ក្រុមហ៊ុន វើលដ៏ប្រ៊ីដហូម ប្រកាសកែសម្រួលគោលការបង់រំលស់គម្រោងលំនៅដ្ឋានតម្លៃសមរម្យ

• 5 ខែ​កុម្ភៈ 2018
• ព័ត៌មានអចលនទ្រព្យ
• 8 មើល

កាលពីថ្ងៃទី 2 ខែកុម្ភៈ ក្រុមហ៊ុន វើលដ៏ប្រ៊ីដ ហូម ឯ.ក បានប្រកាសពីការកែសម្រួលគោលការបង់បង្រ្គប់ប្រាក់កក់ 30 ភាគរយរបស់គម្រោងលំនៅដ្ឋានតម្លៃសមរម្យរបស់ខ្លួន ដោយពន្យាររយៈពេលទូទាត់រហូតដល់ទៅ 24 ខែដើម្បីឆ្លើយតបទៅនឹងសំណើរបស់អតិថិជន ។

លំនៅដ្ឋានតម្លៃសមរម្យគឺជាគម្រោងដែលសាងសង់ដោយ ក្រុមហ៊ុន វើលដ៏ប្រ៊ីដ ហូម ឯ.ក ក្នុងគោលបំណងជួយប្រជាពលរដ្ឋដែលមានប្រាក់ចំណូលទាបឱ្យទិញផ្ទះតម្លៃសមរម្យ។ គម្រោងទាំងមូលមានផ្ទះចំនួន 2457 ខ្នងលើដីទំហំ 24 ហិកតានៅស្រុកស្អាងខេត្តកណ្តាល។ គម្រោងនេះរំពឹងថានឹងបញ្ចប់នៅខែកក្កដាឆ្នាំ 2020 ។

គម្រោងនេះបានទាក់ទាញចំណាប់អារម្មណ៍ប្រជាពលរដ្ឋជាច្រើនដែលរហូតមកដល់ពេលនេះ 11% ត្រូវបានលក់។ ទោះយ៉ាងណាក៏ដោយប្រជាពលរដ្ឋជាច្រើនបានត្អូញត្អែរអំពីគោលការបង់រំលោះដែលពួកគេត្រូវបង់បង្រ្គប់ប្រាក់កក់ 30 ភាគរយនៃតម្លៃផ្ទះក្នុងរយៈពេល 6 ខែ។

«ក្រុមហ៊ុនយើងខ្ញុំ​យល់ពីបន្ទុករបស់ប្រជាពលរដ្ឋ ដែល 6 ខែមានភាពតឹងតែងណាស់សម្រាប់ពួកគាត់ក្នុងបង្រ្គប់ប្រាក់កក់ 30 ភាគរយនៃតម្លៃផ្ទះ។ ដូច្នេះហើយ ដើម្បីជួយសម្រួលបន្ថយបន្ទុករបស់អតិថិជន ក្រុមហ៊ុនយើងខ្ញុំចង់ប្រកាសពីគោលការបង់បង្រ្គប់ប្រាក់កក់ថ្មី» លោក នួន រិទ្ធី តំណាងលក់គម្រោងនេះបានបញ្ជាក់នៅសន្និសីទសារព័ត៌មានកាលពីម្សិលមិញ។

លោក នួន រិទ្ធីបានបន្តថា « ជាមួយនឹងគោលការថ្មីអតិថិជនត្រូវបង់ត្រឹមតែ 5% នៃតម្លៃផ្ទះនៅខែដំបូង។ បន្ទាប់មកពួកគាត់នឹងមានរយៈពេល 24 ខែទៀតដើម្បីបញ្ចប់ការទូទាត់ដោយគ្មានការប្រាក់។ ពួកគាត់អាចជ្រើសរើសបង់បង្រ្គប់ប្រាក់កក់ 20% 25% ឬ 30% ទៅតាមសមត្ថភាព។ បន្ទាប់មកពួកគាត់ត្រូវបន្តបង់រំលោះជាមួយធនាគាទៅតាមលក្ខខណ្ឌការប្រាក់របស់ធនាគារនីមួយៗ»។

អត្រានៃការទូទាត់សម្រាប់ខែនីមួយៗអាចចាប់ពី 105 ដុល្លារទៅ 244 ដុល្លារ ទៅតាមភាគរយប្រាក់កក់ ដែលពួកគាត់ចង់បង្រ្គប់និងតម្លៃផ្ទះ។ តម្លៃផ្ទះចាប់ផ្តើមពី 25000 ដុល្លារទៅ 38888 ដុល្លារអាមេរិក។

ក្រុមហ៊ុន ក្រុមហ៊ុន វើលដ៏ប្រ៊ីដ ហូម ឯ.ក ក៏បានប្រកាសផងដែរថាអ្នកទិញដែលមានឈ្មោះក្នុងបញ្ជីទិញត្រូវមកទូទាត់ប្រាក់កក់មុនថ្ងៃទី 12 ខែកុម្ភៈឆ្នាំ 2018 ។ សម្រាប់អតិថិជនខកខានមិនបានមកតាមថ្ងៃកំណត់ ក្រុមហ៊ុននឹងចាត់ទុកថាអតិថិជនបាត់បង់សិទ្ធិ។

ជាមួយនឹងគោលការថ្មី លោក នួន រិទ្ធី រំពឹងថគម្រោងទាំងមូលនឹងលក់អស់ក្នុងរយៈពេលពីរខែ។

• គម្រោងអភិវឌ្ឍន៍
• គម្រោងអភិវឌ្ឍន៍