួកគេមានគោលបំណងចំបងគឺដើម្បីពង្រីកអាជីវកម្មរបស់ខ្លួនក្នុងបណ្តាប្រទេសអាស៊ាន នេះបើតាមការរាយការណ៍របស់សារព័ត៌មានThe Nationរបស់ប្រទេសថៃ។

Baaniaគឺជាគេហទំព័រអនឡាញមួយដែលទាក់ទងនឹងការទិញលក់អចលនទ្រព្យបែបគ្រប់ជ្រុងជ្រោយមួយ ដែលផ្តល់សេវាកម្មដូចជា រាយនាមអចលនទ្រព្យដូចជាផ្ទះនិងខុនដូ ស្វែងរកអចលនទ្រព្យ រចនាប្លង់ផ្ទះ វិភាគទិន្នន័យតំរូវការនិងការផ្គត់ផ្គង់ ព្យាករណ៍ទីផ្សារ វិភាគតម្លៃអចលនទ្រព្យផ្ដល់ទិន្នន័យវិនិយោគ ក៏ដូចជាព័ត៌មានទាក់ទងនឹងកម្ចីទិញផ្ទះជាដើម។

សេវាកម្មនេះគឺដើម្បីអោយជួយអ្នកទិញអចលនទ្រព្យងាយស្រួលក្នុងការសម្រេចចិត្តមុននឹងធ្វើការវិនិយោគ ហើយសេវាកម្មនេះអាចប្រើប្រាស់បានដោយឥតគិតថ្លៃ។

Baaniaបច្ចុប្បន្នមានទិន្នន័យវិភាគលើគម្រោងជាង ១៣ ៦២២ គម្រោង ដែលក្នុងនោះមានជាលំនៅដ្ឋានសរុបចំនួន ២,២លានខ្នង និងប្លង់រចនាលំនៅដ្ឋានចំនួន ២៧ ២៩១ប្លង់ ជុំវិញប្រទេសថៃ ហើយកាលពីឆ្នាំមុនមានចំនួនអ្នកប្រើប្រាស់សេវាកម្មសរុបចំនួន ៣ លាននាក់។

លោក AnchanaVallipakornនាយកប្រតិបត្តិប្រចាំក្រុមហ៊ុន Baania (Thailand) បានឱ្យដឹងនៅក្នុងសារព័ត៌មានThe Nationថាក្រុមហ៊ុនកំពុងចរចាជាមួយដៃគូរពាណិជ្ជកម្មដើម្បីពង្រីកអាជីវកម្មទៅកាន់ ៣ ប្រទេសក្នុងអាស៊ានរួមមាន កម្ពុជា ឡាវ និងមីយ៉ាន់ម៉ា ក្នុងឆ្នាំ ២០១៩ ខាងមុខនេះ ក្នុងគោលបំណងដើម្បីបង្កើនប្រាក់ចំណូលទ្វេដងកាលពីឆ្នាំទៅមិញ។

គួរបញ្ជាក់ផងដែរថាសេវាកម្មបែបនេះមិនមែនជាសេវាកម្មថ្មីស្រឡាងសម្រាប់កម្ពុជានោះទេព្រោះមានក្រុមហ៊ុនជាច្រើននៅក្នុងប្រទេសកម្ពុជាកំពុងដំណើរការសេវាកម្មបែបនេះរួចមកហើយឧទាហរណ៍ដូចជា CBRE Cambodia និង Realestate.com.kh ។

ដូច្នេះមានការចោទជាសំណួរថាការមកដល់នៃក្រុមហ៊ុនវិភាគអចលនទ្រព្យក្រៅប្រទេសមកកាន់ប្រទេសកម្ពុជានេះគឺជាការបង្កើនការប្រកួតប្រជែង ឬ ជាការបង្កើនឱកាសទីផ្សារ ពោលគឺជារឿងវិជ្ជមានឬអវិជ្ជមានសម្រាប់ទីផ្សារកម្ពុជា។

• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម
• ធុរកិច្ច និងទីផ្សារ
• គម្រោងអភិវឌ្ឍន៍
• ធុរកិច្ច និងទីផ្សារ