ក្រុមហ៊ុនអចលនទ្រព្យល្បីឈ្មោះសិង្ហបុរី ឈានជើងចូលទីផ្សារកម្ពុជា ត្រៀមបើកគម្រោង ៣ ធំៗ

• 17 ខែ​កុម្ភៈ 2022
• ព័ត៌មានអចលនទ្រព្យ
• 7 មើល

ក្រុមហ៊ុនអចលនទ្រព្យល្បីឈ្មោះ Frasers Hospitality សមាជិកនៃក្រុមហ៊ុន Frasers Property Group នៃប្រទេសសិង្ហបុរី បានឈានជើងចូលទីផ្សារកម្ពុជា ដោយត្រៀមអភិវឌ្ឍគម្រោងអគារអាផាតមិន ៣កន្លែង នៅទីក្រុងភ្នំពេញ។

យោងតាមសេចក្តីប្រកាសព័ត៌មាន ចេញផ្សាយកាលពីពេលថ្មីនេះ គម្រោងទី ១ គឺ អគារ Capri by Fraser មាន ៨៨បន្ទប់ ដោយនឹងបើកដំណើរការនៅខែតុលា ឆ្នាំ២០២២។

គម្រោងទី ២ គឺ អគារ Capri by Fraser មួយទៀត មាន ៧៨បន្ទប់ ដោយនឹងបញ្ចប់ការសាងសង់នៅឆ្នាំ២០២៤។

ដោយឡែក នៅឆ្នាំ ២០២៦ អគារអាផាតមិន Fraser Residence Sen Sok មាន ២០០បន្ទប់ ក៏នឹងបញ្ចប់ការសាងសង់ និងបើកដំណើរការផងដែរ។

លោកស្រី Tonya Khong ប្រធានប្រចាំតំបន់អាស៊ីប៉ាស៊ីហ្វីកនៃក្រុមហ៊ុន Frasers Hospitality បានលើកឡើងថា ក្នុងមួយទស្សវត្សរ៍ចុងក្រោយនេះ រាជធានីភ្នំពេញបានវិវត្តន៍ទៅជាទីក្រុងដែលរីកចម្រើន និងរស់រវើក។

លោកស្រីថា៖ «គួបផ្សំជាមួយនឹងសេដ្ឋកិច្ចដែលមានមនុស្សវ័យក្មេង និងវិធានការស្តារសេដ្ឋកិច្ចពីវិបត្តិកូវីដក៏មានប្រសិទ្ធភាព ក្រុមហ៊ុនជឿជាក់ក្នុងការនាំចូលម៉ាកយីហោបដិសណ្ឋារកិច្ច Frasers មកកម្ពុជា»។

«អចលនទ្រព្យទាំង ៣ នឹងត្រៀមខ្លួនជាស្រេចដើម្បីសម្រួលដល់ការវិលត្រឡប់នៃអ្នកដំណើរ ពិសេសព្រឹត្តិការណ៍កីឡាអាស៊ីអាគ្នេយ៍ ឆ្នាំ ២០២៣ និង RCEP ជាដើម»។

ការឈានចូលប្រទេសកម្ពុជា គឺជាសញ្ញានៃមហិច្ឆតារយៈពេលវែងរបស់ក្រុមហ៊ុនក្នុងការបង្កើនវត្តមានក្នុងទីផ្សារកម្ពុជា និងអាស៊ីអាគ្នេយ៍ បន្ថែមទៀត។

គួរបញ្ជាក់ថា Frasers Property គឺក្រុមហ៊ុនអចលនទ្រព្យរបស់ប្រទេសសិង្ហបុរី ដែលអភិវឌ្ឍ កាន់កាប់ និងគ្រប់គ្រងអចលនទ្រព្យនៅទូទាំងពិភពលោក។ ក្រុមហ៊ុនធ្វើអាជីវកម្មក្នុងវិស័យជាច្រើនដូចជា ពាណិជ្ជកម្ម លំនៅឋាន បដិសណ្ឋារកិច្ច ផ្សារទំនើប ឧស្សាហកម្ម និងដឹកជញ្ជូន។

• គម្រោងអភិវឌ្ឍន៍
• គម្រោងអភិវឌ្ឍន៍