ក្រុមហ៊ុន Ford និងដៃគូ នឹងបោះទុន ១១,៤ ប៊ីលានដុល្លារ សង់រោងចក្ររថយន្តអគ្គិសនីខ្នាតយក្ស

• 28 ខែ​កញ្ញា 2021
• ព័ត៌មានសំណង់
• 10 មើល

ក្រុមហ៊ុន Ford Motor Co., Ltd និងក្រុមហ៊ុនកូរ៉េខាងត្បូង SK Innovations នឹងចាប់ដៃគ្នាបោះទុន ១១,៤ ប៊ីលានដុល្លារ បង្កើតរោងចក្ររថយន្តអគ្គិសនីខ្នាតយក្ស ២ កន្លែង។ នេះបើយោងតាមសារព័ត៌មាន CNN ចេញផ្សាយកាលពីថ្ងៃទី២៧ ខែកញ្ញា។

យោងតាមនាយកប្រតិបត្តិរបស់ក្រុមហ៊ុន Ford លោកស្រី Lisa Drake ចំណែកភាគហ៊ុនរបស់ក្រុមហ៊ុន Ford មានចំនួន ៧ប៊ីលានដុល្លារ ក្នុងការវិនិយោគនេះ។ លោកស្រី បន្តថាការវិនិយោគនេះជាផ្នែកមួយនៃទំហំទឹកប្រាក់ដ៏មហិមាជាង ៣០ប៊ីលានដុល្លារ ដែល Ford គ្រោងចំណាយត្រឹមឆ្នាំ ២០២៥ ដើម្បីផ្លាស់ប្តូរផលិតកម្មរបស់ខ្លួនទៅជាការផលិតរថយន្តអគ្គិសនីវិញ។ Ford ក៏រំពឹងថា ៤០% នៃការលក់ទូទាំងពិភពលោកនឹងជារថយន្តអគ្គិសនី ត្រឹមឆ្នាំ២០៣០។

យ៉ាងណាមិញ រោងចក្រទាំង២ នឹងមានទីតាំងស្ថិតនៅរដ្ឋ Kentucky និងរដ្ឋ Tennessee នៃប្រទេសអាមេរិក ដោយគម្រោងនឹងរួមបញ្ចូលការបង្កើតរោងចក្រផលិតអាគុយរថយន្តអគ្គិសនីចំនួន ៣កន្លែង និងរោងចក្រផលិតរថយន្តភីកអាប់ចំនួន ១កន្លែងផងដែរ។

លោកស្រី Lisa Drake បានមានប្រសាសន៍ថា៖ «អនាគត រថយន្តអគ្គិសនី នឹងផ្លាស់ប្តូរក្នុងរយៈពេល ២-៣ទសវត្សខាងមុខនេះ ហើយយើងចង់បង្កើនសមត្ថភាព ស្របពេលដែលទីផ្សារ រថយន្តអគ្គិសនីកំពុងកើនឡើង»។

លោកស្រីបន្ត រោងចក្រនឹងចាប់ផ្តើមផលិតអាគុយ និងឡានដឹកទំនិញ នៅឆ្នាំ ២០២៥ ខាងមុខ ។

គួរបញ្ជាក់ផងដែរថា ក្រុមហ៊ុន Ford ក៏បានប្រកាសកំពុងវិនិយោគទឹកប្រាក់សរុប ៥២៥ លានដុល្លារ នៅទូទាំងសហរដ្ឋអាមេរិក ក្នុងរយៈពេល ៥ឆ្នាំខាងមុខ ដើម្បីបណ្តុះបណ្តាលអ្នកបច្ចេកទេសជួសជុល រថយន្តអគ្គិសនី។

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍