ក្រុមហ៊ុនអឺរ៉ុប កំពុងស្វែងរកឱកាសអភិវឌ្ឍបច្ចេកវិទ្យាវេជ្ជសាស្ត្រទំនើបនៅកម្ពុជា

• 20 ខែ​មិថុនា 2025
• Uncategorized
• 8 មើល

សម្ព័ន្ធក្រុមហ៊ុន European Wellness Biomedical Group កំពុងស្វែងរកឱកាសនៃការអភិវឌ្ឍបច្ចេកវិទ្យាវេជ្ជសាស្ត្រទំនើបនៅកម្ពុជា។ នេះបើតាមជំនួបរវាងឯកឧត្តមសាស្ត្រាចារ្យ ឡឹម តារា រដ្ឋលេខាធិការក្រសួងសុខាភិបាល និងប្រតិភូចម្រុះ ដែលដឹកនាំដោយលោកសាស្ត្រាចារ្យ ម៉ៃ ចាន់ (Maike Chan) ប្រធានសម្ព័ន្ធក្រុមហ៊ុន កាលពីថ្ងៃទី៣ ខែមិថុនា ឆ្នាំ២០២៥។

ក្នុងជំនួបនេះ លោកសាស្ត្រាចារ្យ ម៉ៃ ចាន់ បានឱ្យដឹងថា លោកជាអ្នកវិទ្យាសាស្ត្រវេជ្ជសាស្ត្រទំនើបនៃប្រព័ន្ធភាពស៊ាំ និងការជួសជុលកោសិកា និងជាអ្នកស្រាវជ្រាវ អ្នកនិពន្ធ និងអ្នកបង្កើតថ្មី។

ទន្ទឹមនឹងនេះ លោកបានបញ្ជាក់នូវគោលបំណងនៃជំនួបនេះ គឺដើម្បីពិភាក្សាស្វែងរកឱកាសនៃការអភិវឌ្ឍបច្ចេកវិទ្យា​វេជ្ជសាស្ត្រទំនើបនេះនៅកម្ពុជា។

ដោយឡែក ឯកឧត្តមរដ្ឋលេខាធិការ បានជម្រាបជូនប្រតិភូពីយុទ្ធសាស្ត្រអាទិភាព៩ និងអាទិភាពចម្បង៣ របស់ក្រសួ​ង​​សុខាភិបាលដែលកំពុងដាក់អនុវត្តយ៉ាងសកម្មក្នុងការកែលម្អប្រព័ន្ធសុខាភិបាលនៅកម្ពុជា ទាំងក្នុងវិស័យសាធា​រណៈ និងឯកជន។

ឯកឧត្តម បានបញ្ជាក់បន្ថែមថា ក្រសួងក៏កំពុងយកចិត្តទុកដាក់លើការបណ្តុះបណ្តាលធនធានមនុស្ស និងការពង្រីកសេវាដោយចាប់យកបច្ចេកវិទ្យាថ្មីៗ ដែលមានការទទួលស្គាល់ជាអន្តរជាតិ (ពិសេសពីអង្គការសុខភាពពិភពលោក) និងសមស្របតាមបរិបទកម្ពុជា។

ជាការឆ្លើយតប លោកសាស្ត្រាចារ្យ ម៉ៃ ចាន់ ប្រធានសម្ព័ន្ធក្រុមហ៊ុន European Wellness Biomedical Group បាន​យល់ស្របតាមក្រសួងសុខាភិបាល ហើយនឹងបន្តការពិភាក្សា ដើម្បីបង្កើតឱកាសបណ្តុះបណ្តាលធនធានមនុស្ស​​ទៅលើផ្នែកបច្ចេកវិទ្យាវេជ្ជសាស្ត្រទំនើបៗ ដែលពិភពលោកមានការទទួលស្គាល់ជាបន្តទៅទៀត។

នៅពេលដែលប្រទេសកម្ពុជាស្វែងរកការពង្រឹងសមត្ថភាពផ្នែកថែទាំសុខភាពរបស់ខ្លួន កិច្ចសហប្រតិបត្តិការជាមួយក្រុមហ៊ុនអឺរ៉ុបសន្យាអនាគតដ៏ភ្លឺស្វាងសម្រាប់ការអភិវឌ្ឍបច្ចេកវិទ្យាវេជ្ជសាស្ត្រទំនើប ដែលធានាបាននូវការថែទាំសុខភាពកាន់តែប្រសើរឡើងសម្រាប់ប្រទេសជាតិ។

• Health Facilities Project